Read Banggai BASAMBUAN 5 Bible Online

BASAMBUAN 5 - Banggai bible

BASAMBUAN 5

¹Palaluu nasinosubakon kososubakon potolos dosa: Kalukai daano komeeng komian mokinabi namebee kasaksian doi pangadilan, bai aki namebee katalangan kaliangano oilamo kona kinita kai nalinongol tobikon yana sio natanggunge koakibato.

²Kalukai daano komeeng komian mo salah sabab tukon aki nasinangajai teali lokis, sabab lapamo singgile kolangge meeng mo lokis, bunokai iyayon bunuto, tukon doibundu sadaliyomo kona kokubai.

³Kalukai daano komeeng komian mosalah sabab tukon aki sangajaiyo singgilemo kolangge molokis molengget doi bangkapi, tukon doibundu sadaliyo konakokubai.

⁴Kalukai daano komeeng komian mosalah sabab batotopi tukon sabalangan tuuk molakukene oilamo tolong, tukon doibundu sadaliyo konakokubai.

⁵Doi sasamba dopalakaladoo, domianoo mosala sio namangakukene kona kasalahan.

⁶Tukon tuuk potolos nadosa, yana sio namababa meeng kodomba kai mbembe molukono tuuk doi TEMENENO. Imam sio nasosubakene dososubakonoo sulano domianoo nalalim natinolos.

⁷Bai kalukai domianoo moano konasalah aki naloingiyo masadiya domba kai mbembe tuuk potolos nalalim, yana sio namakanggi meeng kopaal kotomisi sapatau, kai tomisi lapatiing mongula, komeeng kinubai sosubakon potolos lalim, tukon komeeng koidan tuuk sosubakon mosinua.

⁸Dotomisi-tomisidoo sio nabinaba doi imam. Sio imam komo lolukoniyo mososubakene dotomisidoo motinantukanggon tuuk sosubakon nainompunian kolalim. Dotomisidoo bulungo sio napiniyos, bai aki namoola bontol kooluno.

⁹Tomisidoo sauno sio natiniposiikon doi balabaan lisuko, tukon kolabino pinidol natobuat doi tonggulung doi balabaanoo uuno tuuk sosubakon potolos lalim.

¹⁰Lapa doiya imam sosubakene kotomisi koluano tuuk sosubakon mosinua, pokokonoi tukon aturan. Bunomo doiya koimam nakubaiyano komososubakonan sosubakon motuuk doi mianoo nalalim, maka yana naikon TEMENENO ompuniyo.

¹¹Kalu komian mosalah aki naloingiyo masadia meeng kopaal kotomisi sapatau kai tomisi lapatiing tuuk sosubakon pongompuni lalim, yana sio namababa meeng kokilogram kotarigu. Dotarigudoo aki namoola sinambul tukon zaitun lisisono kai sinambul kamangian, sabab dosusubakonoo daanokai sosubakon potolos lalim, tukon bolikon sosubakon mokinaan.

¹²Dotarigudoo sio nabinaba doi imam. Imam sio namangala soongguman luwedoi tarigudoo salaku tanda baikon sasaibino lapamo sinosubakon doi TEMENENO. Taligu mosoonggumanoo sio nasinua doi balabaan bunggono salaku sosubakon mokinaan. Doiyamo kososubakon motuuk potolos lalim.

¹³Bunomokai doiya koimam namososubakonan sosubakon motuuk doi mianoo nalalim, maka yana naikon TEMENENO ompuniyo. Taligu labino doiya imam koona naobos, buno doi sosubakon gandum.

¹⁴TEMENENO beekene doi Musa naaturan-aturan nia.

¹⁵Kalu memeeng komian tukon aki nasangadaiyo mokubaiyo kolalim sabab yana maalinggene momokubai sosubakon-sosubakon mo pantas tuuk doi TEMENENO, maka domianoo sio namababa sosubakon posoboli rugi. Dososubakonoo sio meeng kodomba kai mbembe langgilo moakiyo kona sesel, tukon inanggai koolino pokokonoi mopinake doi TEMENENO Na Sandung.

¹⁶Domianoo sio nabeale dona minaalinggonoo looluk, sinuungi tukon lua kolono kopalaseeng moluwe doi olino motinatukono. Lapadoiya yana sio nasalakanggene doiyayonoo doi imam, tukon imam sosubakene tuuk domianoo nalalim, maka yana naikon TEMENENO ompuniyo.

¹⁷Kalu memeeng komian tukon aki sangajaiyo kabaiyo kolalim sabab nalupaiyo komeeng ko TEMENENO naparentah, domianoo salah tukon sio natanggunge koakibato.

¹⁸Tuuk sosubakon posoboli rugi yana sio namababa meeng kodomba kai mbembe langgilo moakiyo kona sesel tukon inanggai koolino pokokonoi komo pinake doi TEMENENO Na Sandung. Imam sosubakene doiyayonoo tuuk doi mianoo nalalim, maka yana naikon TEMENENO ompuniyo.

¹⁹Doiyamo kososubakon posoboli rugi tuuk doi salah molinakukon doi TEMENENO.