Read Banggai BASAMBUAN 11 Bible Online

BASAMBUAN 11 - Banggai bible

BASAMBUAN 11

¹TEMENENO beekene doi Musa tukon Harun naaturan-aturan nia,

²tuuk doi bangsa Israel. Sasaibino koiyayon motubo doi butatina mobasaiyo kokinaan lualuunggon tukon lungguno tabata lua moola nakinaan.

⁴Inai mokaane kounta, pelanduk kai kelinci. Doiyayonoo aki namoola kinaan sabab maukai nabasaiyo kona kinaan lua luunggon bai kolungguno aki natabata.

⁷Inai mokaane kobabung, iyayonoo aki namoola kinaan, sabab maukai natabata kolungguno, bai yana aki nabasaiyo kona kinaan lua luunggon.

⁸Kosailo aki namoola kinaan tukon kobunuto aki namoola sininggil. Sabab doiyayamo aki namoola kinaan.

⁹Komuyu moola kaane sasaibino koikan kaliangano moano kokapilo tukon anano.

¹⁰Iyayon mo tubo doi paisu lalomo bai moakiyo kokapilo tukon moakiyo koanano, doiya aki namoola kinaan, tukon kobunuto aki namoola sininggil.

¹³Doi antara tomisi-tomisi, mo bailonggon nia aki namoola nakinaan sabab kulokis: tomisi rajawali, tomisi kolu, sasaibino koalai kaliangano, nasar, gagak, tomisi unta, camar, blekok tukon sasaibino kokolong kaliangano, undan, tomisi kasa tukon oniki.

²⁰Sasaibino koiyayon labuko mo daano kokapilo doiya aki namoola kinaan,

²¹alaasene komo moola osuut.

²²Jadi kobetek, taduunggalang tukon betek manampal moola nakinaan.

²³Bai sasaibino koiyayon bailon moano kokapilo tukon koidan molanda doiya aki namoola kinaan.

²⁴Kalu daano komeeng komian moteali lokis polong posopokon kooloyo kalu yana singgile komeeng koiyayon bunuto nia: doiyamo iyayon modaano kolungguno, alaasene kolungguno natabata tukon mo basaiyo kona kinaan lua luunggon, tukon iyayon moano koaino sangkap, tukon modaano kolungguno. Indee komo babayo koiyayon bunuto mobuno doiya sio nabusoiyo konapakean, bai yana daano molokis polong sopok kooloyo.

²⁹Bukoti buta, bukoti babasal, bukoti pauno, kadal, sasaibino kotupak kaliangano, landak, kumbosu, kaladia, kalabuku, tukon bunglon doiyakai aki namoola kinaan.

³¹Indee komiano komo singgile doiyayonoo bunuto yana teali lokis posopokon kooloyo.

³²Kalu doiyayonoo bunuto otuwong doi meeng kolobo bunggono, maka dolobodoo lokis. Dolanggedoo tapake tuuk doi sasaibino kolobo kaliangano moluwe doi kayung, toik, kulit, toik karung, tukon aki nateali soal tuuk oila dolanggedoo namoolaan pinake. Dolanggedoo sio natinooni doi paisu lalomo, bai tataap lokis polong sopok kooloyo.

³³Kalukai dobunutoo otuwong doi balanga buta lalomo, sasaibino komo daano doi balangadoo lalomo teali lokis, tukon dobalangadoo sio napinasa.

³⁴Kinaan mokanakon paisu moluwe doi balangadoo teali lokis, tukon moininum modaano doi balangadoo lalomo koidan teali lokis.

³⁵Oilakai komo totuwongikon dobunutoo teali lokis. Kompool kai tampat basuaan luwedoi buta mokanakon dobunutoo sio napinasa sabab lokis.

³⁶Alaasene paisu matano kai bubung, sasaibino kobailon teali lokis kalu kanakono bunut.

³⁷Kalu bunutoo tuwong doi kolibuang bungano motinipas, dolibuangoo tataap bilisii.

³⁸Bai kalu dolibuangoo daano motinooni doi paisu lalomo maka natotuwongikon dobunutoo, maka dolibuangoo teali lokis.

³⁹Indee komian komo singgile doiyayonoo bunuto mo moola kinaan teali lokis polong sopok kooloyo.

⁴⁰Mian mobabayo kai makaan dobunutoo sio nabusoiyo kona pakean, bai yana tataap lokis posopokon kooloyo.

⁴¹Sasaibino koiyayon mo palabiyok doi buta bunggono, mau molanda, mosangkap koaino, kai badaang koaino, doiyakai aki namoola kinaan.

⁴³Inai mokulokisene kobutomu tukon kaane koiyayon mopokakana doiya.

⁴⁴ Yakumo ko TEMENENO, mu Mian Bisa, tobikon doiya dagaiyo sulano potataap moliyous, sabab Yaku moliyous.

⁴⁵Yakumo ko TEMENENO mo babayo komuyu tobuat luwedoi Mesir, sulano kumoola teali mu Mian Bisa. Siokai pomoliyous, sabab Yaku moliyous.

⁴⁶Doiyamo koiyayon aturano tongusokon kotomisi, iyayon mo tubo doi paisu lalomo tukon mo palabiyok doi buta bunggono.

⁴⁷Komuyu sio pomoola posasalakene antara mo bilisii tukon molokis, antara iyayon mo moola kinaan tukon iyayon mo aki namoola kinaan.