Read Banggai YESAYA 9 Bible Online

YESAYA 9 - Banggai bible

YESAYA 9

¹ Kobangsa motubo doi kalipookan lalomo kitayo komadialan molalaangan. Modungol doi matean bayangano lalomo kinodiolonii madialan laango.

² TEMENENO, Ikoo beena yanila lalabaan mobabasal. Ikoo kubaiyo yanila toloukon kokuweis. Yanila laba sabab mumonondokan, pokakana komian molalaba doi tempo napototongikanano konapo asi hasilo, kai doi mongobosan langge molinambas.

³Ikoo alayomo konapo tanggungan mobabalat tukon napo kayung tinanggung doi bengenoila. Ikoo lungguiyomo dobangsadoo molai-lainggene komian motongo lailainggene Komu umat. Buno pokakana doi loonu loolukon doi tempo Mulungguiyano ko Median miano nasuludadu.

⁴Ko suludadu nasapatu molauk-lauk tukon kona kalambi momoono sau, naikon kabus aung mokaane.

⁵Tosuungo komeeng kopau tuuk doi kita, kita binee meeng komalane. Yanamo naikon komo katuaiyo kita. Yana sinombuikon: “Pongotunggul Pandoy”, “Mian Bisa mo Barani Tambongan”, “Tama Posidutukon”, “Tomundo Podamean”.

⁶Yana maparenta salaku tomundo Daud nakaturunan, kona kakuasaan babasal tuuno. Kotanono sidutu aman tukon monondok; kona maparentaan yana tealikene dasar luwedoi hukum tukon kaadilan diabudodoo polong sidutu-posidutukon. Ko TEMENENO Mobabasal Konakuasa pasti laksanakanggene.

⁷ Ko TEMENENO lapamo tuwongikene kohukuman doi Israel nabatomundoan.

⁸Sasaibino kobangsa Israel tukon Samaria tumbu-tumbuno yanila naikon toiyomo baikon komo lakukanggene doiyamo TEMENENO. Budodoiya yanila sombong tukon batinggai.

⁹Konapobantilano, “Bangunan-bangunan moluwedoi batutela tolubango, baikai naikon mokubai bangunan-bangunan mo tongo luwedoi batu. Koara-ara batango tinapemo, bai kami soboliyo tukon kayung kauwalu Libanon momonondok tuuno.”

¹⁰Ko TEMENENO gerakanggenemo konapo musuh sulano nalawane yanila.

¹¹Kobangsa Siria taalikon tolopot tukon bangsa Filistin doi talise yanila lungguiyomo ko Israel. Bai ko TEMENENO daanoon monggimal tukon tataap hukume yanila.

¹²Maukai nabuno doiya bai dobangsa Israeldoo miano aki napo yase mobadodoloon, maukai do TEMENENO doo Mobabasal Konakuasa nahukumemo yanila bai aki napo badodoloon doi Yana.

¹³Tobikon doiya ko Israel miano nakatua sasaibino tukon korayat tongo meeng kooloyo ko TEMENENO nahukumano yanila sasaibino kabus. Yana uange kooluno tukon puuso.

¹⁴Kooluno doiyamo paupaulanggai tukon mian moinodotii, kopuuso doiyamo sasaibino konabi momebee otunggul mosalah.

¹⁵Sasaibino komo katuaiyo dobangsadoo sesatkanggenemo tukon nggalanggabutemo korayat napikiran.

¹⁶Dobangsadoo murtato tukon kapala batumo tukon konapo bantilan sasaibino lokis. Tobikon doiya sasaibino konapo tabo-tabo akiyokai maunabaino meeng komian komo luput doi TEMENENO doo nahukuman. Akimo naiyase mamaasikene kobalu-balu tukon pau-pautuboon. Bai ko TEMENENO tataap nggimal tukon hukume yanila.

¹⁷Dobangsadoo nakulokisan pokakana koaung molalakene koanggur mo palasoniton. Kona kolotan pokakana kobokulung molinalakon mokalikobungan kotibolungo.

¹⁸Ko TEMENENO Mobabasal Konakuasa nggimal tuuno, tukon konahukuman pokakana koaung mokolot-kolot tukon dobangsadoo yanilamo komo sinua kabus. Akiyokai komeeng komian momamaasikene koutuso.

¹⁹Doi posaapon dotanodoo komiano tubo doi susaan lalomo tukon tongo yanila kaan oilamo konapo moola kinaan, bai napo rasayo bobosul. Maukai koidan napo kaane kotulanoila!

²⁰Ko Manasye tukon Efraim miano yanila polobosi, maka napo polaing-laingi molawane ko Yehuda miano. Bai ko TEMENENO tataap nggimal tukon hukume yanila.