Read Banggai BASAMBUAN 10 Bible Online

BASAMBUAN 10 - Banggai bible

BASAMBUAN 10

¹Daano kooloyo meeng Nadab tukon Abihu Harun napau-pau, yanila suwe-suwele mangala napo bangabosan aung tukon yanila totuiyo bala. Maka yanila mangabos kamangian doi aungoo lalomo tukon sosubakene doi TEMENENO. Bai doaungoo aki natinalima sabab ko TEMENENO aki nasumboliiyo yanila mososubakene.

²Maka ko TEMENENO lubatene koaung mosuayo yanila pomatekon doi TEMENENO Na Sandung.

³Maka Musa bantile doi Harun, “Koiyamo ko TEMENENO naminakisud doi tempo Yana bantile, ‘Sasaibino komo leleaniyo Yaku sio naodotiiyo Daku moliyousan. Yaku naikon okitakene Daku kinabasalan doi sasaibino Daku mian.’ ” Bai Harun aki nabiyok.

⁴Doibundu Musa uange Misael tukon Elsafan, Uziel napau-pau, Harun napinatama. Kona bantilano doi yanila, “Lubato doisumai, leleiyo kotolidanmu bajano luwedoi TEMENENO Na Sandung tukon abese doi sandungoo tonggulungo.”

⁵Yanila lubat tukon babayo dobajan-bajanoo modaano kona pakean tobuat doi basandungan tonggulungo, buno Musa napinalentahkon.

⁶Maka Musa bantile doi Harun tukon napau-pau bailon, doiyamo Eleazar tukon Itamar, “Inai mosodiikene komubuuk nanggalanggabut, tukon inai mobendinge komupakean tuuk motudoikene baikon komuyu poloon tukon kokiil. Kalu komuyu kubaiyo buno doiya, komuyu naikon mate, tukon sasaibino ko Israel miano TEMENENO nggimoliiyo. Bai sasaibino ko Israel miano bailonggon moola nakokiil tuuk doi mianoo lua momate sabab aung moluwe doi TEMENENO.

⁷Inai motinggale ko TEMENENO Na Sandung sulano akipo mate, sabab komuyu lapamo tinabiskanggon tukon lisison bakolobokian tuuk moleleaniyo ko TEMENENO.” Yanila kubaiyo bunomo Musa nabinantil.

⁸TEMENENO bantile doi Harun,

⁹“Sambuno lapa monginum anggur paisuno kai langge moininum bailon moonas, ikoo tukon mupau-pau aki namoola usok doi Ku Sandung lalomo. Kalu komuyu lupaiyo doaturanoo, komuyu naikon mate. Doparentahdoo sio sasaibino komu katulunan naloingiyo.

¹⁰Komuyu sio pomoola posasalakene komo inalaas motuuk doi Mian Bisa tukon moaki nainalaasanggon, doimolokis tukon moaki nalokis.

¹¹Sasaibino koaturan kubineekon doi komuyu mololo doi Musa sio pomoola otunggulikene doi Israel miano.”

¹² Musa bantile doi Harun tukon doi napau molua, Eleazar tukon Itamal, “Alayomo dogandumoo labino luwedoi kinaan mosinosubakon doi TEMENENO. Luwedoi tarigudoo mokubaimo roti moaki napake lagi, lapadoiya maka kaanemo doiya doi balabaanoo bibilo, sabab dososubakonoo moliyous tuuno.

¹³Dorotidoo sio nakinaan doi tampat momoliyous, sabab luwedoi kinaan mosinosubakon doi TEMENENO, rotidoo teali muobos tukon mupau-pau malaneno. Doiyamo ko TEMENENO napinalentahkon doi yaku.

¹⁴ Bai komuyu tukon mupau-pau malaneno tukon boineno yanila moola kaane doiyayonoo eopo moteali sosubakon potudoikon tukon doiyayonoo banano mokinubai sosubakon motangalaas. Doiyamo sasaibino koimam naobos luwedoi Israel miano nasosubakon podamean. Komuyu moola kaane doi sabalang kotampat moaki nalokis.

¹⁵Kobanano mokinubai sosubakon motangalaas tukon doeopodoo moteali sosubakon potudoikonoo sio nabinaba polaing-laing tukon inak tuuk sosubakon mosinua salaku sosubakon moinalaasanggon tuuk doi TEMENENO. Doobos-obosodoo teali koomu tukon mupau-pau tuuk sidutu-posidutukon, bunomo TEMENENO napinalentahkon.”

¹⁶Doibundu Musa masadaikene tentang mbembe moteali sosubakon potolos lalim. Yana binotiikon baikon dombembedoo lapamo sinua. Dolanggedoo kubaiyo Musa nggimoliiyo doi Eleazar tukon Itamal, tukon yana bantile doi yanila,

¹⁷ “Bulaando dososubakon potolos lalimoo moaki pokaane doi tampat mo moliyous? Dososubakonoo moliyous tuuno; TEMENENO beekene doi komuyu, sulano ko Israel miano nalalim natinolos.

¹⁸Mbembedoo sauno aki nabinaba doi TEMENENO Na Sandung, jadi kona bisaan dososubakonoo sio pokaane idoo buno daku pinarentakon.”

¹⁹Harun timbiliyo, “Takainomo naoloyo nia ko Israel miano lapamo sosubakene kososubakon potolos lalim tukon sosubakon mosinua doi TEMENENO. Maukai nabuno doiya, nabalaa nia lubotiiyakumo. Kalukai naoloyonia yaku kaane koidan kososubakon potolos lalimoo, oilakai naikon ko TEMENENO sanaang?”

²⁰Musa lasayo sukup tukon dopotimbilidoo.