Read Banggai BASAMBUAN 7 Bible Online

BASAMBUAN 7 - Banggai bible

BASAMBUAN 7

¹Naiyamo koatur-aturano kaliangano kososubakon posoboli lugi. Sosubakonoo moliyous tuuno.

²Iyayon tuuk sosubakon sio natinembel doi tampat batembeliyan iyayon tuuk sosubakon mosinua; maka kosauno binubusikon doi balabaanoo lisukon mosangkap.

³Imam sio nasosubakene sasaibino doiyayonoo inakko doi balabaan bunggono, doiyamo puuso mo mominak, inak mosonggupiyo kokombongo, sasallono tukon inakko, tukon ateno momonondok tuuno.

⁵Sasaibino doiya sio nasinua doi balabaan bunggono teali sosubakon mokinaan doi TEMENENO. Sosubakonoo daanokai sosubakon posoboli lugi.

⁶Sasamba komalane doi imam-imam pulino lalomo moola makaan sail sosubakonoo, bai yanila sio nakaane doi tampat mosinadiakon, sabab dososubakonoo moliyous tuuno.

⁷Tuuk sosubakon potolos lalim tukon sosubakon posoboli lugi tapake koparaturan mo pokakana, doiyamo: Iyayon sailo mosinosubakon doiyakai imam mososubakene naobos.

⁸Iyayon kulitodoo koidan bineekon doi imam.

⁹Samba kososubakon mokinaan mo sinua doi basuaan lalomo kai mo sinaang doi balanga lalomo bai mo linalas, teali imam mososubakene naobos.

¹⁰Bai kososubakon kinaan moaki nasinaang, mau mosinambul tukon lisison mau kai mo motiis, sasaibino tuuk doi imam-imam Harun nakatulunan tukon sio nainobos pokakana doi yanila.

¹¹Naiyamo koaturan-aturan kaliangano sosubakon podamean mo sinosubakon doi TEMENENO.

¹²Kalu dososubakonoo sinosubakon tuuk bakinatauwanan, maka tukon iyayonoo sio nasinosubakon koidan koroti mo aki napake ragi. Dorotidoo moola kinobondolong kotarigu adonano tukon zaitun lisisono, moola koidan tukon roti manipi motuul mo sinouti tukon lisison.

¹³Sangalaasan doiya sio koidan nasinosubakon koroti mokinubai pake ragi.

¹⁴Luwedoi meeng koroti kaliangano, sembeleng sio nasinosubakon doi TEMENENO, tukon doiya imam naobos mo mangala iyayon saunodoo tukon kundongiikene doi balabaan teali sosubakon podamean.

¹⁵Kosailo sio nakinaan doi oloyonodoo doiyayonoo nasinosubakon, mau nasoisik aki namoola tininggal polong modowa dowa-dowano.

¹⁶Kalukai meeng komian mababa sosubakon podamean sulano natapaatiyo kona niat, kai tuuk sosubakon sukarela aki napalaluu kinaan sasaibino doi oloyodoo kai. Kolabino moola nakinaan modowakon.

¹⁷Kalu doi oloyo kotoluno daanoon kolabino, dosailoo sio nasinua kabus.

¹⁸Bai kalu doi oloyo kotoluno dosailoo kinaan koidan, maka dososubakonoo aki naikon natinalima tukon akiyo kobalakaato buat doi mianoo, bai teali halaam. Mian mo makaan salah tukon sio natanggunge kobalino.

¹⁹Sail mokanakon lobo mo kulokis sio nasinua kabus tukon aki namoola kinaan. Sail sosubakon podamean tolongo mian mo aki nakulokis komo moola makaan.

²⁰Kalu mian mokaane dosailoo doi tempo yana daano mokulokis, yana akimokai nainaanggon TEMENENO namian.

²¹Kalukai daano komeeng komian mo kaane dosailoo mosinosubakon tukon yana lapamo singgile kolobo mokulokis, mau mo luwedoi bangkapi maukai moluwe doi iyayon, yana koidan akimo nainaanggon TEMENENO namian.

²²TEMENENO beena doi Musa naaturan-aturan nia

²³tuuk doi Israel miano. Saapi inakko, domba kai mbembe aki namoola kinaan.

²⁴Koiyayon momate inakko kai sabab sinoku iyayon mobarani, aki namoola kinaan bai moola napinake tuuk kapalaluuan bailon.

²⁵Mian mo kaane koiyayon inakko mo moola sinosubakon tuuk sosubakon mokinaan doi TEMENENO, akimo koidan nainaanggon TEMENENO namian.

²⁶ Israel miano doi yaandomo kona dungolan, aki namoola kaane kotomisi sauno kai iyayon sauno bailonggon.

²⁷Indee komo lupaiyo doaturanoo akimo kai nainaanggon TEMENENO namian.

²⁸TEMENENO beena doi Musa naaturan-aturan nia

²⁹motuuk doi Israel miano. Indee komiano komo mababa sosubakon podamean, sio naalaase kosoobos teali sosubakon mo sinadiakon doi TEMENENO.

³⁰Yana susuungo sio namababa sosubakon mokinaanoo. Doiyayonoo inakko tukon eopo sio nasinosubakon salaku sosubakon batokitaan doi TEMENENO.

³¹Koimam sio nasuayo doiyayonoo inakko doi balabaan bunggono, bai kooyopo doiya tuuk doi sasaibino koimam naobos.

³²Banano bakalinga sio nabineekon salaku bantuan mosinadiakon

³³doi imam mo sosubakene kosau tukon inak motuuk sosubakon podameanoo.

³⁴Koeyopo tukon banano bakalinga doiya bineekon doi TEMENENO luwedoi Israel miano nasosubakon batokitaan tukon doiya bineekon doi sasaibino koimam. Doiyamo ko Israel mian nabineekon tuuk doi sasaibino koimam sidutu-posidutukon.

³⁵Luwedoi kinan mosinosubakon doi TEMENENO, doiyamo kooboso komo bineekon doi Harun tukon napau-pau doi yanila natinahbiskanggonan teali imam oloyono.

³⁶Doi oloyodoo TEMENENO maparentakene ko Israel miano luwedoi yanila nasosubakon, doobosoo doiya tuuk sasaibino koimam. Doaturanoo sio Israel miano naloingiyo tuuk sidutu-posidutukon.

³⁷Bunomokai doiya koaturan-aturan kaliangano kososubakon mosinua, mokinaan, sosubakon potolos lalim, sosubakon posoboli lugi, sosubakon pantahbisan, tukon sosubakon podamean.

³⁸TEMENENO beekene doparentah-parentahdoo doi Musa doi Sinai Bunggulo doi tempo nasumboliiyano ko Israel miano mososubakon sosubakon doi Sinai padang lalomo.