Read Banggai BASAMBUAN 18 Bible Online

BASAMBUAN 18 - Banggai bible

BASAMBUAN 18

¹TEMENENO sumboliiyo Musa

²napelenggene doi Israel miano naparentah nia, “Yakumo ko TEMENENO mu Mian Bisa.

³Inai molo-loingi ko Mesir miano nakokubai, lipu podungolan looluk kai mian doi Kanaan, inaando diabudoo Daku babaano komuyu.

⁴Poloingiyo daku aturan-aturan tukon lakukene oila komo pinarentakon. Yakumo ko TEMENENO mu Mian Bisa.

⁵ Taatiyo koaturan-aturan tukon ukum-ukum Yaku mobeekene doi komuyu. Kalu komuyu kabaiyo buno doiya komu tuboan salamat. Yakumo ko TEMENENO.”

⁶TEMENENO beekene naaturan-aturan nia. Inai ponikai tukon komeeng komian luwedoi mumotolutusan.

⁷Inai ponikai tukon tinamu, tamamu naboloki, sabab yana tamamu nahaak.

⁸ Inai mototulaiyo kotamamu tukon ponikai sala komeeng kona boloki bailon.

⁹ Inai ponikai tukon utusomu moluko kai utusomu doi silaabo, mau mo piniala meeng kobonua tukon ikoo mau kai mo piniala doi bonua bailon.

¹⁰Inai ponikai tukon mutumbu; doiya naikon kubaiyo komaa doi butomu susuumu.

¹¹Inai ponikai tukon utusomu moluko momeeng kotama bai tina bailon kai meeng kotina bai tama bailon, sabab yana utusomumo.

¹² Inai ponikai tukon mupinotina, mau yana tamamu utuso kai tinamu utuso.

¹⁴Inai ponikai komu pinatama naboloki sabab yanakai mupinotina.

¹⁵ Inai moponikai tukon mumonianan napau

¹⁶ kai tukon utusomu langgongo naboloki.

¹⁷ Inai moponikai tukon mupau kai tumbu doi meeng koboine ikoo mogauliyo. Baanggokai yanila mupomanaanggonan, tukon doiya kokubai moaki namonondok.

¹⁸Inai pokila tukon muboloki utuso kalu komu boloki susuungo daano motubo.

¹⁹ Inai ponikai tukon meeng koboine kalu daanoon mobolokon, sabab yana konandondoong lokis.

²⁰ Inai ponikai tukon mian bailon naboloki; dokokubaidoo tealikene ikoo lokis.

²¹ Inai mobeekene komeeng komupau teali sosubakon doi manggaalan Molokh, sabab dokokubaidoo totulaiyo ko Mian Bisa sambuno, mu TEMENENO.

²² Komala-malane aki namoola ponikai tukon tulano malane; Mian Bisa mosikitene doiya kokubaidoo.

²³ Mala-malane maukai boine, aki namoola tuuno ponikai tukon iyayon: doiya kokubaidoo kulokisene komuyu.

²⁴Inai pokulokisene kobutomuyu tukon dokokubai-kokubaidoo, sabab tukon dokokubaidoo komian-mian mo dungol doi Kanaan moakiyoon polubat lapamo yanila kulokisene kobutongoila. Tobikon doiya ko TEMENENO siikayomo yanila, sulano pomoola dungoliyo dolipudoo.

²⁵Yanila lakukenemo sasaibino kokokubai mominosikitonoo tobikon konapoo tano teali lokis. Tobikon doiya ko TEMENENO ukumemo yanila tukon aki napataikene yanila modungol imbali. Bai komuyu inai polakukene dokokubai-kokubaidoo. Komuyu sasaibino, Israel miano tukon mian lubat mo podungoli komuyu, sio poloingiyo koaturan tukon ko TEMENENO naparentah,

²⁸sulano naaki poinukum tukon siniika luwedoi tanodoo buno mian badaang mo aki natingoniiyo ko TEMENENO, mo dungol imbali moakiyoon nadaano komuyu.

²⁹Komuyu toiyo baikon indee komiano komo lakukene kokokubai mo minosikiton, akimo koidan nainaanggon Mian Bisa Namian.

³⁰Maka ko TEMENENO bantilemo, “Poloingiyomo koaturan-aturan Yaku mobeekenemo komuyu tukon inai pomololoi mian badaang nakokubai modungoliyo kotano Kanaan moakiyoon nadaano komuyu. Inai mokulokisanggene kobutomu susuumu tukon lakukanggene dokokubai-kokubaidoo. Yaku ko TEMENENO mu Mian Bisa.”