Read Banggai BASAMBUAN 27 Bible Online

BASAMBUAN 27 - Banggai bible

BASAMBUAN 27

¹TEMENENO beekene doi Musa

²naaturan nia tuuk doi bangsa Israel. Kalukai memeeng komian sinosubakon doi TEMENENO teali potolos meeng koniat moinalaas, domianoo moola nasinoboli tukon meeng koaito kodoy

³mololoi angga mo pinake doi TEMENENO Na Sandung: — lobian 60 kotaun: mala-malane 15 kodoy suasa moluko 10 kodoy suasa — antara 20-60 kotaun: mala-malane 50 kodoy suasa moluko 30 kodoy suasa — antara 5-20 kotaun: mala-malane 20 kodoy suasa moluko 10 kodoy suasa — moakiyoon napolong 5 kotaun: mala-malane 5 kodoy suasa moluko 3 kodoy suasa

⁸Kalu mian mo baniatoo talalais tuuno tuuk mobeale koangga mo tinatapkanggon, yana sio nababayo komian molapamo sinosubakon doi TEMENENO doi imam. Imam sio natataapkanggene koangga namumuda pokokonoi tukon domianoo nakamampuan.

⁹Kalukai doniatoo tentang iyayon momoola tinalima salaku sosubakon doi TEMENENO, domianoo mobaniat aki namoola soboliyo tukon iyayon bailon, sabab sasaibino komo sinosubakon doi TEMENENO teali TEMENENO koona. Kalu yana soboliyo koidan, looluakon doiyayonoo teali TEMENENO koona.

¹¹Bai kalu doniatoo tentang iyayon moaki naminoolakon tinalima salaku sosubakon doi TEMENENO, mian mobaraniatoo sio nababayo doiyayonoo doi imam.

¹²Imam naikon komo tantukanggene koanggano mololoi iyayonoo ndondoongo. Tukon angga molapamo tinantukon doiyakai angga mopopaason.

¹³Kalu domianoo yase motelese koiyayon, yana sio nabeale koolino sinuungi tukon lua kolono kopalaseeng.

¹⁴Kalukai memeeng komian sosubakene konabonua doi TEMENENO imam tantukanggene koanggano mololoi bonuadoo ndondoongo. Angga molapamo tinantukon daanon angga mopopaason.

¹⁵Kalu domianoo yase motebuuse konabonua, yana sio nabeale koanggano sinuungi tukon lua kolono kopalaseeng.

¹⁶Kalukai memeeng komian mososubakon soobos luwedoi nabuta doi TEMENENO, koanggano sio natinantukono mololoi konalibuang nakadaang mopinalaluukon tuuk pasakai butadoo. Tuuk samba lua kolono kokilogram kogandum koolino songulo kodoy suasa.

¹⁷Kalu butadoo mosinosubakon tambuun Taun Bangabalinggonan, koanggano sio nabineal pool.

¹⁸Kalu butadoo mosinosubakon lapamo lapa kotaun mangabalinggonan, imam sio natakisiile koanggano mobineal botol mololoi taun nakadaang moano polong doi Taun Bangabalinggonan koidan, maka tantukanggene koanggano molobian mumuda.

¹⁹Kalu mian mososubakene kona asidoo yase motebuuse, sio nabeale koanggano sinuungi tukon lua kolono kopalaseeng.

²⁰Kalu yana balukene doasidoo tukon aki natebuuse looluk luwedoi TEMENENO yana akiyono konahak koidan motebuuse kona asi.

²¹Doi Taun Bangabalinggonan lalomo koidan, doasidoo teali TEMENENO kotumbuno tuuk sidutu-posidutukon, tukon bineekon doi sasaibino koimam.

²²Kalukai memeeng komian mososubakon doi TEMENENO meeng koasi molapamo oliyo,

²³koimam sio natakisiile koanggano mololoi taun nakadaang modaano polong doi Taun Bangabalinggonan koikoidan. Maka domianoo sio nabeale koolino doi oloyodoo koidan. Dodoydoo teali TEMENENO kotumbuno.

²⁴Doi Taun Bangabalinggonan lalomo, doasidoo nainabalinggon doi tumbuno aki doi nakatulunan.

²⁵Sasaibino koolino sio natinantukon mololoi angga motapake doi TEMENENO Na Sandung.

²⁶Iyayon mosinuung tumbe daanokai TEMENENO kotumbuno, jadi aki namoola sinosubakon teali sosubakon mobiasa, saapi napau, domba napau kai mbembe napau tumbeno mosinuung daanon TEMENENO kotumbuno.

²⁷Bai iyayon mopinatanggon mosinuung tumbe moola sinoboli mololoi anggano motapake doi TEMENENO Na Sandung, sinuungi lua kolono kopalaseeng. Kalu aki natelese, doiyayonoo moola nabinalukon doi mian bailon mololoi angga mopinake doi TEMENENO Na Sandung.

²⁸ Akiyo komeeng komian momoola balukene kai telese oila komo lapamo inalaas tukon akiyo kosalato doi TEMENENO, mau doiya banggapi, iyayon kai buta. Koiya TEMENENO kotumbuno tuuk sidutu-posidutukon.

²⁹Tukon banggapi molapamo inalaas doi TEMENENO tuuk sinilaka aki namoola tinolos, yana sio nainakate.

³⁰ Meeng koobos inobos songulo luwedoi sasaibino kobuta hasilo, mau gandum maukai kayung sao-saono, doiyakai tuuk TEMENENO.

³¹Kalu memeeng komian yase motelese kosoobos luwedoi hasilo, yana sio nabeale koolino molapamo tinantukanggon sinuungi lua kolono kopalaseeng.

³²Luwedoi songulo koiyayon mopiniala meeng TEMENENO kotumbuno. Kalu doiyayonoo inait sasamba songulo koiyayon komeeng teali TEMENENO koona.

³³Doiyayonoo tumbuno aki namoola pili-piliyo yaando komo monondok, yaando komo kulokis. Yana koidan aki namoola soboliyo. Kalu yana monggisobolikene koidan, lua doiyayonoo mopiniala teali TEMENENO kotumbuno tukon aki namoola sinoboli.

³⁴Doiyamo ko TEMENENO naparentah-parentah bineekon doi Musa doi Sinai Bunggulo tuuk bangsa Israel.