Read Banggai BASAMBUAN 8 Bible Online

BASAMBUAN 8 - Banggai bible

BASAMBUAN 8

¹TEMENENO bantile doi Musa,

²“Uangemo Harun tukon napau-pau tukon babayomo kona pakean imam, lisison upacara, meeng kosaapi langgilo mongula tuuk sosubakon potolos lalim, lua kodomba langgilo tukon meeng kobois koroti moakiyo koragino.

³Maka sumboliiyo sasaibino ko Israel miano napototongi doi Kusandung tataapono salaano.”

⁴Musa lakukene oila ko TEMENENO napinalentahkon. Doi tempo sasaibino koumat lapamo pototongi doi tampatoo,

⁵Musa bantile doi yanila, “Komo yaku lakukene diabudodoo nia daanoon TEMENENO na parentah.”

⁶Maka yana sumboliiyo Harun tukon napau-pau okitakon doi muka tukon kumesio kobutongo.

⁷Sambuno lapa yana pekeikene koimam napakean doi Harun: kalambi, poboot tukon jubah. Koidan imam napakean mobinoboikon doi oako tukon poboboi luwedoi toik moalus.

⁸Maka konoikene doi Harun napotombuki eopo, tukon doi potombuki eopo lalomo yana usekene ko Urim tukon Tumim.

⁹Maka yana obosiyo tuala doi Harun oluno, tukon doi tualadoo tinalapon kobubunga mosoni, mo okitakene baikon Harun tealimo TEMENENO naimam. Sasaibino doiya Musa lakukene mololoi TEMENENO naparentah doi yana.

¹⁰Maka Musa mangala lisison bakolobokian maka soitikene doi TEMENENO Na Sandung tukon sasaibino kololongguno. Tukon buno doiya sasaibino sinadiakon tuuk doi TEMENENO.

¹¹Soisik luwedoi lisisonoo tiniposiikon pitu luunggon doi balabaan bunggono tukon sooano. Tukon buno doiya sasaibino sinadiakon tuuk doi TEMENENO.

¹²Lapa doiya Musa tabiskanggene Harun tukon kundongiikene soisik kolisison bakolobokian doi oluno bunggono.

¹³Maka yana sumboliiyo Harun napau-pau kokondong doi muka. Yana konoikene doi yanila kokalambi tukon pabaang. Maka yana obosikene kotuala doi yanila oluno bunomo TEMENENO napinalentahkon doi yanila.

¹⁴Lapa doiya Musa mangala meeng kosaapi langgilo mongula teali sosubakon potolos lalim. Harun tukon napau-pau abese kolimanoila doi iyayonoo oluno bunggono.

¹⁵Maka Musa tembele tukon mangala sauno soobos. Tukon limano saono yana solitikene dosaudoo doi tandu-tanduko modaano doi balabaanoo pasuno sulano dobalabaanoo nasinadiakon tuuk Mian Bisa. Sau labino kinundongiikon doi balabaan uuno. Bunomo doiya kokubaiyano dobalabaanoo nakiniliyousian tukon sinadiakon tuuk TEMENENO.

¹⁶Luwedoi saapi mosodo kinolotoo, Musa alayo sasaibino koinakko mosunggupiyo kokombongo, sasallono tukon inakko ateno momonondok tuuno. Sasaibino doiya sinua doi balabaan bunggono.

¹⁷Bai dosaapidoo sailo, kulito, kombongo labino tongusokon kokombongo liliso, jadi sasaibino dosaapidoo alaasene koobos-obos molapamo inalaas doiya sinua doi sandung tonggulungo bunomo TEMENENO napinalentahkon.

¹⁸Lapadoiya Musa mangala domba langgilo tuuk sosubakon mosinua, maka Harun tukon napau-pau abese kolimanoila doi dombadoo oluno bunggono.

¹⁹Musa tembele dodombadoo tukon kundongiikene kosauno doi balabaanoo lisuko mosangkap.

²⁰Maka doiyayonoo sinopolii kokombongo tukon aino yana kumosiyo tukon paisu. Oluno, inakko tukon dodombadoo langgilo sailo labino yana suayo tuuk sosubakon mosinua doi balabaan bunggono buno TEMENENO napinalentahkon doi yanila. Sosubakon mokinaanoo boono sanaanggene ko TEMENENO noano.

²²Maka Musa mangala meeng kodomba langgilo koidan tuuk sosubakon imam natinahbiskanggonan. Harun tukon napau abese kolimanoila doi dombadoo oluno bunggono,

²³maka Musa tembele. Lapa doiya yana mangala soisik doiyayonoo sauno, tukon sinolitikon doi Harun tolingaino bakalinga, doi limanoila saono tumbuno, tukon aino bakalinganoila saono tumbuno.

²⁴Doibundu yana sumboliiyo Harun napau-pau bakolanikon, maka yana solitikene koidan soisik kosau doi tolingainoila bakalingano, doi limanoila bakalinga tumbuno, tukon ainoila bakalinga saono tumbuno. Kosau labino kinundongiikon doi balabaan lisuko mosangkap.

²⁵Musa alayo dodombadoo inakko, puuso mominak, sasaibino koinak mosunggupiyo kokombongo, ateno momondok tuuno, sasallono tukon inakko tukon aino bakalingano.

²⁶Luwedoi bois koantoko roti moakiyo koragino molapamo sinosubakon doi TEMENENO, Musa mangala meeng koroti mobondolong mokinubai tukon lisison tukon meeng koroti manipi. Yana abese dorotidoo doi inakko bunggono tukon domba banano bakalinga.

²⁷Sasaibino yana abese doi Harun tukon napau-pau limano, maka yanila sosubakene salaku sosubakon potudoikon doi TEMENENO.

²⁸Sambuno lapa Musa mangala dokinaanoo luwedoi yanila tukon suayo doi balabaan bunggono, polaing tukon sosubakon mosinua tuuk sosubakon pentahbisan. Sosubakon mokinaanoo boono sanaanggene ko TEMENENO noano.

²⁹Maka Musa alayo dodombadoo eopo tukon sosubakene salaku sosubakon potudoikon doi TEMENENO. Doiyamo Musa naobos luwedoi domba langgilo mosinosubakon tuuk bakolobokian imam natinahbiskanggonan. Sasaibino Musa lakukene buno TEMENENO napinalentahkon doi yana.

³⁰Lapa doiya Musa mangala soobos luwedoi lisison bakolobokian tukon soobos luwedoi sau modaano doi balabaanoo bunggono, maka yana tiposiikene doi Harun tukon napau tukon doi napopakean. Tukon kokubaidoo Musa alaasemo yanila tukon konapoo pakean doi TEMENENO.

³¹Doibundu Musa bantile doi Harun tukon napau-pau, “Saangemo dosailoo sosubakon doi TEMENENO Na Sandung tataapono salaano. Pokokonoi TEMENENO naparentah, komuyu sio pokaane idoo tukon roti sosubakon panahbisan modaano doi boisoo lalomo.

³²Sail tukon roti labino sio posuayo kabus.

³³Pitu kooloyo konakalumbit aki pomoola tinggale ko TEMENENO Na Sandung polong polapakon kobakolobokian potinahbiskanggonan teali imam.

³⁴TEMENENO maparentahkene sulano oilamo konda linakukon oloyonia linakukon koidan banggadudul. Tukon bakolobokiyanoo tinoloso komu lalim-lalim.

³⁵Pitu kooloyo konakalumbit, oloyo tukon popook komuyu sio podungol doi Sandung tataapono salaano sulano polakukene oila ko TEMENENO napinalentahkon. Kalu komuyu aki polakukene, komuyu naikon mate. Doiyamo ko TEMENENO napinalentahkon doi yaku.”

³⁶Maka Harun tukon napau-pau lakukanggene sasaibino ko TEMENENO napinalentahkon lolo doi Musa.