Read Banggai BASAMBUAN 20 Bible Online

BASAMBUAN 20 - Banggai bible

BASAMBUAN 20

¹TEMENENO sumboliiyo Musa

²nabantile nalanggenia doi bangsa Israel, “Sasamba komian doi antara komuyu kai mian molulubaton motataapo doi antara komuyu mososubakene konapau doi Molokh, sio nasasaibino korayat nasokuliyo tukon batu polong pomatekon.

³Mian mososubakene konapau doi Molokh kulokisene Daku Sandung tukon totulaiyo Kosambunggu mo moliyous. Yana naikon Yaku ukume tukon akimo koidan Kuanggene Kumian.

⁴Kalu masarakat piite komatano tuuk doimianoo nakokubai tukon aki naukume mate,

⁵maka Yaku susuunggu komo ukume yana, sasaibino kona kaluarga, tukon sasaibino komian mo polaing yana mo tinggale Yaku tukon sosubaiyo ko Molokh. Yanila akimo koidan Kuaanggene Kumian.

⁶Mian mo taus manggabi otunggul doi talapu mokubaiyo konapotaamian tukon mian mo mate malaikatto Yaku ukume tukon aki Kuaanggene koidan Kumian.

⁷Dagaiyo sulano potataap moliyous, sabab Yaku TEMENENO mu Mian Bisa.

⁸Loingiyomo Daku hukum, sabab Yakumo ko TEMENENO molilike komuyu tuuk Yaku.”

⁹ TEMENENO beekene naaturan-aturan nia, “Mian mo batambikene kotamano kai tinano sio nainukum mate. Yana mate sabab nasalah susuungo.

¹⁰ Kalukai meeng ko Israel miano pololoai tukon mian naboloki mo pokakana kona bangsa, yana tukon boinedoo sio nainukum mate.

¹¹ Meeng komala-malane mopokooloi tukon tamano naboloki, lailainggene kotamano nahak. Domala-malanedoo tukon boinedoo sio nainukum mate. Yanila mate sabab yanila nasalah susuungo.

¹² Kalukai meeng komala-malane pokoloi tukon namonianan moluko, luaila domianoo sio nainukum mate. Yanila lapamo pololoai, tukon mate sabab yanila nasalah susuungo.

¹³ Kalukai meeng komala-malane pokoloi tukon mala-malane bailon yanila kubaiyo kokokubai mo manggilit tukon mokulokis, tukon domo luailadoo sio nainukum mate. Yanila mate sabab nasalah susuungo.

¹⁴ Kalukai meeng komala-malane tanggalabanggene koboine meeng tukon tinano, toluiladoo sio nasinua pomatekon, sabab yanila lakukene kokakabai mo aki napokokonoi ko TEMENENO namongiasan. Kokokubai mo buno doiya aki namoola daano doi antara komuyu.

¹⁵ Kalukai meeng komala-malane pokoloi tukon iyayon, domianoo tukon doiyayonoo sio nainakate.

¹⁶Kalukai meeng koboine pokoloi tukon iyayon, boinedoo tukon doiyayonoo sio nainakate. Yanila mate sabab yanila nasalah susuungo.

¹⁷ Kalukai meeng komala-malane pokoloi tukon utuso moluko kai tukon utuso moluko momeeng kotama bai tina bailon kai meeng kotina bai sangalaasan kotamano yanila akimo koidan nainaanggon Kumian yanila lapamo lakukanggene kokokubai moaki namonondok tukon sio natanggunge kobalino.

¹⁸ Kalukai meeng komala-malane pokoloi tukon meeng koboine modaano mobolokon, yanila akimo koidan nainaanggon kumian.

¹⁹ Kalukai meeng komala-malane pokoloi tukon tinano utuso, domoluailadoo sio natanggunge kobalino luwedoi kokubaidoo.

²⁰Kalukai meeng komala-malane pokoloi tukon napinatama naboloki, yana akamaayo konapinatama. Mala-malane tukon boinedoo sio natanggunge koukumano. Pomatekon yanila aki namalaat pau.

²¹ Kalukai meeng komala-malane lambase koutuso naboloki, yana akamaayo koutuso tukon lakukanggene kokubai moaki napokokonoi. Pomatekon yanila aki namalaat pau.”

²²TEMENENO bantile, “Loingiyo sasaibino kohukum tukon Kuparentah sulano naaki posiniika luwedoi tano Kanaan, sabab indaamo Daku babaano komuyu.

²³Inai mololoi bangsa mo dungol imbali naadat-adat. Yanila mangaanikene Yaku maalinggene tukon sasaibino konapoo kokubai mo lokis. Doiyamo kosababpo Yaku siikayo yanila, sulano pomoola usok doilipudoo.

²⁴Buta mokaasa tukon molumbangoo lapamo Kupaladandikene doi komuyu, jadi Yaku beekene doi komuyu teali polipu. Yakumo komu TEMENENO mu Mian Bisa moalaase komuyu luwedoi bangsa-bangsa bailon.

²⁵Tobikon doiya komuyu sio poposasalakene koiyayon mominoolakon tukon iyayon moaki naminoolakon. Doiyayonoo Yaku nyatakanggene akimo namoola kinaan, jadi kalu komuyu kaane komuyu teali lokis.

²⁶Kualaase komuyu luwedoi bangsa-bangsa bailon sulano nateali Kumian. Komuyu sio pomoliyous sabab Yakumo ko TEMENENO, tukon Yaku moliyous.

²⁷Samba-samba komala-malane kai boine momokubai potaamian tukon mian mate malaikatto sio nasinokuli batu pomatekon. Domianoo mate sabab nasalah susuungo.”