Read Banggai YEREMIA 1 Bible Online

YEREMIA 1 - Banggai bible

YEREMIA 1

¹Kitab nia koantoko Yeremia Hilkia napau nabantilan-bantilan, daanon meeng koimam luwedoi kota Anatot doi lipu Benyamin.

² TEMENENO basilingan doi Yeremia doi taun kosongulono tolu Yosia namaparentaan. Amon napau tomundo Yehuda.

³ Lapa doiya TEMENENO basilingan koidan doiyana ulang-ulang, tambuun doi tempo Yoyakim Yosia napau namaparentaan polong doi taun songulono meeng Zedekia Yosia napau namaparentaan. Doi bituwon kolimano doo koidan modungoliyo ko Yerusalem inakut doi masakukonan.

⁴TEMENENO bantile doi yaku,

⁵“Akiyon Yaku pasitakayo ikoo doi tinamu nakodutan lalomo tukon akiyon ikoo sinuung, Yaku lapamo lilike tukon bingkate ikoo tuuk teali nabii doi bangsa-bangsa.”

⁶Yaku timbiliyo, “Ode TEMENENO Moinakatandak Tuuno, yaku aki napandoi basilingan sabab yaku daano todul mongula.”

⁷Bai TEMENENO timbiliyo, “Inai mobantile ikoo daano motodudul mongula. Kalu Yaku bitekene ikoo doi indee kai, ikoo sio mutaus, tukon saibino Daku sinumbolikon ikoo bantile, siokai ikoo pelenggene doi yanila.

⁸Inai matakutene yanila, sabab Yaku naikon lolainge ikoo tuuk lindungiyo ikoo. Yaku TEMENENO lapamo basilingan!”

⁹Lapa doya TEMENENO ulule kolimano, tukon taape kosuunggu maka bantil, “NDongolio tukon pelenggene bantilan-bantilan kubinantil nia.

¹⁰Oloyo nia Yaku beekene doi komuyu kuasa doi bangsa-bangsa tukon batomundoan-batomundoan — kuasa tuuk molubange tukon momanase, tuuk monggolinggene tukon mosilakaiyo, tuuk mokekendenge tukon mosakakene.”

¹¹TEMENENO sadaiyaku, “Oila komu kinita, Yeremia?” Yaku timbiliyo, “Badam batango langano, TEMENENO.”

¹²“Bisamo,” TEMENENO bantile, “Yaku dagaiyo sulano saibino Daku binatil nateali tokitaan.”

¹³Maka TEMENENO masadai koidan doi yaku, “Oila koidan komu kinita?” Yaku timbiliyo, “Taikon doi lembet yaku kitayo balanga antoko daanon mobukal tukon kabi natanggalaup taikon dimbaa.”

¹⁴TEMENENO bantil, “Luwedoi lembet kosilakaan naikon tosuungi tukon kanakon saibino modungoliyo nalipu nia.

¹⁵Yaku naikon sumboliyo saibino kobangsa taikon doi lembet lubat tuuk kuasaiyo ko Yerusalem. Betong-betong mobailingio kota nia tukon natataapon-tataapon babasal tukon saibino kota doi Yehuda naikon yanila libute.

¹⁶Yaku naikon ukume Daku mian, sabab yanila daano kona lalim tukon totonggulungemo Yaku. Yanila lapamo mososubakon-sosubakon doi ilah-ilah baikon, tukon mokubai timbalang-timbalang tukon sosubaiyo.

¹⁷Pobasa-basadiamo, Yeremia! Potauso pelenggene doi yanila, saibino Daku pinarentakon doi komuyu. Inai matakutene doi yanila, sulano ikoo inai Kukabaiyo lobian matakut koidan kalu posasalan tukon yanila.

¹⁸NDongolio! Modungoliyo nalipu nia naikon tantange ikoo, pamarentah, saibino koimam, tukon rayat. Bai oloyo nia Yaku bekene doi komuyu bukuan tuuk molawane yanila. Ikoo naikon teali buno kota moano kona benteng buno sudong besi tukon betong tambaga. Yanila aki naikon namoola kalayo ikoo, sabab Yaku naikon lalainge tukon lindungiyo ikoo. Yaku, TEMENENO, lapamo basilingan.”