Read Banggai BASAMBUAN 19 Bible Online

BASAMBUAN 19 - Banggai bible

BASAMBUAN 19

¹TEMENENO sumboliiyo doi Musa

² mopelenggene doi Israel miano naparentah nia, “Siokai pomoliyous, sabab Yaku TEMENENO mu Mian Bisa moliyous tuuno.

³ Sasamba komian sio naodotiiyo kotamano kotinano tukon lamekene kooloyo Tadean buno Daku pinarentakon. Yakumo ko TEMENENO mu Mian Bisa.

⁴ Inai mososubaiyo kopilogot. Inai mokubaiyo kotimbalang mo luwedoi logam tukon sosubaiyo. Yakumo ko TEMENENO mu Mian Bisa.

⁵Kalu komuyu mososubakon iyayon moteali sosubakon podamean, loingiyo koaturan-aturan Kubineekon, sulano dososubakonoo Yaku talimayo.

⁶Kosailo sio nakinaan doi oloyonodoo doiyayonoo natinembelan kai modoakon kooloyono. Dosailoo labino sio nasinua kabus doi oloyo kotoluno,

⁷sabab dosailoo aki naminoolakon kinaan. Kalu dosailoo kinaano, dososubakonoo aki Kutalimayo.

⁸Indee komiano komo kaane dosailoo yana salamo sabab aki naanggayo oila komo sinadiakon tuuk doi Yaku. Mianoo akimo koidan Kuanggene Dakumian.

⁹ Kalu komuyu bapadak, inaimo popatele kogandum mo tubo doi poasi-asi bibilo, tukon inai koidan popototongikene kogandum labino molapa pinete.

¹⁰Inai poabali doi muanggur asino tukon pototongikene koanggur sao-saono mototinggal doi pobapeteanoo tumbeno. Tukon kosao-saono molapamo otuwong inai populute. Batadikenemo doiya tuuk doi mian motalalais tukon mian molulubaton naalayo. Yakumokai kopoo TEMENENO, mu Mian Bisa.

¹¹ Inai pondikuk, bangakakon kai bakaakala.

¹² Inai moberjanji tukon Kosambunggu kalu komuyu akiyo kopoo maksud motapaatiyo do dandidoo, sabab tukon doiya komuyu totulaiyo Kosambunggu. Yakumo ko TEMENENO mu Mian Bisa.

¹³ Inai molailainggene kotulamu kai lambase kona lobo. Memeeng komian mo balimang doikoo inai motaane konatambo, mau natongo meeng kopopook tolong.

¹⁴ Inai mokutukiyo komian mobongol tukon inai momangabos batu takaitan doi mianoo mopiit salaano. Siokai poodotiiya-Ku tukon pomatakutanaku, sabab Yaku TEMENENO mu Mian Bisa.

¹⁵ Sio namoloyos konoamuyu kalu komuyu mangadili inai poala doi mian mo talalais tukon inai pomatakutene komian mokaasa.

¹⁶Inai popotaamikene koloobu (pitanaa) doi mian-mian mopokakana komu bangsa, sulano naaki pomangaanikene koutusomuyu namatean, Yakumo ko TEMENENO.

¹⁷ Inai poabos noa mau doi indeemo komiano. Alapusemo koponggimakonan tukon indeemo komiano, sulano naaki pobaladosa sabab mian bailon.

¹⁸ Inai mobalese kopoabosan noa tukon inai mosikitene komian bailon, bai seseange kotulamu pokakana komuyu moseange kobutomuyu susuungo. Yakumokai ko TEMENENO.

¹⁹ Loingiyomo daku parenta-parenta. Inai mo poubaikene koiyayon mo posasala kokaliangano. Inai momasakakon lua kokaliangano kolibuang doimeeng komubuta tambuno. Inai mopakeo kopakean motinonun luwedoi lua kobanang kaliangano.

²⁰Kalukai daano komeeng komala-malane mo paladandi naikon mo balukene konaata moluko doi mala-malane bailon sulano natealikene boloki piala, tukon domianoo moiyase oliyo doatadoo yana akiyoon nabeale, maka domo totooliyodoo tumbeno ponikai tukon doatadoo, yanila luaila sio nainukum, bai aki namoola inukum mate, sabab mau nabulaandomokai boinedoo daanoonkai naata.

²¹Domala-malanedoo sio namababa meeng kodomba langgilo doi Kusandung tataapono salaano nateali sosubakon posoboli lugi.

²²Imam sio nasosubakene dodombadoo doi upacara bakiliyousianoo, sulano natinolos domianoo nalalim. Maka Yaku, Mian Bisa ompuniyomo yana.

²³Kalukai komuyu usoko doi lipu Kanaan tukon masakakon moisalomo kokayung sao-saono imbali, maka kalu tolumo kotaun konakalumbit kosao-saono tumbeno sio poaanggene pinatanggon tukon aki namoola komuyu kaane.

²⁴Doi taun kosanggapo sasaibino kosaono sio pososubakene sabab doiya komuyu okitakene kopobakinatauwanan doi Yaku, TEMENENO.

²⁵Doi taun kolimano maka nasodo pokaane kosaono Kalu komuyu lakukene sasaibino doaturanoo, komu kayung batango mo sao naikon koidan lobian badaang kosaono. Yakumokai ko TEMENENO mu Mian Bisa.

²⁶ Inai mokaane kosau. Inai mopakeo komotoiyan mo minasaindinggon.

²⁷ Inai moguntinge komubuuk doi olumu bibilo, kai daluwo kopoosimbil.

²⁸Inai potulisiyo kokulitomuyu nateali palo-paloosan kai pokolonoiyo kobutomuyu buno paloosan luwedoi mian mo mate. Yakumokai ko TEMENENO.

²⁹ Inai moekependeo komupau-pau boineno natuboan tukon komuyu tealikene yanila mian mobalolowa doi bonua bapilogotan. Tukon kalu komuyu kubaiyo bunodoiya komuyu kubaiyo kulokis kopoolipu, tukon kokubai-kokubai moaki napokokonoi naikon tasabul idoo.

³⁰ Lamekene mokai kooloyo Tadean tukon poodotiiyomo kotampat mo sinadiakon tuuk pososubaiyano Yaku. Yakumo ko TEMENENO.

³¹ Inai motaus manggabi otinau doi tolosupa momakabai potaamian tukon mian mate malaikatto. Kalu komuyu lakukene doiya komuyu teali lokis. Yakumo ko TEMENENO mu Mian Bisa.

³²Pomatakutene tukon poodotiiyo komian mo motuamo. Komuyu siokai poodotiiya-Ku tukon matakutana-Ku, sabab Yakumokai ko TEMENENO.

³³ Inai pomokubai kokubai moaki namonondok doi mian molulubaton modungol doi mulipu.

³⁴Popalentayomo yanila buno kopoo palentaano komian mopokakana komubangsa tukon seseange yanila buno komuyu moseseange ko butomuyu susuungo poneneeke baikon komuyukai biasamo tubo salaku mian molulubaton doi Mesir. Yakumo ko TEMENENO mu Mian Bisa.

³⁵ Inai mokokoliiyo komian bailon tukon mapake ukulan, timbangan kai batakalan mo sala.

³⁶Popakeyomo kometer, timbangan tukon batakalan mokana. Yakumo ko TEMENENO, mu Mian Bisa, tukon Yaku lapamo babayo komuyu tobuat luwedoi Mesir.

³⁷Poloingiyomo sasaibino kohukum tukon koparentah. Yakumo ko TEMENENO.”