Read Banggai BASAMBUAN 24 Bible Online

BASAMBUAN 24 - Banggai bible

BASAMBUAN 24

¹TEMENENO sumboliiyo Musa

²nabeekene naparentah-parentah nia doi bangsa Israel: Pobabayomokai kozaitun lisisono motulen tukon mo monondok tuuno doi lampu doi TEMENENO Na Sandung lalomo, sulano namoola natinutung tukon kait momeenggon.

³Harun sio naatule dolampu-lampudoo tambuun kinobian polong dowa-dowa doi TEMENENO natampat daanoan, doi lalanse tonggulungo mosunggupiyo ko Peti Perjanjian doi Kombiang Moliyous tuuno. Dopalentadoo sio nalakukene tuuk sidutu-posidutukon.

⁴Harun sio naulusiyo kolampu-lampu doi lampu aino doi mosoni tulen sulano natataap kait doi TEMENENO Na Sandung lalomo.

⁵ Mangalamo songulolua kokilogram kotarigu mo monondok tuuno tukon mokubaimo songulo lua koroti mo matimbuk, suwe-suwele luwedoi meeng kokilogram kotarigu.

⁶Abese dorotidoo lua kosusuno, noom koroti meeng kosusuno, doi meda bunggono molinapis mosoni tulen mo daano doi TEMENENO Na Sandung lalomo.

⁷Obosiyomo kamangian tulen doi samba koroti susuno doiya paloosano baikon dorotidoo sosubakon kinaan doi TEMENENO.

⁸Sasamba kooloyo Tadean sio nadaano koroti mosinidak doi TEMENENO Na Sandung lalomo. Doiyamo kobangsa Israel nalinakukon tuuk sidutu-posidutukon.

⁹ Dorotidoo daanokai tuuk doi Harun tukon nakatulunan. Yanila sio napokaane doi tampat mo moliyous, sabab dorotidoo bunopokakana obos mo moliyous tuuno luwedoi sosubakon kinaan mosinosubakon doi TEMENENO tuuk doi sasaibino koimam.

¹⁰Doi Israel miano nabasandungan daano komeeng komala-malane. Kotamano Mesir miano tukon kotinano Israel miano kosambuno Selumit, Dibli napau luwedoi Dan nabenseno. Doi meeng kooloyo domianoo pogagai tukon meeng ko Israel miano doi basandungan. Doi tempo napogagaiyan, yana kutuke ko Mian Bisa. Tobikon doiya ko Israel miano daango babayo yana mangadap doi Musa,

¹²tukon taane yana tukon mototiili ko TEMENENO nakaputusan oila kaliangano mo sio yanila lakukene doi yana.

¹³TEMENENO bantile doi Musa,

¹⁴“Babayomo domianoo natobuat doi basandungan. Memeeng komian molapamo lengele yana mokutuke, sio natapiyo domianoo olunoo doiya salaku meeng kosaksian baikon yana salahmo. Maka sasaibino komian sio nasakule yana tukon batu pomatekon.

¹⁵Sambuno lapa doiya popitoikene naiya doi bangsa Israel; Indee komian komo kutuke ko Mian Bisa sio natalimayo kobalino

¹⁶tukon inukum mate. Indee lakon komo kutuke ko TEMENENO sio nasinakul tukon batu pomatekon doi sasaibino ko Jemaat. Doukumanoo pinake doi Israel miano maukai doi mian molulubaton modungolo doi Israel.

¹⁷ Indee komiano komo mangakate mian bailon sio nainukum mate.

¹⁸Indee komiano komo akateyo komian bailon naiyayon sio nasoboliyo. Koalasan doiyamo ‘ansaang sinoboli ansoong’.

¹⁹Kalukai daano komeeng komian mo pokolio komian bailon, oila tolong komo lapamo yana lakukene siokai koidan nailakukon doi yana.

²⁰ Kalu yana lotoyo kobuku, maka kobukuno koidan sio nalinoto. Kalu yana kabaiyo piit kosembeleng komian matano bailon, maka komatanokai sio natinuek kosembeleng. Kalu yana umbase komian bailon sampe moloto kongolingo, maka kongolingokai sio nalinoto. Kalu yana kubaiyo seselon kotulano bailon, sio koidan nalinakukon doi yana salaku pabaloso.

²¹Indee komiano komo akateo koiyayon sio nasoboliyo, bai indee komiano komo mangakate bangkapi sio nainukum mate.

²² Doukumoo pinake tuuk doi komuyu sasaibino tukon koidan tuuk doi mian molulubaton mopodungolimo komuyu, sabab Yakumo ko TEMENENO, mu Mian Bisa.”

²³Sambuno lapa Musa pelenggene dobantilanoo doi bangsa Israel, yanila babayo domianoo molapamo kutuke ko Mian Bisadoo tobuat doi basandungan maka yana sinokuli tukon batu pomatekon. Tukon dokokubaidoo kobangsa Israel lakukenemo oila komo lapamo TEMENENO maparentahkene doi Musa.