Read Banggai BASAMBUAN 25 Bible Online

BASAMBUAN 25 - Banggai bible

BASAMBUAN 25

¹ Doi Sinai Bunggulo ko TEMENENO pobasilingonii tukon Musa tukon sumboliiyo yana

²napelenggene naaturan-aturan nia doi bangsa Israel. Kalukai komuyu usok doi lipu naikon TEMENENO mobeekene doi komuyu, komuyu sio poodotiiyo ko TEMENENO tukon nakokubai nia: Sasamba kotaun kopituno komuyu aki namoola mokubai asi tuuk masakakonan lobo.

³Noom kotaun lalomo komuyu sio posakaiyo kopoo asi-asi, tobosiiyo kopo anggur asi-asino tukon popototongikene komu buta hasilo.

⁴Bai sasamba kotaun kopituno inalaas tuuk doi TEMENENO. Jadi popupuson dotaunoo kobuta sio nabinatadikon tukon aki namoola linimang. Inai mosakaiyo komu asi-asi tukon inai motobosiiyo komu anggur bata-batango.

⁵Tukon kogandum motubo susuungo kai anggur moluwe doi muanggur batango moakiyoon napinatol, aki namoola komuyu pototongikene tukon abese, sabab dotaunoo doiyamo taun tadean doi mokubaiyan asi.

⁶Maukai nabuno doiya, butadoo naikon koidan ano kohasilo tuuk teali pokinaan, muata-ata, doi mumian-mian tinambo, tukon mian badaang molulubaton mo dungol doi komuyu.

⁷Tukon koidan komu iyayon-iyayon piniala tukon iyayon-iyayon mo mbosolo doi mulipu. Sasaibino butadoo hasilo moola nakinaan.

⁸Aitemo pitu luunggon napitu kotaun konakadaang sangkap poloono sio kotaun.

⁹Maka doi tanggal songulo bitowun kopituno, doiyamo oloyo lalim natinolosan, sumboliiyo komian doiyayaa doi sasaibino kolipu napuuke kotrompet.

¹⁰Komuyu sio poalaase kotaun kolima kolonodoo, tukon popopitoikene konatongosodiian doi sasaibino komo dungol doi lipudoo. Doi taunoo lalomo sasaibino kobuat mo lapamo binalukon sio nainabalinggon doi tumbuno mo tumbeno kai doi nakatulunan. Indee komo binalukon salaku ata sio nainabalinggon doi nakaluarga.

¹¹Inaimo mosakaiyo komuasi. Gandum mo tubo susuungo kai anggur saono doi muanggur asino moaki napinotoli aki namoola komuyu pototongikene tukon abese.

¹²Taunoo salaku taun mo moliyous doi komuyu. Komuyu tolongo moola makaan oila komo tubo susuungo doi muasi.

¹³Doi taunoo lalomo sasaibino kobuta molapamo binalukon sio nainabalinggon doi tumbuno tumbeno.

¹⁴Jadi kalu komuyu mabalukon buta doi tulamuyu Israel miano, kai mongoli buta doi yana, inaimo popoboluki tukon aki najujur.

¹⁵Sio poanggaiyo butadoo mololoi taun nakadaang butadoo nakalumbit momoola beena hasil polong doi Taun Bangabalinggonan koidan.

¹⁶Kalu badaang koaito dotaunoo, dona buta olino, maaling. Bai kalu dotaunnoo aito soisik, koanggano sio namamundu, sabab komo binalukon bapadakan hasilo.

¹⁷Inai mokokoliiyo kotulamu Israel miano, bai siokai pomatakutene naikon ko TEMENENO mu Mian Bisa.

¹⁸Loingiyomo sasaibino koukum tukon TEMENENO naparentah, sulano potubo tukon tanaang doilipudoo.

¹⁹Dolipudoo butano naikon beena hasilo sahingga komuyu daano kopo kinaan mo sabe tukon dungol indaa tukon monondok.

²⁰Bai katidoon daano komo masadai oilamo naikon komo kinaan doitaunoo kopituno lalomo doi tempo kobuta akimo nasinakai tukon kohasilo akimo nainala.

²¹Doi taun konoomo lalomo TEMENENO naikon balakaatiyo kobuta tobikon kohasilo sukup tuuk tolu kotaun.

²²Tukon doi tempo posakaiyano kopooasi doi taun koaluno lalomo, bapupuiyan luwedoi taun konoomo daanoon motuuke kopokanan. Tukon koidan komukinaan sinadia naikon sabe polong nalaate kotempono kopo pototongikanano butadoo hasilo.

²³Komubuta aki namoola binalukon tuuk banggadudul, sabab butadoo bolikon koomu, bai Mian Bisa koona. Komuyu tolongo buno mian lubat mo pinataikon namapake butadoo.

²⁴Kalu meeng kobuta tambuno binalukon, sio naakuiyo kotumbuno nahaak tumbeno tuuk nabeale butadoo.

²⁵Kalu meeng ko Israel miano teali talalais sahingga yana pakisaayo mobalukene konabuta, konamotolutusan moloolani tuuno moola nabeale butadoo.

²⁶Kalukai akiyo komian tuuk mobeale bai dotumbunodoo oloyo doibundu moolamo tukon anomo konadoy mosabe tuuk beale konabuta;

²⁷maka yana sio nabeale doi mian molapamo oliyo konabuta tukon inanggai butadoo olino doi taun-taun molapamo pokokonoi butadoo hasilo polong doi taun mangabalinggonan naikon molubat. Tukon buno doiya yana laatemo koidan konabuta.

²⁸Bai kalu yana aki namampu mobeale konabuta, domianoo mooliyo tataap doi yana butadoo polong doi Taun Bangabalinggonan koidan. Doi taunoo lalomo butadoo sio nainabalinggon doi tumbuno tumbeno.

²⁹Kalukai memeeng komian balukene konabonua doi kotadoo lalomo mo pinagar betoon, maka yana moola beale konabonua doi tempo meeng kotaun lalomo tangaito luwedoi tanggal nabalukanano.

³⁰Bai kalu doi tempo momeengoo kotaun lalomo akiyoon nabeale kabusokai konahak tuuk mobeale. Dobonuadoo tataap domianoo mooliyo kotumbuno tukon nakatulunan. Doi Taun Bangabalinggonan lalomo, dobonuadoo akimo nainabalinggon.

³¹Tuuk bonua doi kambung mo aki napinagal potikunggon tukon tembok pinake koaturan mo pokakana tukon buta aturano: Kotumbuno tumbeno daano konahak mobeale tukon dobonuadoo sio nainabalinggon doi Taun Bangabalinggonan lalomo.

³²Bai naikon ko Lewi miano daano konahak mau namalumbit yanila mobeale konabuat doi kota mo tinatapkanggon tuuk doi yanila.

³³Kalukai meeng ko Lewi miano balukene konabonua doi meeng kokotadoo tukon yanila aki nabeale, dobonuadoo sio nainabalinggon doi yana doi Taun Bangabalinggonan lalomo. Sabab koLewi miano nabonua doi yanila nakota-kota daanon yanila kotumbuno motataap doi antara bangsa Israel.

³⁴Bai komosolot doi potikunggon ko Lewi benseno nakota-kota aki namoola binalukon. Doiya daanon Lewi miano koona tuuk sidutu-posidutukon.

³⁵ Kalukai mian momeeng kobangsa tukon ikoo mopodungoli komuyu teali talalais tukon aki natongongkosi konatuboan, komuyu sio potulunge yana buno meeng komian mobaseeleon kai molubat, sulano namoola tubo banggadudul doi komuyu.

³⁶ Inaimo mokabiyo kobungano doi oila kopoo bininggotiikon doi yana, bai siokai pomatakutene kopoo Mian Bisa, tukon batadikenemo domianoo mopodungoli komuyu. Inaimo koidan momangala untung luwedoi pokinaan binolukikon yana.

³⁷

³⁸Doiyamo ko TEMENENO mu Mian Bisa naparentah molapamo babayo komuyu tobuat luwedoi Mesir tuuk beekene kolipu Kanaan doi komuyu, sulano yana teali mu Mian Bisa.

³⁹ Kalukai mian momeeng kobangsa doi komuyu mopodungoli komuyu teali talalais tobikon yana balukene kobutongo salaku ata doi komuyu, doiya mianoo aki namoola komuyu sumboliiyo lakukene komeeng koata nalimang.

⁴⁰Yana sio nadungol doikoo salaku meeng komian motinambo tukon balimang tuuk doikoo polong doi Taun Bangabalinggonan.

⁴¹Doi tempodoo yana tukon napau-pau moola tinggale komubonua tukon abali doi kaluarga tukon doi nambumbu nabuta.

⁴²Ko Israel miano daanokai TEMENENO naata-ata; yanamokai komo babayo yanila tobuat luwedoi Mesir, tukon tobikon doiya yanila aki namoola binalukon salaku ata.

⁴³Jadi ko Israel miano mobalukene kobutongo doi komuyu aki namoola komuyu parentayo tukon babalat. Siokai pomatakut doi mu Mian Bisa.

⁴⁴Kalu komuyu mapalaluu ata, komuyu moola mongoli luwedoi bangsa-bangsa modungol doi popololanikonan.

⁴⁵Komuyu moolakai mongoli mian molulubaton napau-pau motataapo doi komuyu. Mian lubatoo napau-pau mosinuung doi polipu moola teali koomuyu

⁴⁶tukon moola koidan mubeena hak doi mupau-pau tuuk teali napoata pomatekon. Bai tulamuyu Israel miano aki namoola komuyu palentayo tukon kasal.

⁴⁷Kalukai meeng komian molulubaton modungol doi komuyu teali kaasa, tukon daano kotulamuyu Israel miano moteali talalais maka nabalukene kobutongo salaku ata doi mian molulubaton kai doi nakalualga;

⁴⁸Israel mianodoo tataap daano konahak tuuk mobineal. Meeng komian luwedoi utuso mala-malane,

⁴⁹kai napinatama, kai utuso idan motolidan kai mian bailon luwedoi nasobat moloolani moola natobuuse. Kai kalu yana susuungo doibundu mampue yana moola beale kobutongo susuungo.

⁵⁰Doatadoo sio pobbosiikene tukon mian molapamo oliyo. Yanila sio naaite kotaun nakadaang tambuun doi nabinalukonan kobutongo salaku ata polong doi Taun Bangabalinggonan koi-koidan, maka natinantukon kopongolino. Doolinodoo sio natinatapkanggon mololoi natambo nakadaang mobineekon doi mian motinambo.

⁵¹Doatadoo sio naabalinggene kobutongo pongolino anggano pokakana konakadaang komeeng komian mobalimang natambo doi taun-taun moakiyoon naompokoniiyo,

⁵²

⁵³pokakana yana molapamo balimang salaku mian mo tinambo nagaji sataun. Konatuan aki namoola palentayo yana tukon babalat.

⁵⁴Kalu yana aki namoola bineal tukon meeng kokokubaidoo yana tukon napau-pau sio nasinodiikono koidan doi Taun Bangabalinggonan doi salaando koidan.

⁵⁵Meeng ko Israel miano aki namoola teali ata pomatekon sabab ko Israel miano daanoon TEMENENO naata-ata. TEMENENO kai komo babayo yanila tobuat luwedoi Mesir. Yanamo ko TEMENENO, yanila mu Mian Bisa.