Read Banggai BASAMBUAN 3 Bible Online

BASAMBUAN 3 - Banggai bible

BASAMBUAN 3

¹Kalu memeeng komian mososubakon meeng kosapi tuuk sosubakon podamean, dosapidoo sio langgilo, kai molukono, bai sio moaki naseselon.

²Mian mososubakene sio nabinggakene kolimano doi iyayonoo oluno bunggono maka natinembel doi TEMENENO Na Sandung tataapono salaano. Imam-imam katulunan Harun sio nabubusikene dosapidoo sauno potikunggon dobalabaanno.

³Tuuk sosubakon podamean doi TEMENENO, imam sio nasosubakene naobos-obos nia luwedoi iyayon: inakko mobunguse kokombongo,

⁴sasallono tukon inakko tukon ateno momonondok tuuno.

⁵Sasaibino doiya polaing-laing tukon sosubakon bailon mosinua, sio nasinua doi balabaan bunggono. Dososubakonoo mokinaan boono sanaanggene ko TEMENENO noano.

⁶Kalu domo sinosubakonoo tuuk sosubakon podameanoo meeng ko domba kai mbembe, doiyayonoo sio langgilo, kai molukono, bai sio naaki naseselon.

⁷Kalu memeeng komian mososubakon meeng kodomba, yana sio nababayo doi TEMENENO Na Sandung.

⁸Idoo yana sio nabinggakene kolimano doi dombadoo oluno bunggono maka natembele doi Sandungoo salaano. Maka imam sio nabubusikene dodombadoo sauno doi balabaanoo lisuko mosangkap.

⁹Tuuk sosubakon podamean doi TEMENENO, imam sio nasosubakene naobos-obos nia luwedoi dombadoo: inakko, sasaibino kopuuso moano koinakko tukon komo pinatol lolani kobukuno doi tonggulungo, inak mobungusiyo kokombongo,

¹⁰sasallono tukon inakko tukon ateno momonondok tuuno.

¹¹Imam mo balimang sio nasuayo sasaibino doiya doi balabaan bunggono teali sosubakon mokinaan doi TEMENENO.

¹²Kalu komo sinosubakon meeng kombembe, mian mososubakene sio nababayo doi TEMENENO Na Sandung.

¹³Idoo yana sio nabinggakene kolimano doi mbembedoo oluno bunggono maka natembele doi Sandungoo salaano. Imam sio nakundongiikene doiyayonoo sauno doi balabaanoo lisuko mosangkap.

¹⁴Tuuk sosubakon kinaan doi TEMENENO, imam sio nasosubakene naobos-obos nia moluwe doi mbembedoo: inak mobunguse kokombongo,

¹⁵sasallono tukon inakko tukon koateno mo monondok tuuno.

¹⁶Imam mobalimang sio nasuayo sasaibino doiya doi balabaanoo bunggono. Dososubakonoo mokinaan boono sanaanggene ko TEMENENO noano. Sasaibino doiyayonoo inakko tuuk TEMENENO.

¹⁷Ko Israel miano yanila aki namoola kaane koinak kai sau. Doaturanoo pinake tuuk sidutu-posidutukon tukon sio natinaati doi sasamba ko Israel miano doiyaando konapoo dungolan.