Read Banggai BASAMBUAN 26 Bible Online

BASAMBUAN 26 - Banggai bible

BASAMBUAN 26

¹ TEMENENO bantile, “Inaimo mososubaiyo kopilogot kai mokokondong timbalang kai sudong batu mo binotik sulano pososubaiyo. Yakumo komu TEMENENO Mian Bisa.

²Polamekenemokai kooloyo-oloyo Tadean tukon oloyo-oloyo babasal agama bailon tukon odotiiyo kolipu mosinadiakon tuuk pososubaiyano Yaku. Yakumo ko TEMENENO.

³ Kalu komuyu tubo loingiyo Daku aturan-aturan tukon loingiyo Daku parenta-parenta,

⁴Yaku naikon lubatene koudan doi tempono, sahingga kobuta daano kohasilo tukon kokayung-kayung sao.

⁵Komu buta hasilo naikon badaang tuuno, sahingga kalu laatemo kotempono kobapupuiyan anggur saono, komuyu daano mobapotoli gandum. Tukon kalu laatemo kotempono kobasakakonan gandum, komuyu daano mobapupui anggur saohno. Komuyu naikon daano kopokinaan mo sabe tukon komuyu tubo monondok doi mulipu.

⁶Yaku naikon dagaiyo konaamanan kopoo lipu sahingga moola tanaang tukon akiyono kopoo minatakuton koidan. Iyayon-iyayon mo barani naikon kuakiyenggene luwedoi lipudoo, tukon akiyono koidan kopolobosian doi mulipu.

⁷Komuyu naikon lungguiyo komusuh-musuh;

⁸tongo tukon lima komian komuyu moola polungguiyo komian sakat, tukon sakat komian komuyu moola polungguiyo songulo koloon komian.

⁹Yaku naikon balakaatio komuyu tukon beena badaang kopau tumbu doi komuyu. Oila komo lapamo Yaku dondiikene doi komuyu, tantu Kudaanokene.

¹⁰Komubuta hasilo naikon badaang tuuno, sahingga sukup tuuk meeng kotaun. Tukon koidan komuyu tapakisaa motobuatene kogandum molobian luwedoi pobapupuiyan tumbeno sulano nadaano komangabosan bapupuiyan mosoodo.

¹¹Yaku naikon podungoli komuyu doi Kusandung lalomo, tukon aki naikon kutolayo komuyu.

¹² Yaku naikon lolainge komuyu; Yaku naikon teali mu Mian Bisa tukon komuyu teali Kuumat.

¹³Yaku TEMENENO mu Mian Bisa, mobabayo komuyu tobuat luwedoi Mesir sulano naaki poteali ata koidan. Kakuasaan molai-lainggene komuyu lapamo kulotoyo, tukon kutealikene komuyu mian mobebas.”

¹⁴ TEMENENO bantile, “Kalu komuyu aki polengele Yaku tukon aki polakukene Daku parentah,

¹⁵kalu komuyu lumbaiyo koperjanjian Yaku mo kabaiyo tukon komuyu tukon aki poiyase loingiyo komo tinatapkanggon tukon Daku aturan-aturan, komuyu naikon Yaku ukume.

¹⁶Yaku naikon lubatene kobalaa doi komuyu, panakit tukon maligoot moaki namoola inalin, sahingga komatamu teali piit tukon komuyu teali tubo sakisaa. Komuyu naikon masakakon bai aki pomakaan hasilo, sabab komumusuh-musuh naikon lubat lungguiyo komuyu tukon akabuse oila kopoo sinakakon.

¹⁷Yaku naikon ukume komuyu, sulano komumusuh-musuh nalungguiyo komuyu tukon mian badaang mo mosikitene komuyu kuasaiyo komuyu. Komuyu naikon matakut tuuno tobikon doiya komuyu dampas, maukai naakiyo komo lelenggene komuyu.

¹⁸Kalu lapamo komuyu toupiyo doukumanoo sasaibino komuyu koidan akiyoon potaat doi Yaku, komu ukuman naikon Kusuungiyo pitu luunggon napitu.

¹⁹Komuyu todudul sombong, bai Yaku naikon lungguiyo komuyu. Udan aki naikon nalubat, sulano komubuta teali motuul tukon matikas buno besi.

²⁰Sasaibino komu pakadakan akiyo kotakoso, sabab komu buta aki naikon namebee hasil tukon komu sinakakon-sinakakon aki naikon nasao.

²¹Kalu komuyu daanoon koidan molawane Yaku tukon aki poiyase loingiyo Yaku, maka komu ukuman naikon Kusuungiyo koidan pitu luunggo napitu.

²²Yaku naikon lubatene koiyayon-iyayon mobarani doi salaamu. Iyayon-iyayonoo naikon sokuwo komupau-pau, akateyo komu iyayon piniala tukon akabuse komuyu, sulano komu kadaang teali soisik tuuno, tukon loloon-loloon doi mulipu teali kiis.

²³Kalu komuyu lapamo toupiyo sasaibino doukumanoo bai komuyu akiyoon pondongoliiyo Yaku, bai daanon budoo momeenggon molawana-Ku,

²⁴maka Yaku naikon bobokiiyo komuyu tukon ukume komuyu pitu luunggon lobian babalat luwedoi molapa-lapamo.

²⁵Yaku naikon sumbetene kopolobosiyan doi salaamuyu tuuk ukume komuyu sabab komuyu lapamo lumbaiyo Daku perjanjian tukon komuyu. Tukon kalu komuyu pototongi doi mukota tuuk mounggolii soopan, Yaku naikon lubatene kosesel mo aki namoola inalin; sulano komuyu tapakisaa somba doi pomusu.

²⁶Kabuso naikon kopoo kinaan, sahingga songulo koboine tolongo palaluu meeng kotampat basuaan sulano namosua roti modaano doi yanila. Kinaanoo naikon sinidak, tukon kalu lapamo komuyu kaane, komuyu daano koidan momalaal.

²⁷Kalu lapamo komuyu toupiyo sasaibino doukumanoo komuyu daano koidan molawane Yaku tukon aki poiyase loingiyo Yaku,

²⁸maka Yaku nggimal tukon naikon bobokiiyo komuyu, tukon ukume komuyu pitu luunggon lobian babalat luwedoi mo lapa-lapadoo.

²⁹Komuyu naikon malaal, tobikon doiya komuyu naikon kaane kopoo pau-pau.

³⁰Yaku naikon manase kolipu-lipu pomososubaiyan doi bunggul-bunggul bunggono, tukon Yaku lubange kopoo balambean-balambean tampat basuaan kamangian, tukon Yaku sakukene komu bajan-bajan doi mubapilogotan bunggono molapamo tolubangoo. Tukon kabi kutoluwe,

³¹komu kota-kota Yaku naikon boliyo teali buta motatambun, tampat mubasosubaiyan naikon Yaku manase tukon komu sosubakon-sosubakon aki Kutalimayo.

³²Komulipu Yaku naikon akamanase kabus, sulano kopo musuh-musuh modungoliyo yanila ngginggim mokitayo kona hebatan domulipu naminanasanoo.

³³Yaku naikon osumbete kopolobosian doi polipu tukon poalaas-alaasene komuyu doi lipu modoon. Komu asi-asi naikon tanganus, tukon kopo kota-kota binatadikon nateali buta mototimbun.

³⁴Doi tempodoo daanon komuyu doi posinakukonan doi mumusu-musu nalipu, doi polipu moaki potadeiyo kopolimangano doi tempo podungoliyano, naikon totinggalo tukon akimo polimange.

³⁶Mumian badaang mo daano doinasinakukonan lalomo doilipu bailon naikon kukubaiyo matakut tuuno, sulano mau natongo loon mo kiyoosan mbombuul mopuule kubaiyo yanila dampas. Komuyu naikon obulen buno pokakana komuyu molinolonggon doi polobosian lalomo, maka komuyu tuwong maukai naakiyo kopoo musuh doi bibilomuyu.

³⁷Komuyu naikon bulen tukon potokoiti meeng doi bailon, maukai naakiyo komo lelenggene komuyu. Tukon komuyu naikon aki polungguiyo lawane komusuh-musuh.

³⁸Komuyu naikon mate doi posinakukonan lalomo, minanaso komu musuh-musuh nalipu.

³⁹Songobos soisik luwedoi komuyu modaano motubodoi mumusu nalipu naikon susah sabab mulalim susuumu tukon mumbumbu nalalim.

⁴⁰Bai komu katulunan naikon akuiyo yanila nalalim tukon yanila nambumbu nalalim molapamo tumba-tumbake Yaku tukon lobosia-Ku,

⁴¹sahingga Yaku tindokiiyo lawane yanila tukon siikayo yanila doi nasinakukonan lalomo, doi yanila namusuh-musuh nalipu. Konapupusan kalukai mukatulunan lapamo somba tukon lapamo apakonggene koukuman sabab nadosa tukon yanila namolobosian,

⁴² Yaku naikon neneeke Daku perjanjian tukon Yakub, Ishak tukon Abraham. Yaku naikon kibooluo Daku perjanjian tuuk beekene butadoo doi Kubangsa.

⁴³Bai naikon butadoo sio naakiyono komo dungoliyo, sulano butadoo naakimo nalinimang. Tukon dakuumat sio nalakukene sasaibino koukuman Yaku motuwongikene doi yanila sabab aki naiyase loingiyo koaturan-aturan tukon Daku parenta-parenta.

⁴⁴Bai doi yanila nadaanoan doi musuh-musuh nalipudoo, yanila aki naikon Kutinggale kai Kusilakayo tutuuno, sabab kalu yanila Yaku silakaiyo, koalatino Yaku ebetelemo Daku perjanjian tukon yanila, sabab Yaku nia TEMENENO, yanila na Mian Bisa.

⁴⁵Yaku naikon kibooluiyo koperjanjian Yaku mokubaiyo tukon yanila nambumbu, salataa Yaku tudoikene Daku kuasa doi sasaibino kobangsa tukon babayo Daku umat tobuat luwedoi Mesir, sulano Yaku, TEMENENO, teali yanila na Mian Bisa.”

⁴⁶Doiyamo koukum-ukum tukon parenta-parenta TEMENENO mobeekene doi Musa doi Sinai Bunggulo bunggono tuuk doi bangsa Israel.