Read Banggai BASAMBUAN 4 Bible Online

BASAMBUAN 4 - Banggai bible

BASAMBUAN 4

¹TEMENENO sumboliiyo Musa

²moumumkanggene doi Israel miano baikon indeemo komiano komo tukon aki sangajaiyo kubaiyo kodosa tobikon lumbaiyo komeeng moluwe doi TEMENENO naparentah-parentah sio naloingiyo naaturania.

³Kalu komo baladosa Imam Babasal, maka ko Israel mian talalaing mobaladosa, yana sio namososubakon meeng kosapi langgilo mongula moakiyo kona sesel doi TEMENENO sulano kona dosa nainompuni.

⁴Dosapidoo sio nabinaba doi TEMENENO Na Sandung tataapono. Imam Babasal sio nabinggakene kolimano doi iyayonoo oluno bunggono, maka natembele doi Sandungoo salaano.

⁵Kosoobos luwedoi sauno sio nabinaba usok doi Sandungoo lalomo.

⁶Maka sio nakemeke kolimano saono doi saudoo lalomo tukon natiposiikene pitu luunggon doi lalansedoo salaano mopoalaasene ko Kombiang Moliyous.

⁷Kosoobos luwedoi saudoo sio nasinoutikon doi balabaanoo pasuno tandu-tanduko kamangian mobabangi doi Sandungoo lalomo, tukon kolabino sio nabinubusikon doi balabaanoo uuno mosuaan sosobakon modaano doi sandungoo tataapono salaano.

⁸Imam sio namangala sasaibino dosapi langgilodoo inakko, doiyamo inak mo bungusiyo kokombongo,

⁹sasallono tukon inakko tukon ateno momonondok tuuno.

¹⁰Sasaibino doiya sio nasinua doi balabaan bunggono buno doi sosubakon podamean.

¹¹Bai sapi sailodoo, kulito, oluno, aino, kombongo labino tololo kokombongo liliso,

¹²jadi sasaibino alaasene obos molapamo inalaas, sio nabinaba doi Sandungoo tonggulungo. Idoo dosapidoo sio nasinua doi aungoo bunggono doi tampat masakukonan abu, doiyamo tampat moinalaas tuuk doiya.

¹³Kalu kai komo baladosa sasaibino ko Israel miano, sabab tukon aki sangajaiyo lupaiyo komeeng ko TEMENENO naparentah,

¹⁴maka sambuno donapo lalimdoo tinoimo, ko Israel miano sio namababa meeng kosapi langgilo mongula doi TEMENENO Na Sandung salaano. Iyayonoo sio nasinosubakon teali sosubakon potolos napo lalim.

¹⁵Sasaibino kopemimpin bangsa sio yanila nabinggakene kolimano doi iyayonoo oluno bunggono, maka natembele doi tampatoo.

¹⁶Imam Babasal sio namababa kosoobos luwedoi iyayonoo sauno usok doi Sandungoo lalomo.

¹⁷Idoo yana sio nasepeke kolimano saono doi saudoo lalomo maka natiposiikene pitu luunggon doi lalansedoo salaano mopoalaasene ko Kombiang Moliyous.

¹⁸Kosoobos koidan sio nasinoutikon doi balabaanoo mosuaan kamangian pasuno tandu-tanduko doi Sandungoo lalomo, tukon kolabino sio nabinubusikon doi balabaan uuno tampat basuaan sosubakon modaano doi Sandungoo tataapono.

¹⁹Sasaibino doiyayonoo inakko sio nainala maka nasinua doi balabaan bunggono.

²⁰Kokubaiyano bunomo doi saapi langgilo nasinosubakonan tuuk sosubakon potolos lalim. Bunomo kai doiya ko Imam Babasal nakubaiyano komososubakonan sosubakon motuuk doi mian nadosa-dosa, maka dolalim-lalimdoo naikon TEMENENO ompuniyo.

²¹Lapadoiya dosaapidoo langgilo sio nabinaba doi tonggulung, tukon sinua doi basandungan tonggulungo, buno doi mososubakonan saapi langgilo tuuk sosubakon potolos Imam Babasal nalalim susungo. Bunomo doiya kokubaiyano komososubakonan sosubakon potolos mian nalalim.

²²Kalu meeng koponguasa komo baladosa sabab aki sangajaiyo molupaiyo komeeng ko TEMENENO naparentah,

²³salataa yana sadaliyo, yana sio namososubakon meeng kombembe langgilo moakiyo kona sesel, tuuk nainompunian kona lalim.

²⁴Yana sio nabinggakene kolimano doi iyayonoo oluno bunggono, maka natembele taambikon doi lembet doi balabaanoo, tampat metembelan iyayon tuuk sosubakon mosinua.

²⁵Imam sio nasepeke kolimano saono doi iyayonoo sauno maka nasoutikene doi balabaanoo pasu-pasuno tandu-tanduko tukon bubusikene kolabino doi balabaanoo uuno.

²⁶Lapadoiya sasaibino doiyayonoo inakko sio nasinua doi balabaan bunggono pokakana kososubakon podamean. Bunomo doiya koimam nakubaiyano komososubakonan sosubakon motuuk doi meeng koponguasa nalalim, maka domianoo naikon TEMENENO ompuniyo.

²⁷ Kalu kai meeng komian luwedoi rayat biasa mokubai lalim tobikon tukon aki sangajaiyo lupaiyo komeeng ko TEMENENO naparentah,

²⁸sambuno yana sadaliyo, yana sio namososubakon meeng kombembe molukono moakiyo kona sesel.

²⁹Yana sio nabinggakene kolimano doi iyayonoo oluno bunggono, maka natembele taalikon doi lembet doi balabaanoo tampat mokolotan iyayon tuuk sosubakon mosinua.

³⁰Imam sio nasemeke kolimano saono doi iyayonoo sauno lalomo maka soutikene doi balabaanoo pasuno tandu-tanduko tukon kundongiikene kolabino doi balabaan uuno.

³¹Sasaibino doiyayonoo inakko sio nakinubai buno doi sosubakonoo podamean. Inakko sio imam komo suayo doi balabaan bunggono, sulano koboono nasanaanggene ko TEMENENO noano. Bunomo doiya koimam nakubaiyano komososubakonan sosubakon motuuk doi meeng korayat, maka domianoo naikon TEMENENO telese konalalim.

³²Kalukai memeeng komian mososubakon meeng kodomba tuuk nalalim natinolosan, dodombadoo sio molukono, tukon akiyo kona sesel.

³³Yana sio nabinggakene kolimano doi iyayonoo oluno bunggono, maka yana sio natembele taalikon lembet doi balabaanoo, tampat iyayon nakinolotan tuuk sosubakon mosinua.

³⁴Koimam sio nasemeke kolimano saono doi iyayonoo sauno lalomo, maka soutikene doi balabaanoo pasuno tandu-tanduko tukon kundongiikene kolabino doi balabaan uuno.

³⁵Doibundu sasaibino doiyayonoo inakko sio nakinubai buno doi sosubakon podamean. Doinakkodoo sio nasinua doi balabaan bunggono, polaing tukon sosubakon mokinaan mo sinosubakon doi TEMENENO. Bunomokai doiya koimam nakubaiyano komososubakonan sosubakon motuuk domianoo nalalim, maka yana naikon TEMENENO telese.