Read Banggai BASAMBUAN 1 Bible Online

BASAMBUAN 1 - Banggai bible

BASAMBUAN 1

¹Luwedoi Na Sandung, TEMENENO uange Musa tukon beena doi yana paraturan-paraturan

²mosio Israel miano nataatio. Kalu memeeng komian mososubakon iyayon tuuk sosubakon mosinua doi TEMENENO, yana moola mososubakon sapi, domba, kai nambembe.

³Kalu komo sinosubakon meeng kosapi, dosapidoo sio langgilo tukon akiyo kona sesel. Sapidoo sio nabinaba doi TEMENENO Na Sandung tataapono, sulano ko TEMENENO napokonoi domianoo.

⁴Maka yana sio nabinggakene kolimano doi iyayonoo oluno bunggono, maka kona sosubakon naikon TEMENENO talimayo tuuk ompuniyano kona lalim.

⁵Doibundu dosapidoo sio natinembel doi Sandung tataapono salaano. Kosauno sio imam-imam katulunan Harun komo sosubakene doi TEMENENO, maka napo kundongiikene doi potikunggon balabaanoo doi sandungoo tataapono salaano.

⁶Doibundu domianoo sio nakanite tukon sopoliiyo doiyayonoo.

⁷Imam-imam sio naokoitiyo koaung doi balabaanoo bunggono maka naposusunikene kokayung mosinua doi bunggono.

⁸Dosailoo pato-patolo, tongusokon kooluno tukon inakko, sio napo abese doi aung bunggono.

⁹Maka dopai mianoo sio nakumosiyo kokombongo tukon sapidoo banano, tukon imam mobalimang sio nasuayo sasaibino. Dososubakonoo mosinua boono sanaanggene ko TEMENENO noano.

¹⁰Kalu domo sinosubakonoo meeng kodomba kai mbembe, doiyayonoo sio langgilo tukon akiyo koseselo.

¹¹Domianoo sio natembele doiyayonoo doi balabaanoo sembeleng tambikon doi lembet, maka doimam-imammoila sio nakundongiikene kosauno doi potikunggon do balabaanoo.

¹²Sambuno doiyayonoo lapa sinopolii, sasaibino kopatolo, tongusokon kooluno tukon inakko, imam sio naabese doi aungoo bunggono doi balabaanoo.

¹³Maka domianoo sio nakumosiyo kokombongo tukon doiyayonoo banano. Doibundu imam sio nasosubakene sasaibino doi TEMENENO, tukon suayo doi balabaanoo bunggono. Sosubakonoo mosinua boono sanaanggene ko TEMENENO noano.

¹⁴Kalu komo sinosubakon meeng kotomisi, sio tomisi sapatau kai tomisi lapatiing momongula.

¹⁵Imam sio nababayo dotomisidoo doi balabaan, maka napiese kobulungo tukon suayo kooluno doi balabaanoo bunggono. Dotomisidoo sauno sio napinidol kalual doi balabaanoo bibilo.

¹⁶Kobottuno tukon sasaibino kokombongo sio nabinuut, maka nasinakukon taalikon doi tolopot doi balabaanoo doi bangabosan abu.

¹⁷Lapa doiya dotomisidoo sio nalinekes doi kapilo uuno, bai kokapilo aki namoola sampe toliat. Maka dotomisidoo sio nasinua doi balabaanoo bunggono. Dososubakonoo mosinua boono sanaanggene ko TEMENENO noano.