Read Banggai BASAMBUAN 6 Bible Online

BASAMBUAN 6 - Banggai bible

BASAMBUAN 6

¹ TEMENENO beekene doi Musa naaturan-aturan nia.

²Memeeng komian sio namososubakon sosubakon kalu yana baladosa doi TEMENENO sabab aki naiyase abalinggene kolangge moinabos doi yana moluwe doi tula-tulano, kai kokooliyo komian, ndikuke komian nalobo, laatemo komian nalobo mo lapus, bai akiyenggene tukon batotopian.

⁴Doi mianoo mo salah siokai nabeale koidan sasaibino dona linaatoo tukon aki najujur. Doi tempo nalinaatan moano kona salah, yana sio nabeale sasaibino doi tumbuno, sinuungi luakolono kopalaseeng doi pebealodoo.

⁶Tuuk sosubakon posoboli lugi domianoo sio namososubakon meeng kodomba kai mbembe langgilo moakiyo kona sesel tukon inanggai koolino pokokonoi komo pinake doi TEMENENO Na Sandung.

⁷Imam sosubakene doiyayonoo tuuk doi mianoo nalalim, maka yana naikon TEMENENO ompuniyo.

⁸TEMENENO sumboliiyo Musa

⁹beena doi Harun tukon napau-pau naaturan-aturan nia kaliangano sosubakon mosinua sasaibino. Imam sio naabese kososubakon mosinua doi balabaan bunggono tukon tinggalemo idoo songopook, tukon koaungo sio nakait budoo.

¹⁰Sambuno dososubakonoo tealimo abu, imam basaluan palus tukon mapakemo jubah moluwe doi toik lenen, sio nabingkate doabudoo momominako luwedoi balabaan bunggono tukon naabese doi balabaan bibilo.

¹¹Sambuno lapa doiya yana sio nabasoboli pakean tukon babayo doabudoo doi sandungoo tonggulungo, doi tampat mosinadiakon tuuk doiya.

¹²Samba kodowa-dowa imam sio namangabos kayung mosinua doi balabaan bunggono, atule kososubakon mosinua doi balabaanoo bunggono, tukon suayo koinak luwedoi sosubakon podamean. Aung doi balabaan bunggono sio nabanggadudul kait tukon aki namoola sinodiikon poso.

¹⁴Naiyamo koatur-aturano kaliangano sosubakon mo kinaan tuuk doi TEMENENO. Dososubakonoo sio nabinaba doi balabaanoo salaano luwedoi meeng komian moluwe doi Harun nakatulunan.

¹⁵Yana sio namangala soongguman kotarigu moalus tukon lisison tukon sasaibino kona kamangian, maka nasuayo doi balabaanoo bunggono teali paloosan baikon sasaibino dososubakonoo sinosubakon doi TEMENENO. Dososubakonoo boono sanaanggene ko TEMENENO noano.

¹⁶Kotarigu labino sio nakinubai roti moakiyo koragino tukon imam-imam komo kaane doi tampat mo sinadiakon, doiyamo doi TEMENENO Na Sandung basaleano. Doiyamokai sasaibino koimam-imam naobos TEMENENO mobeekene doi yanila luwedoi sosubakon mo kinaan. Dokinaanoo moliyous tuuno, buno sosubakon moompuniyo kolalim tukon sosubakon posoboli rugi.

¹⁸Tuuk sidutu-posidutukon sasamba komalane Harun nakatulunan moola kaane dorotidoo; doiyamo konapoo obos motataap luwedoi kinaanoo mosinosubakon doi TEMENENO. Komian bailon mosinggile dokinaanoo molapamo sinosubakon, naikon malaat silaka tobikon namoliyousan.

¹⁹TEMENENO beena doi Musa naaturan-aturan nia

²⁰tentang sosubakon mokinubai doi meeng koimam Harun nakatulunan natinabiskanggonan. Doi natinabiskanggonan oloyono, yana sio namososubakon meeng kokilogram kogandum tariguno doi TEMENENO. Kosembeleng sio nasinosubakon doi tempo dowa-dowa tukon kolabino doi tempo kinobian.

²¹Dotarigudoo sio nasinambul tukon lisison, maka nasinua doi balalasan bunggono lapodoiya maka na binata-batai tukon sinosubakon teali sosubakon mokinaan. Dososubakonoo boono sanaanggene ko TEMENENO noano.

²²Tuuk sidutu-posidutukon samba-samba Harun nakatulunan motinabiskanggon teali Imam Babasal sio namososubakon dososubakonoo. Sasaibino sio nasinua tuuk sosubakon doi TEMENENO.

²³Sasamba kososubakon mokinaan imam mososubakene sio nasinua sasaibino, mau natongo soisik aki namoola kinaan.

²⁴TEMENENO sumboliiyo doi Musa

²⁵mobeena doi Harun tukon napau-pau naaturan-aturan nia tentang sosubakon potolos lalim. Iyayon motuuk sosubakon potolos lalim sio natinembel doi tampat metembelan iyayon motuuk sosubakon mosinua. Dososubakonoo moliyous tuuno.

²⁶Imam mososubakene dososubakonoo sio nakaane doi tampat mosinadiakon, doiyamo doi TEMENENO Na Sandung basaleano.

²⁷Indeemo kai oilamokai komo kanakon dpiyayonoo sailo naikon malaat silaka tobikon namoliyousan. Kalu meeng kokalambi totiposii iyayon sauno dokalambidoo sio nabinusoi doi tampat mosinadiakon.

²⁸Tobunan tano mopinake tuuk masaangan sail sosubakonoo sio napinasa. Kalu komo pinake tobunan besi, dotobunanoo sio nangginilal maka nabinilisii tukon paisu.

²⁹Sasamba komalane motousokon doi imam-imam pulino lalomo yanila moola kaane dososubakonoo mo moliyous tuuno.

³⁰Iyayon motuuk upacara potolos lalim mo inala kosoobos kosauno tuuk binaba doi Kombiang Moliyous, sio nasinua kabus tukon aki namoola kinaan.