Read Banggai BASAMBUAN 2 Bible Online

BASAMBUAN 2 - Banggai bible

BASAMBUAN 2

¹Kalu daano komeeng komian momososubakon sosubakon mokinaan doi TEMENENO, dososubakonoo sio tarigu mo monondok tuuno mokinundongii zaitun lisisono tukon binee kamangian doi bunggono.

²Yana sio nababayo doi imam-imam Harun nakatulunan. Imam mobalimang sio namangala songguman dotarigudoo tukon ko zaitun lisisono tukon sasaibino kona kamangian, maka nasuayo doi balabaan bunggono salaku paloosan baikon sasaibino lapamo sinosubakon doi TEMENENO. Dososubakonoo mokinaan boono sanaanggene ko TEMENENO noano.

³Kososubakon mosinidak labino bineekon doi sasaibino koimam. Dososubakonoo moliyous tuuno sabab inala luwedoi kinaan molapamo sinosubakon doi TEMENENO.

⁴Kalu domo sinosubakonoo roti mosinua doi mosuaan roti balabaan lalomo, dorotidoo sio nakinubai akiyo koragino. Dorotidoo sio nabondolong, kinubai luwedoi tarigu adonano moalus tukon zaitun lisisono, moola koidan sinanga motongo sinoutikon ko zaitun lisisono.

⁵Kalu domo sinosubakonoo roti molinalas doi bala bunggono, dorotidoo sio nakinubai luwedoi tarigu moalus tukon zaitun lisisono, bai aki napake ragi.

⁶Dorotidoo mosinosubakon sio nabinata-batai, tukon kinundongii zaitun lisisono.

⁷Kalu domo sinosubakonoo roti mosinaang doi balanga lalomo, dorotidoo sio nakinubai luwedoi tarigu moalus tukon zaitun lisisono.

⁸Roti mokinubai tukon cara doiya, sio nasinosubakon doi TEMENENO tukon sinalakanggon doi imam mo babayo doi balabaan.

⁹Imam mangala soobos luwedoi rotidoo maka nasuayo doi balabaan bunggono salaku paloosan baikon sasaibino lapamo sinosubakon doi TEMENENO. Koboono sanaanggene ko TEMENENO noano.

¹⁰Kolabino bineekon doi sasaibino koimam. Dorotidoo moliyous tuuno tobikon inala luwedoi kinaan molapamo sinosubakon doi TEMENENO.

¹¹Sosubakon kinaan motuuk doi TEMENENO aki namoola sinambul tukon dokot kai ragi, sabab kodokot tukon ragi aki namoola nasinua tuuk sosubakon doi TEMENENO.

¹²Luwedoi butadoo hasilo tumbeno samba kotaun, sio nasinosubakon kosoobos doi TEMENENO, bai aki namoola sinua doi balabaan bunggono.

¹³Samba kososubakon kinaan sio natinimusoni, sabab dotimusonoo doiyamo kopaloosano ko Mian Bisa naperjanjian tukon komuyu. Jadi sasaibino kososubakon sio nabinee timuson.

¹⁴Kalu komuyu mososubakon doi TEMENENO kogandum tumbeno komuyu mopupuiyo, babayomo kogandum mosoodo molapamo tinumbuk alus kai linalas.

¹⁵Gandumoo sio nakinundongii zaitun lisisono tukon binee kamangian doi bunggono.

¹⁶Imam sio nasuayo kosoobos luwedoi gandum tukon dolisisonoo tukon sasaibino kokamangian, salaku paloosan baikon sasaibinomo lapamo sinosubakon doi TEMENENO.