Read Banggai BASAMBUAN 21 Bible Online

BASAMBUAN 21 - Banggai bible

BASAMBUAN 21

¹TEMENENO sumboliiyo Musa mopelenggene naparentah nia doi imam-imam Harun nakatulunan, “Meeng koimam aki namoola kulokisene kobutongo sabab namalaingan doi natinadinan kopulino,

²alaasene kalu domo matedoo tinano, tamano, napau, utuso mala-malane,

³kai utuso moluko mo akiyoon naosowaan, tukon mopodungoli yana.

⁴Yana aki namoola kulokisene kobutongo tukon namalaingan doi naboloki namotolutusan nakinibulan.

⁵ Meeng koimam aki namoola daluwo kooluno sembeleng tukon aki namoola daliyo kona simbil kai pokoloniyo kobutongo tukon lobo mo mamangan tuuk motudoikene baikon yana daanoon mopoloonggene.

⁶Yana tealimo Kumian inalaas tukon aki namoola Kulokisene Kosambunggu. Yana sosubakene kososubakon kinaan doiya-Ku, jadi yana sio namoliyous.

⁷Meeng koimam aki namoola osowaan tukon meeng koboine mo balolowa kai meeng koboine mokinooloimo, kai mopotinggalo, sabab doimammoo koonggu.

⁸Kobangsa Israel sio naakuiyo koimam salaku mian mo inalaas tuuk doiya-Ku sabab yana sosubakene kososubakon mokinaan doiya-Ku. Yakumo ko TEMENENO; Yaku nia moliyous tukon Yaku koliyousiyo Daku umat.

⁹Kalu meeng koimam napau boine balolowamo, yana totulaiyo kotamano tukon sio nasinua pomatekon.

¹⁰Imam Babasal lapamo natinahbiskanggon tukon nakinundongiikonan kolisison bakolobokian doi oluno bunggono tukon pinekeikon koimam babasal napakean doi yana. Tobikon doiya yana aki namoola sodiikene nasunggal konabuuk kai siake konapakean salaku tanda poloonan.

¹¹Yana lapamo sinosubakon doiya-Ku sulano nateali Kumilik, jadi aki namoola kulokisene kobutongo. Yana aki namoola koidan kulokisanggene Daku Sandung tukon tobuat luwe idoo maka nausok doi bonua mo daano kobajan, maukai doiya tamano bajano kai tinano susuungo.

¹³Yana tolongo moola osowaan tukon meeng koboine moakiyoon nakinooloi mo luwedoi nabenseno susuungo. Yana aki namoola osowaan tukon meeng kobauntal kai meeng koboine molapamo tininggal, kai meeng koboine mo balolowamo.

¹⁵Kalu yana lupaiyo doaturanoo, maka kona pau-pau mo siokai namoliyous, naikon lokis. Yakumo ko TEMENENO tukon Yaku lapamo sadiakene yana teali Imam Babasal.”

¹⁶TEMENENO parentayo Musa

¹⁷sulano nabontiikene naiya doi Harun, “Meeng komian doi muturunan moseselon kobutongo aki namoola mososubakon sosubakon kinaan doiya-Ku. Doiya tapake tuuk sidutu-posidutukon.

¹⁸Mian mo mososubakon sosubakon aki namoola sasaton kobutongo, buno mian mo piit kai lemat, mian mo seselon koduduso kai butongo lolongguno bailon,

¹⁹mo lemat kolimano kai pelong koaino,

²⁰mo mabunggut kai pepende tuuno moseselon komatano kai mo seselon kolulito tukon motinokui.

²¹Sasamba koimam Harun naturunan mosasaton kobutongo aki namoola mososubakon sosubakon mokinaan doiya-Ku.

²²Bai yana moola makaan kinaan mo sinosubakon mau sosubakon kinaan mo moliyous maukai sosubakon kinaan mo moliyous tuuno.

²³Tobikon domianoo nasasatonan kobutongo, yana aki namoola koolaniyo kolalanse mo poalaasene ko Kombiang Moliyous kai balabaan. Yana aki namoola kulokisanggene kolangge-langge mo lapamo sinadiakon tuuk Yaku, sabab Yakumo ko TEMENENO, tukon Yakumo komo sadiakene dololonggu-lolonggudoo.”

²⁴Doiyamo koaturan-aturan Musa mo pelenggene doi Harun tukon napau-pau, tukon doi sasaibino kobangsa Israel.