Read Banggai BASAMBUAN 14 Bible Online

BASAMBUAN 14 - Banggai bible

BASAMBUAN 14

² naaturan-aturan nia kaliangano upacara babilisiian nalapa tangalin luwedoi panakit kulit mosilakaiyo komian. Doi oloyono domianoo naikon nyatakanggonan mobilisii, yana sio nabinaba doi imam,

³tukon imam babayomo doi basandungan tonggulungo. Kalu mololoi napalesaano domianoo tangalino,

⁴imam sumboliiyo yana namababa lua kotomisi motubo moaki napinatanggon, tukon meeng kopatolo kokayung kauwalu, meeng koalos patolo memela, tukon meeng kohisop langaano.

⁵Dotomisidoo mo meeng sio natinembel doi balanga buta bunggono moinotoki paisu mo bilisii luwedoi paisu matano.

⁶Tomisi momeeng koidan tukon kayung kauwalu alos memela tukon meeng kohisop langaano sio nasinomok doi tomisidoo sauno lalomo molapamo tinembel.

⁷Doimamoo tiposiikene dotomisidoo sauno pitu luunggon doi mianoo molapamo tangalin, tukon nyatakanggene yana bilisii. Maka dotomisidoo modaano motubo sio nasinodii doi padang.

⁸Doibundu domianoo sio nabusoiyo konapakean, daluwo konabuuk, tukon mansau. Maka yana bilisiimo, tukon moolamo nausok doi basandungan lalomo, bai pitu kooloyo koidan kona kalumbit yana aki namoola usok doi nasandung lalomo.

⁹Doi oloyo kopituno yana sio nadaluluwo sasaibino konabuuk kai nasimbil, matano bullono tukon sasaibino kona onuang modaano doi butongo. Maka yana sio nabusoiyo konapakean tukon masau. Kalu bunomo doiya yana bilisiimo.

¹⁰Doi oloyo koaluno domianoo sio namababa lua kodomba napau langgilo tukon meeng kodomba napau molukono momeeng kotaun konaumur mo suwe-suwele akiyo kona sesel. Sangalaasan doiya koidan tolu kokilogram kotarigu molapamo sinambul tukon zaitun lisisono tukon tongobos tolu doi meeng koliter kozaitun lisisono.

¹¹Maka imam sio nababayo yana tukon dona sosubakonoo doi TEMENENO Na Sandung tataapono salaano.

¹²Imam sio naalayo dodombadoo napau meeng langgilo tukon tongobos tolu doi meeng koliter kozaitun lisisono tuuk sosubakon posoboli lugi, tukon yana sosubakenemo salaku sosubakon potudoikon doi TEMENENO.

¹³Dodombadoo napau sio natinembel doi tampat mosinadiakono tuuk doi mokolotan iyayon motuuk doi sosubakon potolos lalim tukon sosubakon mosinua. Dodombadoo sio natinembel idoo sabab sosubakon posoboli lugi tukon sosubakon potolos lalim doiya moliyous tuuno tukon teali imam naobos.

¹⁴Imam sio namangala soisik kodomba napau sauno maka nasolitikene doi tolingaino bakalinga, doi limano bakalinga saono tumbuno tukon doi aino saono tumbuno bakalinga doi mianoo moinaikon inatakanggono bilisii.

¹⁵Doibundu imam mangala soisik ko zaitun lisisono tukon kondungiikene doi limano bobo pallaino susuungo.

¹⁶Sambuno yana lapa semeke kolimano saono bakalingano doi lisisonoo lalomo, tukon tiposiiyo pitu luunggon doi TEMENENO Na Sandung lalomo.

¹⁷Maka soisik kolisison mo daano doi limano sio nasolitikene doi tampat-tampat molapamo sinoliti sau, doiyamo doi tolingaino bakalinga, doi limano saono tumbuno bakalinga tukon aino bakalinga saono tumbuno doi mian mo inaikon inatakanggono bilisii.

¹⁸Lisison labino sio nakinundongiikon doi mianoo oluno bunggono. Tukon buno doiya imam kubaiyo koupacara bakiliyousian tuuk doi mianoo doi TEMENENO salaano.

¹⁹Doibundu imam sio namososubakon sosubakon potolos lalim sulano mian molokisoo teali bilisii. Sambuno lapa yana sio namokolot iyayon motuuk sosubakon mosinua,

²⁰tukon yana sosubakene polainggene kososubakon kinaan doi balabaan bunggono. Tukon bunodoiya imam adakanggene koupacara bakiliyousian motuuk doi mianoo, tukon yana tealimo bilisii.

²¹Kalu domianoo talalais tukon aki nanggolayo, maka tuuk sosubakon posoboli lugi yana tongo moola makanggi meeng kodomba napau langgilodoo tolong motuuk sosubakon potudoikon doi TEMENENO. Sangalaasan doiya yana sio namakanggi meeng kokilogram kotarigu mosinambul tukon zaitun lisisono tuuk sosubakon mokinaan, tukon koidan tongobos tolu doi meeng koliter kozaitun lisisono tuuk sosubakon mokinaan, tukon koidan tongobos tolu koliter kozaitun lisisono.

²²Yana siokai namakanggi lua kotomisi lapatiing mongula kai sapatau mongula: komeeng tuuk doi sosubakon potolos lalim tukon komeeng koidan tuuk doi sosubakon mosinua.

²³Sasaibino dososubakonoo sio nabinaba doi imam doi TEMENENO Na Sandung tataapono salaano doi oloyo koaluno doi nakolobokiyano kobutongo.

²⁴Imam alayo dodombadoo napau tukon zaitun lisisonodoo tukon yana sosubakene salaku sosubakon potudoikon motuuk doi TEMENENO, tukon doiya teali imam naobos.

²⁵Maka imam sio nakelete dodombadoo napaudoo tukon soutikene soisik kosauno doi tolingaino bakalinga tabuno, limano saono tumbuno bakalinga, tukon aino saono tumbuno bakalinga doi mianoo naikon moinatakanggon bilisii.

²⁶Imam sio nakundongiiyo soisik kolisison doi limano bobo pallaino

²⁷tukon limano saono bakalinga tiposiikene dolisisonoo pitu luunggon doi TEMENENO Na Sandung lalomo.

²⁸Maka soisik kolisison moano doi limano sio nasolitikene doi tampat-tampat molapamo sinoliti sau, doiyamo tolingaino bakalinga tabuno, limano saono tumbuno bakalinga, tukon aino saono tumbuno bakalinga doi mianoo naikon moinatakanggon bilisii.

²⁹Lisison labino sio nakinundongiikon doi mianoo oluno bunggono tuuk doi nakolobokiyano kobutongo.

³⁰Doibundu imam sio nasosubakene komeeng kotomisi lapatiing mongula kai sapatau mongula,

³¹tuuk sosubakon potolos lalim, tukon kotomisi bailonggon teali sosubakon mosinua pososinggat kona sosubakon mokinaan. Tukon bunodoiya imam adakanggene koupacara bakiliyousian do mianoo doi TEMENENO salaano.

³²Doiyamo koaturan kaliangano bakiliyousian upacarano sambuno lapa malaat sesel kulit mosilakaiyo komian motuuk doi mian motalalais.

³³TEMENENO beekene doi Musa tukon Harun

³⁴koaturan-aturano tentang bonua motodonggiti eaka. Naaturan-aturan nia tapake sambuno lapa ko Israel miano usok doi Kanaan, TEMENENO nalipu bineekon doi yanila.

³⁵Indee komiano komo posunggenemo koeaka doi nabonua lalomo, sio napopitoikene dolanggedoo doi imam.

³⁶Kalu koimam akiyoon nalubat mopalesayo doeakadoo yana sio namaparentahkene sulano sasaibino konalobo natinobuatonggon luwedoi bonuadoo, kalu aki, oilakai tolong komo daano doi bonuadoo lalomo teali lokis. Maka imam sio nalubat

³⁷sulano napalesayo domo eakaonoo. Kalu daano kona bunggul-bunggulan mokinita mana-manampal kai same-samelaon motelem doi betoonoo lalomo,

³⁸koimam sio natinggale dobonuadoo tukon sodiinggenemo natokunci selama pitu kooloyo.

³⁹Doi oloyo kopituno yana sio nalubat tukon palesayo koidan. Kalu doeakadoo naodonggit,

⁴⁰yana sio namaparentahkene sulano dobetonnoo batu-batuno mo kanakon doeakadoo nalinamas tukon posaapon kobeton taalikon doi lalom sio nasinaluk. Dobetonnoo pelestero mo sinaluk tukon dobatu-batunodoo sio nasinakukon doi meeng kotampat molokis doi kota tong gulungo.

⁴¹

⁴²Maka dobatu-batu mo tinobuatonggono sio nasinoboli tukon batu-batu mo boolu. Sasaibino dobonuadoo betonnoo sio nalinapis tukon pelester boolu.

⁴³Kalu doeakadoo sumbot koidan, baikai dobonuadoo batu-batuno lapamo sinoboli tukon kobeto-betonno lapamo sinaluk tukon pinelester koidan,

⁴⁴maka imam sio nalubat tukon palesayo dobonuadoo koidan. Kalu doeakadoo takainomo badonggitimo maka dobonuadoo lokiso,

⁴⁵tukon sio nalinombak. Batu-batu, kayung-kayung tukon sasaibino kopelestero sio nakinanggi doi tampat molokis doi kota tonggulungo.

⁴⁶Kalu akiyoon doiya indeekai tolong komo usok doi bonuadoo lalomo teali lokis posopokon kooloyo.

⁴⁷Indee komiano komo moola kai kaan doi bonuadoo sio nabusoiyo konapakean.

⁴⁸Bai kalu imam lubat tukon mololoi napalesaano aki nasumbot koeaka koidan kalu lapamo dobonuadoo pinelester koidan; yana sio nyatakanggene dobonuadoo bilisii, sabab doeakadoo lapuso sasaibino.

⁴⁹Tuuk bakiliyousian bonua, imam sio namangala lua kotomisi, kayung kauwalu, alos mo memela tukon meeng kohisop langaano.

⁵⁰Komeeng koidan kotomisi sio nakinolot doi balanga bunggono mo ano kopaisuno monondok tuuno luwedoi paisu matano.

⁵¹Maka kayungdoo kauwalu tukon alos memela hisop tukon tomisi modaano motubo sio nakinomok doi tomisidoo molapamo kinolot sauno lalomo tukon doi paisu lalomo momonondok tuuno. Lapa doiya dobonuadoo sio natiniposii pitu luunggon.

⁵²Tomisi modaanoon motubo sio nasinodii doi dapang doi kota tonggulungo. Tukon bunodoiya imam lakukanggene koupacara bakiliyousian bonua, tukon dobonuadoo tealimo bilisii.

⁵³

⁵⁴Doiyamo koaturan-aturano kaliangano kosesel mosilakaiyo komian,

⁵⁵nalingguat-lingguat kaliangano, takatol, kai soniul-soniul moute kai mo boboongan doi mian butongo tukon tentang eaka doi pakean kai bonua.

⁵⁶

⁵⁷Doaturan-aturanoo natotuuk sulano natantukanggene oilakai dolanggedoo bilisii kai lokis.