Read Banggai BASAMBUAN 23 Bible Online

BASAMBUAN 23 - Banggai bible

BASAMBUAN 23

¹TEMENENO beekene doi Musa

²tentang koaturan-aturan baagamaan lamekanano, mo sio napinopitoikon salaku oloyo mobabasal tuuk doi bakaledaan.

³ Daano noom kooloyo tuuk balimangan, bai oloyo kopituno, oloyo Tadean, daanoon oloyo tadean TEMENENO mosadiakene. Doi oloyodoo komuyu sio pokubaiyo kopososuungan sulano pobakaleda tukon aki namoola pobalimang.

⁴Naiyamo kooloyo-oloyo babasal TEMENENO motantukanggene tukon mo sio napinopitoikon doi tempo motinantukanggon.

⁵ Paskah Oloyono Babasal molinamekon tuuk odotiiyano ko TEMENENO, tambuun doi oloyo nasopokan doi tanggal songulo sanggap bituwon komeengo.

⁶ Namodoakon tanggal songulo lima, tinambuuno kolamekanano ko Roti moakiyo Koragino, tukon pitu kooloyo konakalumbit komuyu aki namoola makaan roti mokinubai inobosi ragi.

⁷Pitu kooloyo konakalumbitoo komuyu sio pomososubakon sosubakon mokinaan doi TEMENENO. Doi oloyo tumbeno tukon kopituno dolameanoo sio pokubaiyo kopososuungan sulano pobakaleda tukon aki namoola pobalimang babalat.

⁹Kalu komuyu polongo doi TEMENENO nalipu bineekon doi komuyu, tukon popototongikene kobuta hasilo, gandum puuto tumbeno komuyu mo padake sio pobabayo doi imam.

¹¹Doi oloyo salataa lapa kooloyo Tadean, imam sio nasosubakene dogandumoo salaku sosubakon potudoikon doi TEMENENO, sulano ko TEMENENO nasanaang doi komuyu.

¹²Doi oloyo pososubakanano dogandumoo, komuyu sio pomososubakon koidan komo tuuk doi sosubakon mosinua meeng kodomba napau langgilo konaumur meeng kotaun tukon akiyo konasesel.

¹³Tuuk sosubakon mo kinaan pomososubakonkai lua kokilogram kotarigu mo sinambul zaitun lisisono. Dososubakonoo boono sanaanggene ko TEMENENO noano. Polaing doiya sosubakenemokai koidan komeeng koliter koanggur paisuno.

¹⁴Kalu akiyoon pobabayo dososubakonoo doi TEMENENO, komuyu akiyoon namoola pomakaan mau natongo kai soisik luwedoi gandumoo moboolu, mau namata, mo linalas kai sinua teali roti. Doaturanoo sio nasasaibino komuturunan naloingiyo tuuk sidutu-posidutukon.

¹⁵ Tambuun doi oloyo salataa lapa kooloyo Tadean, doi tempo pososubakanano doi TEMENENO kogandum puuto tumbeno, komuyu sio poaite doi pitu kominggu lalomo.

¹⁶Doi oloyo kolimakolono, doiyamo oloyo nalapaan kooloyo Tadean kopituno, komuyu sio pomababa sosubakon mokinaan doi TEMENENO.

¹⁷Sasamba kokaluarga sio namososubakon lua koroti teali sosubakon potudoikon ko TEMENENO. Sasamba koroti sio nakinubai luwedoi lua kokilogram kotarigu mo alus inobosi lagi tukon sio nabineekon doi TEMENENO salaku sosubakon buta hasilo tumbeno.

¹⁸Pinosinggaton tukon dorotidoo kobangsa Israel sio namososubakon pitu kodomba napau konaumur meeng kotaun, meeng kosaapi langgilo mongula tukon lua kombembe. Suwe-suwele aki namoola daano konasesel tukon sio nasinosubakon teali sosubakon mosinua tuuk doi TEMENENO, tukon sosubakon kinaan tukon sosubakon anggur paisuno. Dososubakonoo boono sanaanggene ko TEMENENO noano.

¹⁹Pososubakenemokai koidan komeeng kombembe langgilo tuuk sosubakon potolos lalim tukon lua kodomba langgilo konaumur meeng kotaun tuuk sosubakon podamean.

²⁰Loti tukon dombadoo napau lua sio imam nasosubakene salaku sosubakon potudoikon tuuk doi TEMENENO tukon doiya teali imam naobos. Dososubakon-sosubakonoo daanokai moliyous.

²¹Doi oloyodoo komuyu sio pokubaiyo kopososuungan tuuk mobakaleda tukon aki namoola polakukene kolimang mo babalat. Doaturanoo sio mukatulunan naloingiyo tuuk sidutu-posidutukon, doi yaandomo yanila nadungolan.

²² Kalu komuyu padak, inaimokai popatele kogandum motubo doi muasi bibilo tukon inai moabali koidan mopototongikene kogandum labino mototinggal salataa lapa padak. Doiya labinodoo beekenemo doi mian mo talalais tukon mian molulubaton. Ko TEMENENO doiyamokai mu Mian Bisa.

²³Doi tanggal komeengo bituwon kopituno sio nalinamekon salaku oloyo mo sinadiakon tuuk potadean. Dooloyodoo binee paloosan tukon trompet alalo, tukon komuyu sio pomokubai pososuungan sulano pobakaleda.

²⁵Pososubakenemo kososubakon mokinaan doi TEMENENO tukon inaimo pobalimang mo babalat doi oloyodoo.

²⁶ Tanggal songulo bitowun kopituno daanokai oloyo bakolobokian sasamba kotaun tuuk doi bangsa Israel nalalim natinolosan. Doi oloyodoo sio pobaapata tukon pomokubai pososuungan sulano pobakaleda tukon pomososubakon sosubakon mokinaan doi TEMENENO.

²⁸Inaimo balimang, sabab dooloyodoo daanokai oloyo lalim natinolosan sulano pomalaat ampun doi TEMENENO mu Mian Bisa salaano.

²⁹Indee komiano komo makaan meeng kolobo doi oloyodoo, akimo koidan nainaanggon Mian Bisa namian.

³⁰Tukon indee komiano komo balimang doi oloyodoo, TEMENENO susuungo ukume tukon ukuman mate.

³¹Doaturanoo pinake doi sasaibino komuturunan doi yaandomo tolong konapoo dungolan.

³²Tambuun luwedoi tempo oloyo nasosoopan doi tanggal kosiono dobituwonoo polong doi tempo nasopokan kooloyo doi tanggal kosongulono, sio polamekene buno oloyo Tadean, oloyo mo sinadiakon tuuk potadean. Doi oloyodoo lalomo komuyu sio poapata.

³³ Ko Sandung moinalatoi Loon Lameano tinambuun doi tanggal songulo lima bituwon kopituno pitu kooloyo konakalumbit.

³⁵Doi pitu kooloyodoo konakalumbit, sasamba kooloyo komuyu sio pomososubakon sosubakon mokinaan. Doi oloyo komeengo tukon koaluno komuyu sio pomokubai pososuungan sulano pobakaleda tukon pomososubakon sosubakon mokinaan doi TEMENENO. Inaimokai pobalimang mo babalat doi oloyodoo.

³⁷Doiyamo koagama oloyo-oloyono mobabasal TEMENENO motataapkanggene tukon sio popopitoikene. Doi lamean-lameanoo komuyu sio poodotiiyo ko TEMENENO tukon pokubaiyo kopososuungan sulano pobakaleda tukon mososubakon sosubakon mokinaan, sosubakon mosinua, sosubakon mosinidak, sosubakon iyayon tukon sosubakon anggur paisuno, konakadaang mopinalaluu sasamba kooloyo.

³⁸Dolame-lameanoo bunokai posuungino doi oloyo-oloyo Tadean biasa, dososubakon-sosubakonoo daanokai koidan posuungi koidan doi musabeat mobiasamo, doi musosubakon tuuk potolos niat, kai sosubakon mobiasa komuyu beekene doi TEMENENO.

³⁹ Kalu lapamo kopadakan, tambuun doi tanggal kosongulono lima bituwon kopituno, komuyu sio pomokubai lamean pitu kooloyo konakalumbit. Oloyo komeengo tukon koaluno daano oloyo mo inalaas tuuk balasanaangan.

⁴⁰Doi oloyo komeengo komuyu sio pomopupui langge sao-saono momonondok tuuno doi muasi, koidan palma loloono tukon luwedoi kayung langa-langaano mo masalimbung, maka tinambuuno kolamean basanaangan tuuk koodotiiyano ko TEMENENO mu Mian Bisa.

⁴¹Dolameanoo sio pobanggadudukene pitu kooloyo konakalumbit. Doaturanoo sio komukatulunan nalakukanggene tuuk sidutu-posidutukon.

⁴²Pitu kooloyo konakalumbit sasaibino ko Bangsa Israel sio nadungol doi sandung-sandung moinalatoi loon lalomo,

⁴³sulano komuturunan natoiyo baikon ko TEMENENO sumboliiyo kobangsa Israel dungol doi sandung lalomo moinalatoi loon mobabanggaal, salataa yana babayo yanila tobuat luwedoi Mesir, yanamokai ko TEMENENO mu Mian Bisa.

⁴⁴Bunomokai doiya Musa napolongganano doi bangsa Israel koaturan-aturan kaliangano komokubaian lamean-lamean tuuk odotiiyano ko TEMENENO.