Read Banggai YEREMIA 10 Bible Online

YEREMIA 10 - Banggai bible

YEREMIA 10

¹Umat Israel, ndongolio TEMENENO nateteba doi komuyu.

²Yana bantil, “Inai loingiyo kubiasaan bangsa-bangsa bailon, tukon inai mbombokon kitayo paloasan doi timbu bangsa-bangsa doo mominatakuton tuuno.

³Bangsa-bangsa doo naadat akiyo tuuno kotakoso. Yanila matape kayung doi mosolot, tukon mosumboli tukang kayung mokubaiyo tukon naalat teali pilogot timbalango.

⁴Doibundu pilogot timbalango doo binubungai tukon mosoni tukon suasa, maka kinonggoli tukon paku sulano naaki naotuwong.

⁵Pilogot timba-timbalango doo buno mian-mian doi ontimun asino. Yanila aki namoola basilingan, aki namoola loakon, tukon sio nabininggat. Inai namatakutene doi yanila, sabab yanila aki namoola mokubai lokis doi komuyu; mokubai monondok doo yanila aki namampu.”

⁶TEMENENO mo kinabasal, Ikoo akiyo kona pokakanan, sambu-Mu babasal tukon moonoh kuasa.

⁷ Indekai komo aki naiyase mangga doi Ikoo, tomundo saibino kobangsa? Bisa, Ikoo siokai muhinolomati. Luwedoi saibino mopandoi doi antara bangsa-bangsa tukon luwedoi saibino yanila tomundo-tomundo, akiyo komeeng komian kai moola pinokanakon tukon buta-Mu, ode TEMENENO.

⁸Donggang tukon longas yanila saibino sabab konailah tolongo kai kayung aki nateali mongotunggul moano kotakoso.

⁹Yana ilapis tukon suasa tukon mosoni mobinaba luwedoi Spanyol tukon kota Ufas, saibino daanon hasil koseniman tukon pandoi monosi nakinubai. Kona pakean luwedoi toik momamampal tuuno tukon mokindung napananpal, molimange saibino motoiyo batonun tukon monondok.

¹⁰Bai Ikoo TEMENENO, Mian Bisa mobisa, Mian Bisa mobeena toboan, tomundo posidutukon. Kalu Ikoo nggimal, dunia inggato, kalu Ikoo nggimal bangsa-bangsa aki nataane. (

¹¹Komuyu, he umat, sio popitoikene doi yanila baikon ilah-ilah moaki tealikene kotimbu tukon dunia doo naikon sinilakaimo. Yanila naikon kabus luwedoi dunia bungguno.)

¹²TEMENENO tealikene kodunia tukon Nakuasa, kabaiyo kodunia tukon Nakuasa, tukon bukayo kotimbu tukon Napikilan.

¹³Tolongo tukon beena parentah bulungano kopaisu doi dapang. Luwedoi dunia bundu-bunduno Yana lubatene kobunom, tukon Yana kubayo kodidip mopalapit doi udan lalomo, maka Yana kilime komombuul luwedoi tampat mangabosan.

¹⁴Kitayo saibino doo banggapi sadalo, baikon yana longas tukon akiyo kona palapotian. Saibino komo pandoi mosoni akimo mai mangga, sabab kona kinubai pilogot timbalango doiyakai kala tukon akiyo kona ansang.

¹⁵Pilogot-pilogot akiyo koanggano, tantu sinosubolii tukon tinotulai. Kalukai lubato kotempono yanila naikon silaka.

¹⁶Yakub na Mian Bisa aki nabuno pilogot-pilogotto; Yana pasitakayo sasaibino kolobo. Kosambuno doiyamo TEMENENO Mobabasal Konakuasa; Yana lapamo lilike Israel teali Naumat.

¹⁷Modunggolio ko Yerusalem, komuyu ilobosi! Tobikon doya, basa-basadiamo!

¹⁸Diabudodoo TEMENENO naikon lambitene saibino kobangsa Yehuda doi masakukonan; komuyu saibino naikon minanaso tuuno, doiyamo, teteba luwedoi TEMENENO.

¹⁹Modunggolio ko Yerusalem nggeleamon, “Kami pakolon babasal tukon akimo natangalin. Loluk kami sangkayo baikon sakisaa nia kami moola tanggunge, banggokai aki.

²⁰Komai Sandung lusako, tukon koalo-aloso saibino bontol. Akiyomo koidan momoola mokokondong sandung tukon paase konatoik-toik, sabab napau-pau lapamo taus.”

²¹Yaku timbiliyo, “Konda katua-katua doo longas. Yanila aki namangkabi potudoikon luwedoi TEMENENO, doiyamo kosabapo yanila gagal, tukon kita kasasalo doi yaa-yaa.

²²Ndangolio! Daano ko bilita baikon meeng kobangsa doi lembet sumbutene kokalibutan. Suludadu naikon makabi kota-kota Yehuda teali kiis tukon akiyono komodungoliyo. Asu-asu doi mosolot naikon sapit imbali.”

²³TEMENENO, Yaku toiyo akiyo komeeng komiankai balakuasa, tantukanggene kotuboan kabai pimpine kona tuboan lolonno.

²⁴Otunggulemo kami ode TEMENENO, bai inaimo tukon pongumbas motodudul masakitene. Inai koidan mauukume kami kalu Ikoo daano monggimal, sabab tutuu kami naikon silakamo saibino.

²⁵Sumbutenemo Komunggimalan doi bangsa-bangsa bunggono moaki naakuiyo Ikoo tukon moakiyoon naiyase kaleda doi Komuyu. Sabab yanila lapamo silakaiyo Muumat tutuuno tukon manase komai lipu.