Read Banggai BASAMBUAN 22 Bible Online

BASAMBUAN 22 - Banggai bible

BASAMBUAN 22

¹TEMENENO sumboliiyo Musa

²napelenggene naparentahnia doi Harun tokon napau-pau, “Lakukenemo tukon nakanaan oila komo bangsa Israel nasinosubakon motuuk doiya-Ku, sulano naaki polokis-lokise Kosambunggu mo moliyous. Yakumo ko TEMENENO.

³Kalu meeng komian moluwe doi muturunan mokulokis kondondoongo maka nakoolaniyo kososubakon-sosubakon mo moliyous bangsa Israel moalaase doiya-Ku, yana aki namoola koidan momeleleani doi balabaan. Doaturanoo tapake tuuk sidutu-posidutukon. Yakumo ko TEMENENO.

⁴Meeng komian Harun natulunan mo kanakon sesel kulit moosilakayo komian kai moseselon konamaa maka naseselet konanano, yana pinatan momakaan sosubakon moliyous kalu yana akiyoon nainatakanggon bilisii. Meeng koimam teali lokis kalu yana singgile kolobo meeng mokulokis sabab kanakon bunut. Yana koidan lokis kalu konamani tobuat,

⁵kai singgile koiyayon kai mian molokis.

⁶Meeng koimam motukon kokubai oilamo teali lokis, tataap lokis polong sopok kooloyo. Tukon kalu sosoopo kooloyo yana akiyoon namoola makaan kinaan mosinosubakon doi TEMENENO kalu yana akiyoon namasau.

⁷Kalu sosoopo kooloyo yana bilisiimo tukon moolamo namakaan, sabab doiyamo konandemel.

⁸Yana pinatan mokaane koiyayon mo mate susuungo sailo kai doiya mate iyayon mobarani komo sokuwo. Kalu yana kaane, yana teali lokis. Yakumo ko TEMENENO.

⁹Sasaibino koimam sio naloingiyo koaturan-aturan Yaku mobeekene. Kalu aki yanila salamo tukon naikon mate, sabab lumbaiyomo koaturan-aturan mo moliyousoo. Yakumo ko TEMENENO tukon Yakukai komo alaase yanila teali Kumian.

¹⁰Sosubakon mosinadiakon doiya-Ku tolongo doimamoo nakalualga susuungo komo kaane. Komian bailon aki namoola, maukai domianoo napoodungoli meeng kobonua tukon doimamoo kai namian tinambo.

¹¹Bai koata-ata imam mooliyo tukon nadoy susuungo kai mo sinuung doi bonuadoo lalomo, moola nakaane kokinaan imam naobos.

¹²Meeng koimam napau moluko moosowaan tukon meeng komian mo bolikon imam aki namoola makaan dososubakonoo.

¹³Bai koimam napau boine mo balumo kai mo binauntalo tukon akiyo konapau maka naabali doi tamano nabonua maka teali natanggungan, moola makaan tamano naobos. Tolongo imam nakuluargakai komo moola makaan dososubakonoo.

¹⁴Kalu meeng komian mo bolikon imam nakaluarga anggotano tukon yana aki sangajaiyo mokaane kokinaan mosinosubakon doi TEMENENO, yana sio nabeale koposobolino doi imam sinuungi tukon lua kolono kopalaseeng.

¹⁵Imam aki namoola kulokisanggene kososubakon motasadia tuuk Yaku,

¹⁶tukon tongo nabatadikene nakinaan doi meeng komian mo akiyo konahak momakaan. Dolanggedoo tealikene domianoo salah tukon lubatene koukuman doi yana. Yakumo ko TEMENENO, tukon Yakumo komo koliyousiyo dososubakonoo.”

¹⁷TEMENENO sumboliiyo Musa

¹⁸mobeekene doi Harun, konapau-pau tukon sasaibino kobangsa Israel naaturan-aturan nia. Kalukai meeng ko Israel miano kai meeng komian molulubaton modungol tataap doi Israel, kalu yana mososubakon-sosubakon mosinua tuuk pobeal naniat, kai sosubakon mopokokonoi kona mongiasan doiyayonoo sio molanggilo tukon moakiyo konasesel, sulano namoola tinalima.

²⁰ Inai mososubakene koiyayon moano kona sinosiboliian, sabab ko TEMENENO aki naiyase motalimayo.

²¹Kalu meeng komian mososubakon doi TEMENENO sosubakon podamean tuuk mobeale konaniat kai tuuk sosubakon mopokokonoi kona mongiasan, doiyayonoo sio moakiyo kona sinosiboliian, sulano namoola tinalima.

²²Inaikai pomososubakon doi TEMENENO iyayon mopiit, mo moloto kobukuno kai mo dedenggon, modaano konabisul mo nanaon, kai moseselon kokulito kai motakatolon. Iyayon mobuno doiya inai pososubakene teali sosubakon mokinaan doi balabaan bunggono.

²³Tuuk sosubakon pokokonoi kona mongiasan komuyu moola sosubakene koiyayon moaki natalakana kondondoongo; bai tuuk doi babealan niat, iyayon mo bunodoiya aki natinalima.

²⁴Inai mososubakene doi TEMENENO koiyayon mo manas kobeauno motodopit, pinatol, pakolon mo boowan, kai moinaison. Dolanggedoo aki namoola teali doi mulipu.

²⁵Koiyayon molinaat luwedoi mian molulubaton aki namoola sinosubakon teali sosubakon mokinaan. Doiyayonoo inaanggon seselon tukon aki natinalima.

²⁶Kosaapi napau, domba napau kai mbembe napau mosodo sinuung sio nadungol doi tinano pitu kooloyo konakalumbit. Kalu lapamo doiya doiyayonoo tinalimamo teali sosubakon mokinaan.

²⁸Inai mososubakene kosaapi tinano kai domba kai mbembe polaing tukon napau doi oloyo mo pokakana.

²⁹Kalukai komuyu mososubakon sosubakon sukuul doi TEMENENO, lakukene doiya mololoi aturan, sulano komu sosubakon natinalima.

³⁰Pokaanemokai dososubakonoo doi oloyodoo koidan, tukon inai momongotinggal mau tongo soisik tuuk doi modoakon kooloyo.

³¹TEMENENO bantile, “Loingiyo daku parenta-parenta; Yakumo ko TEMENENO.

³²Inai mokulokisanggene Kosambunggu mo moliyous. Sasaibino kobangsa Israel sio sosuba doi Yaku salaku Mo Moliyous. Yakumo ko TEMENENO tukon Yaku tealikene komuyu moliyous.

³³Yaku babayo komuyu tobuat luwedoi Mesir, sulano Kuteali mu Mian Bisa. Yakumokai ko TEMENENO.”