Read Banggai BASAMBUAN 16 Bible Online

BASAMBUAN 16 - Banggai bible

BASAMBUAN 16

¹Sambuno lapa Harun napau lua mate doi tempo namososubakonan aung TEMENENO moaki naiyase, TEMENENO basilingan doi Musa,

² Kona bantilano, “Pelenggenemo doi utusomu Harun, baikon tolongo doi tempo motinantukono yana moola usok doi Kombiang Moliyous tuuno mo inatang tukon lalanse, sabab idoomo Daku okitakanano Kobutonggu doi bunom lalomo doi Peti Perjanjian tutupo bunggono. Kalu Harun aki natulutiyo doparentahdoo, yana naikon mate.

³ Tolongo tukon cara mososubakonan saapi langgilo mongula tuuk sosubakon potolos lalim tukon meeng kodomba langgilo tuuk sosubakon mosinua, Harun moola mongusoki Kombiang Moliyous tuuno.”

⁴Siokai Harun napalaatikanggene naaturan-aturan nia. Akiyoon namongusoki Kombiang Moliyous tuuno yana sio namasau maka napakeyo koimam napakean, doiyamo kalambi, saluan palus, pabaang tukon tuala, sasaibino luwedoi lenan.

⁵Maka ko Israel miano sio nasalakanggene doi Harun lua kombembe langgilo motuuk doi sosubakon potolos lalim tukon meeng kodomba langgilo tuuk sosubakon mosinua.

⁶Harun sio nasosubakene komeeng kosaapi langgilo teali sosubakon potolos lalim tuuk doi butongo susuungo tukon nakaluarga.

⁷Dombembedoo molua langgilo luwedoi Israel miano sio nababayo doi TEMENENO Na Sandung tataapono salaano.

⁸Idoo yana sio namacabut undi tukon mapake lua kobatu, komeeng binee tanda “tuuk TEMENENO”, tukon kobailon “tuuk doi Azazel”.

⁹Kombembe molinilik tuuk doi TEMENENO sio nasinosubakon teali sosubakon potolos lalim.

¹⁰Kombembe mo linilik tuuk doi Azazel sio nainabos daano motubo doi TEMENENO salaano maka nasiniika doi padang lalomo tuuk Azazel, sulano ko Israel miano nalalim-lalim nainakiyonggon.

¹¹Salataa Harun sosubakene tukon metembel saapi langgilo tuuk sosubakon potolos lalim tuuk doi butongo susuungo tukon nakaluarga,

¹²yana sio namangala bangabosan aung moluwe doi balabaan maka natotuiyo moono tukon aung balano tukon lua konggunggumo kokamangian moalus, maka nababayomo doi Kombiang Moliyous tuuno.

¹³Dokamangianoo sio nasinua doi Peti Perjanjian salaano, sulano kotibolungo nasonggupiyo do Petidoo tutupo tukon Harun aki namoola kitayo, sabab kalu yana kitayo yana naikon mate.

¹⁴Maka Harun sio namangala soisik kosaapi sauno, tukon limano saono natiposiikene dosaudoo taalikon doi Peti Perjanjianoo tutupo tukon pitu luunggon doi Petidoo salaano.

¹⁵ Sambuno lapa doiya Harun sio nametembel mbembe motuuk sosubakon potolos Israel miano nalalim. Dombembedoo sauno sio nababayo doi Kombiang Moliyous tuuno, maka natiposiikene taalikon doi salaano do Peti Perjanjianoo tukon doi Petidoo salaano, buno mo lapamo yana lakukene tukon dosaapidoo langgilo sauno.

¹⁶Tukon kokubaidoo yana koliyousiyo ko Kombiang Moliyous tuuno luwedoi nakulokisan ko Israel miano tukon luwedoi sasaibino konapai lalim. TEMENENO Na Sandung sio nakinoliyous sabab tangabos doi Israel miano nabasandungan tanga-tangano tukon yanila kanakon lokis.

¹⁷Tambuun luwedoi tempo Harun nausokiyano ko Kombiang Moliyous tuuno tuuk molakukene kobakolobokiyan pokoliyous polong natobuatan, meeng komian kai aki namoola dungol doi Sandungoo lalomo. Sambuno lapa lakukene kobakolobokiyan tuuk butongo susuungo, tuuk nakaluarga tukon tuuk sasaibino ko Israel miano,

¹⁸Harun sio natobuat tukon taus doi balabaan mosuaan sosubakon sulano nakoliyousiyo dobalabaanoo. Yana sio namangala soisik dosaapidoo sauno tukon mbembe sauno, tukon solitikene doi tandu-tanduko modaano doi balabaanoo pasu-pasuno.

¹⁹Tukon limano saono yana sio namotipas soisik dosaudoo pitu luunggon doi balabaanoo bunggono. Tukon kokubaidoo yana koliyousiyo dobalabaanoo luwedoi Israel miano nakulokisan, sulano nateali moliyous.

²⁰Sambuno lapa adakanggene koupacara pokoliyous Kombiang Moliyous tuuno tukon kombiang-kombiango bailon luwedoi TEMENENO Na Sandung tukon kobalabaano, Harun sio namososubakon doi TEMENENO mbembe motubo molinilik tuuk doi Azazel.

²¹Yana sio naabese loluakon kolimano doi mbembedoo oluno bunggono tukon mangakukene sasaibino ko Israel miano napalanggalan. Tukon bunodoiya sasaibino ko Israel miano nakasalahan oluno bunggono. Maka meeng komian mosinumbolii sio nasiikayo dombembedoo doi padang lalomo.

²²Dombembedoo babayo sasaibino kobangsa Israel nalalim doi lipu mokindalon mo aki nadinungoli tukon yana sio nasinodii doi padang lalomo.

²³ Sambuno lapa doiya Harun sio nausok doi Sandung lalomo, bukayo konapakean imam mopakeo doi tempo nausokan doi Kombiang Moliyous tuuno, tukon tinggalemo dopakeanoo imbali.

²⁴Maka yana sio namasau doi meeng kotampat mo sinadiakon tukon pakeyo konapakean susuungo. Kalu lapamo yana sio natobuat tukon sosubakene kososubakon mosinua tuuk potolos nalalim susuungo tukon Israel miano nalalim.

²⁵Iyayon inakko moteali sosubakon potolos lalim sio nasinua doi balabaan.

²⁶Komian mosodiiyo kombembe tuuk Azazel doi padang lalomo sio nabusoiyo konapakean tukon masau doi naakiyonan namule doi basandungan.

²⁷ Saapi langgilo tukon mbembe motuuk sosubakon potolos lalim, kosauno binaba usok doi Kombiang Moliyous tuuno teali potolos lalim, sio nabinaba tobuat doi basandungan tukon sinua. Kokilito, sailo tukon kombongo doi loluakon doiyayonoo sio nasinua sasaibino.

²⁸Mian mosuayo sio nabusoiyo konapakean tukon masau moakiyoon namule doi basandungan.

²⁹ Naaturan-aturan nia sio natinaati tuuk sidutu-posidutukon. Doitanggal songulo bituwon kopituno, ko Israel miano tukon mian lubat motataapo dungol doi yanila sio nabapuasa tukon pinantan mobalimang, sabab oloyo nia oloyo moliyous tuuno. Doi oloyodoo sio nalinakukon kobakolobokiyan tuuk mokoliyousiyo ko Israel miano luwedoi sasaibino konapoo lalim sulano yanila nabilisii.

³²Imam Babasal molapamo tinabiskanggon tukon inalaas tuuk doi Mian Bisa sulano nasoboliyo kotamano, sio nalakukene kobakiliyousian upacarano. Yana sio namapake pakean moinalaasanggon

³³maka nalakukanggene bakolobokian pokoliyous Kombiang Moliyous tuuno, bagian-bagian bailon motuuk doi TEMENENO Na Sandung, balabaan, imam-imam tukon sasaibino ko Israel miano.

³⁴Dobakolobokiyanoo sio nalinakukon sataun idan tuuk mokoliyousiyo kobangsa Israel luwedoi sasaibino konapoo lalim. Doiyamokai koaturan-aturan mosio nalinoingi tuuk sidutu-posidutukon. Musa lakukene buno ko TEMENENO napinalentakon doi yana.