Read Banggai BASAMBUAN 13 Bible Online

BASAMBUAN 13 - Banggai bible

BASAMBUAN 13

¹TEMENENO beekene doi Musa tukon Harun naaturan-aturan nia:

²Kalukai memeeng komian daano kona lingguat-lingguat kobutongo, takatolon kai soniul doi kulito momoola teali sesel kulit mo osilakayo komian; yana sio nabinaba doi imam Harun nakatulunan.

³Koimam sio napalesayo doi mianoo kulito mo seselon. Kalu koinuango modaano doi kulitoo moseselon moutemo, tukon taalikon komo seselon tokita lobian kona ateanan, luwedoi kulito bailon, domianoo kanakon sesel kulit mosilakaiyo komian. Imam sio nanyatakanggene domianoo lokis.

⁴Bai kalu taambikon doi moseselonoo kotambongo moute tukon aki nalobian atean luwedoi kulito bailonggon, tukon koinuango taalikon idoo koidan aki nateali moute, domianoo sio nainalaas pitu kooloyo kona kalumbit.

⁵Doi oloyo kopituno imam sio napalesayo koidan. Tukon kalu pokokonoi kona palaat, dopanakitoo daano pokakana kondodoongo tukon aki nadonggitiyo doi mian bailon, domianoo sio nainalaas pitu kooloyo koidan kona kalumbit.

⁶Doi oloyo kopituno imam sio napalesayo koidan tukon kalu taalikon doi moseselonoo tangalino tukon aki nadonggitiyo imam sio nyatakanggene domianoo bilisii. Doiya seseloo sesel kulit moaki naosilakayo komian. Domianoo sio nabusoiyo konapakean tukon yana teali bilisii.

⁷Bai kalu lapamo koimam okitakene bilisii domianoo napanakit badonggiti, yana sio naabali mangadap doi imam.

⁸Imam sio napalesayo koidan, tukon kalu bisa dona seseloo takainomo baladanggito domianoo sio nainokitakonggon madikit, yana sakisaa tukon sesel kulit mosilakaiyo komian.

⁹Memeeng komian mokanakon sesel kulit mosilakaiyo komian sio nabinaba doi imam.

¹⁰Kalu mololoi imam napalesaano domianoo moseselon kulit moano kona boboonganan moute motakatolon tukon koinuango taalikon idoo teali moute,

¹¹domianoo kanakon sesel kulit mosilakaiyo komian. Imam sio nyatakanggene domianoo lokis. Aki napalaluu yana inalaas, sabab totoimo baikon yana lokis.

¹²Kalu imam kitayo baikon kalu bisul-bisul moute donggitono kooluno polong doi aino,

¹³tukon mololoi napalesaano doseseloo donggitiyomo pasaapono kobutongo tukon posaapon kokulito tealimo moute, domianoo inatakanggon bilisii.

¹⁴Bai kalu sumbot kotakatol, koimam sio napalesayo koidan.

¹⁵Kalu doiya tutuu takatol domianoo sio nainatakanggon lokis, sabab yana kanakon panakit kulit mosilakaiyo komian.

¹⁶Bai kalu dotakatoloo tangalino tukon moutemo, domianoo sio namangadap doi imam,

¹⁷sulano napinalesa koidan. Kalu dotakatoloo bisa moutemo, imam sio nanyatakanggene domianoo bilisiimo.

¹⁸Kalu memeeng komian daano konabisul motangalino,

¹⁹bai doi laalodoo tokita kona boboonganan kai soniul-soniul moute same-samelaon, domianoo sio namangadap doi imam 20 sulano napinalesa.

²⁰Kalu dosoniul-soniuloo tokita lobian atean luwedoi kulito bibilo tukon koonoango taalikon idoo tealimo moute koidan, koimam sio nainatakanggene domianoo lokis. Dobisuloo kona luwean doi sesel kulit mosilakaiyo komian.

²¹Bai kalu mololoi imam napalesaano koinuango taalikon idoo aki nateali moute, tukon taalikon idoo aki nalobian kona ateanan luwe doi kulito bibilo, tolongo lobian mongula kondondoongo, domianoo sio nainalaas pitu kooloyo konakalumbit.

²²Kalu soniul moutedoo sasabul, imam sio nanyatakanggene domianoo lokis sabab yana kanakon panakit kulit mosilakaiyo komian.

²³Bai kalu soniul moutedoo aki nabolii tukon aki nabadonggiti koidan, bai tolongo bisul laalo, jadi domiano inanggapo bilisii.

²⁴Kalukai memeeng komian tosua aung maka kokulito doi pakolodoo teali moute same-samelaon, koimam sio napalesayo.

²⁵Kalu koinuango taalikon idoo teali moute tukon kodedengo, lobian atean luwedoi kulito doi bibilo, maka dosesel kulitoo mosilakaiyo komian lapamo donggitiyo doi dedeng motosuadoo, tukon koimam sio nanyatakanggene domianoo lokis.

²⁶Bai kalu koinuango idoo aki nateali moute tukon taalikon idoo aki nalobian kona ateanan luwedoi kulitoo bibilo, tolongo lobian mongula kondondoongo, maka domianoo sio nainalaas pitu kooloyo konakalumbit.

²⁷Doi oloyo kopituno koimam sio napalesayo koidan. Kalu dosoniuloo mo moute sasabul, maka domianoo kanakon sesel kulit mosilakaiyo komian, tukon doiya sio nainatakanggon lokis.

²⁸Bai kalu soniul moutedoo aki nabolii tukon aki kai nabadonggiti, tolongo lobian moute kondondoongo, doiya bolikon sesel kulit mosilakaiyo komian. Koimam sio nanyatakanggene domianoo bilisii, sabab kondondoongo mo moute tolongo dedeng laalo motosua.

²⁹Kalu daano komeeng komala-malane kai meeng koboine mokanakon sesel kulit doi oluno kai doi adeno,

³⁰sio imam napalesayo yana. Kalu taalikon doi seseloo konatokitaan lobian atean luwedoi kulito bailonggon, tukon konabuuk kai nasimbil taalikon idoo teali mosomosoni maka natonggulan, maka domianoo kanakon sesel kulit mosilakaiyo komian tukon sio nainatakanggon lokis.

³¹Kalu menurut imam napapalesa taalikon doi moseselonoo aki natokita lobian atean luwedoi kulito bailonggon, bai aki natalaat kobuuko kai simbil mo sehat taalikon idoo, domianoo tolongo inalaas pitu kooloyo konakalumbit.

³²Doi oloyo kopituno, koimam sio napalesayo koidan taalikon doi moseselonoo, tukon kalu doseseloo aki nabadonggiti tukon aki natalaat kobuuk kai simbil momoso-mosoni doi taalikon idoo, tukon koidan konatokitaan aki nalobian atean luwedoi kulitoo bailonggon,

³³domianoo sio nadaluluwo konabuuk kai nasimbil doi potikunggon domo malalasoo. Maka yana sio nainalaas koidan pitu kooloyo konakalumbit.

³⁴Doi oloyo kopituno, imam sio napalesayo koidan. Kalu konasesel aki nabadonggiti tukon taalikon idoo tokita aki nalobian atean luwedoi kulit bailonggon, domianoo inatakanggon bilisii tukon sio nabusoiyo konapakean.

³⁵Bai kalu lapamo lapa inatakanggon bilisii kona sesel badonggitimo koidan,

³⁶imam sio napalesayo koidan. Kalu doseseloo bisa badonggiti akimo napalaluu koidan imam mopalesayo oilamo kai konabuuk kai nasimbil teali mosoni, sabab totoimo tuuno baikon yana lokis.

³⁷Bai kalu mololoi imam napandapat konasesel aki nabadonggiti tukon tubo konabuuk kai nasimbil mosehat doi tampatoo, maka doseseloo tangalino, tukon koimam sio nanyatakanggene yana bilisii.

³⁸Kalukai meeng komala-malane kai boine daano kosoniul-soniul mo moute doi kulito,

³⁹koimam sio napalesayo domianoo. Kalu dosoniul-soniuloo tokita moute kabur, yana tolongo dinonggiti bolowa, tukon inatakanggon bilisii.

⁴⁰Kalu meeng komala-malane teali suba taalikon doi tonggulung kai taalikon doi oluno salaano, dosubaanoo aki natealikene yana lokis.

⁴¹

⁴²Bai kalu boboongan moute sasamelaon doi tampatoo mo suba, yana kanakon sesel kulit mosilakaiyo komian.

⁴³Koimam sio napalesayo domianoo, tukon kalu bisa daano kona boboonganan mo moute same-samelaon,

⁴⁴koimam sio nanyatakanggene yana lokis sabab kanakon sesel kulit mo silakaiyo komian doi oluno.

⁴⁵Memeeng komian mo kanakon sesel kulit mosilakaiyo komian, sio namapake pakean mo tebe-tebendengi tukon batadikene konabuuk nanggalanggabut. Yana sio sunggupiyo koduduso taalikon doi adeno maka nanggele-nggeleamon: “Lokis! Lokis!”

⁴⁶Doi daanoan yana mokanakon doseseloo yana inaanggon lokis tukon sio nadungol doi sandung tonggulungo, tukon dinodoonggon luwedoi mian badaang bailon.

⁴⁷Kalu talaat konamanasan doi pakean kai toik moluwe doi wol kai lenan,

⁴⁸kai kulit, kai oilamo komo kinubai luwedoi kulit,

⁴⁹tukon kondondoongo dona manasanoo mana-manampal kai same-samelaon, maka dona manasanoo kondondoongo badonggiti tukon sio natinudoikon doi imam.

⁵⁰Koimam sio napalesayo dolanggedoo, maka nainalaas pitu kooloyo konakalumbit.

⁵¹Doi oloyo kopituno yana sio napalesayo koidan, tukon kalu dona manasanoo takainomo badonggitimo dolanggedoo lokis.

⁵²Imam sio nasuayo dolanggedoo, sabab donamanasanoo mobadonggiti, jadi sio nainakabus tukon aung.

⁵³Bai kalu mololoi imam napalesaano donamanasanoo aki nabadonggiti doi langgedoo,

⁵⁴yana mosumboliikene dolanggedoo nakinumosi tukon dinodoonggon pitu kooloyo koidan konakalumbit.

⁵⁵Maka imam sio napalesayo koidan. Kalu donamanasanoo aki nabadonggiti bai kondondoongo tataap pokakana, dolanggedoo daano momadikit tukon sio nasinua, maukai donamanasanoo talaat tolongo doi salaano kai taalikon doi tonggulungo.

⁵⁶Bai kalu mololoi imam napalesaano boliimo dona manasanoo, taalikon domo manasoo luwedoi toik kai kulitoo sio nabinending.

⁵⁷Kalu doibundu sumbot koidan, maka donamanasanoo badonggiti, tukon kotumbuno sio nasuayo dolanggedoo.

⁵⁸Kalu lapamo kinumosi dona manasan doilanggedoo lapuso, maka dolanggedoo sio nakinumesi koidan, makanasodo inaanggon bilisii.

⁵⁹Bunomokai doiya koaturan-aturano tentang kona manasan motalaat doi pakean kai doi toik mo luwedoi linen kai wol kai oila tolong komo tokubai luwedoi kulit.