Read Banggai YEREMIA 11 Bible Online

YEREMIA 11 - Banggai bible

YEREMIA 11

¹TEMENENO bantil doi yaku,

²“Palaatikanggene sarat-sarat perjanjian Yaku mokubaiyo tukon Kuumat. Pobontiikene doi Yehuda miano tukon modungoliyo ko Yerusalem baikon

³Yaku, TEMENENO Mian Bisa Israel, kutukio oila komo aki nataatio sarat-sarat Kuperjanjian doo.

⁴Perjanjian doo lapamo Kubaiyo tukon yanila nambumbu salataa yanila Kubabayo sumbut luwedoi Mesir, lipu mobuno neraka tuuk yanila. Yaku sumboliyo yanila taat doi Yaku tukon lakukene saibino molapamo Kuparentakene. Diabudodoo lapamo Kubantile koidan doi Yehuda miano tukon modungoliyo ko Yerusalem baikon kalu yanila taat doi Yaku, yanila naikon tealimo Kuumat tukon Yaku yanila na Mian Bisa.

⁵Kalu yanila lakukene saibino doo, Yaku naikon tapatio Daku perjanjian doi yanila nambumbu baikon lipu mo subul tukon monondok, modiabudodoo yanila nadungoliano, naikon Yaku beekene doi yanila.” Yaku timbilio, “Monondok, TEMENENO.”

⁶Maka TEMENENO bantil doi yaku, “Tauso doi kota-kota doi Yehuda, tukon doi lolon-loloon doi Yerusalem. Pelenggene Daku teteba doi mian badaang indaa. Sumbulio yanila napalaatikanggene tukon taatio Daku perjanjian sarat-sarato.

⁷Salataa Yaku babayo yanila nambumbu sumbut luwedoi Mesir, tukon tagas Yaku ingotiike sulano yanila taat doi Yaku. Sampe oloyo nia kai Yaku daano sidutu moingotikene Daku umat kokaliangano langge doo,

⁸tukon sumbolio yanila taatio Daku perjanjian doo, bai yanila aki naiyase mondongolio tukon aki nayase taat. Tolongo yanila tataap motikas konoanno tukon lokis buno lolukoo. Tobikon doiya saibino koukuman mototulis doi perjanjian doo lalomo lapamo Kusalakanggene doi yanila.”

⁹Doi bundu TEMENENO bantil koidan doi yaku, “Yehuda miano tukon modungoliyo ko Yerusalem lapamo pomeenggon molawane Yaku.

¹⁰Yanila lapamo lakukene kolalim yanila nambumbu mokabayo aki naiyase taat doi Yaku, yanila sosubayo-sosubayo temeneno-temeneno bailon tukon aki naiyase tulutiyo Daku parentah. Mau Israel maukai Yehuda langgalemo koperjanjian molapamo Yaku kubayo tukon yanila nambumbu.

¹¹Tobikon doiya, Yaku, TEMENENO, ingotiikene baikon Yaku naikon lubatene kosilakaan doi yanila tukon yanila aki namoola atasio. Kalukai yanila masadaikene mangkabi tulung doi Yaku, Yaku aki moyase molongol.

¹²Maka Yehuda miano tukon modungoilio ko Yerusalem taus mangkabi tulung doi Ilah-ilah bailon, yanila monggale sosubakene sosubakon. Ilah-ilah doo aki naikon nanggola salamatene yanila doi tempo silakaan doo lubat.

¹³Yehuda miano na Ilah-ilah badaang tuuno, pokakana konakadaang lolon-lolon doi kota Yerusalem tuuk mososubakon sosubakon doi Dewa Baal.

¹⁴Tobikon doiya, Yeremia, inaimo mosambeang tuuk yanila kabai makabi tulung doi Yaku tuuk yanila! Kalu yanila doi susah lalomo tukon makabi tulung doi Yaku, Yaku aki naikon yase molongol doi yanila.”

¹⁵TEMENENO bantil, “Daku umat Yaku moseange lapamo lakukene langge-langge molokis. Yanila akiyo kona hak modaano doi Ku Bonua. Yanila anggene baikon tukon mokubai perjanjian, tukon mososubakon iyayon, yanila moola pepete kosilakaan. Oilakai tukon doya yanila moola sanang?

¹⁶Idano Yaku sumbuikene yanila zaitun molumbang batango, moono sao-saono monondok. Bai, diabudodoo tukon lalo babasal mohebat naikon Kusuayo kolono-lono tukon kolotoiyo saibino kolanggano.

¹⁷Yakumo komo kekendengge ko Israel tukon Yehuda, Yaku, TEMENENO Mobabasal Konakuasa. Bai diabudodoo Yaku, niatene tuuk lubatene kosilakaan doi yanila. Yanila susungo komo kubayo sabab sasaibinodoo, sabab yanila lapamo lakukene kakulokisan, doiyamo mososubakon sosubakon doi Baal tobikon Yaku nggimal.”

¹⁸TEMENENO bantikene doi yaku kalianggano kotetel molokis doi kumusuh-musuh terhadap yaku.

¹⁹Yaku buno domba moakiyo ko sasato binaba doi tampat bakolotan. Yaku aki kutoiyo baikon yakumo moteaki sasaran yanila natetel-tetel molokis. Yanila bantil, “Maimo nda tapeo kayung nia daanon yana daano malaat hasilo saohno; kita lopuwomo yana sulano kosambuno mian toliminggene.”

²⁰Maka yaku sambeang, “Ode TEMENENO Mobabasal Konakuasa, Ikoo hakim moadil; Ikoomo moudio komian napikiran tukon noano. Daku perkara nia yaku salakanggene doi Komuyu. Biliisi yaku moola sakisiiyo Ikoo mosoboli kakabai mian badaang.”

²¹Kota Anatot miano yase sulano yaku mate. Yanila bantile, “Kalukai ikoo banggadudul tolong pelenggene TEMENENO nateteba-teteba doi kami, ikoo naikon kami akateo.”

²²Tobikon naikon doya, TEMENENO Mobabasal Konakuasa bantil, “Yaku naikon hukume yanila! Mian badaang motabokon yanila naikon mate doi polobosian lalomo, yanila napau-pau naikon mate malaal.

²³Yaku lapamo tantukenggene kotempono tuuk lubatene kosilakaan doi Anatot miano daango, tukon kalu tempo ukuman yanila doo lubat, akiyo komeeng komian kai naikon moluput.”