Read Banggai YEREMIA 12 Bible Online

YEREMIA 12 - Banggai bible

YEREMIA 12

¹“Kalukai yaku monggiulusene daku perkara doi saala-Mu, ode TEMENENO, tantumo naikon totoimo baikon Ikoomo komo kana. Bai yaku yase koidan masadaikene doi Koo soal kaadilan: Bulaando mian lokis monondok? Bulaandokon mian moaki najujur komoano kona hasil?

²Ikoo sakakene yanila buno tumbu-tumbuan, maka yanila daano koanggolo, tubo, tukon saoh. Yanila sidutu basilingan momondok-mondok kaliangano butamo, bai noa lalom, yanila nabiasaan aki napadulio Ikoo.

³Bai Ikoo, ode TEMENENO, tingonio yaku. Ikoo kitayo oila daku lakukanggon, tukon Ikoo toiyo bulaando konoanggu nainomi terhadap-Mu. Babayomo mian badaang doo molokis nakaluar, babayomo yanila buno domba doi bakoloton. Dagaiyo yanila sampe lubat kotempono yanila kinolot.

⁴Sampe bulaa kona kalumbit koidan lipunia motuul, tukon kobulung moloyu doi samba koasi? Tomisi tukon iyayon bailon mate sabab nakulokisan komai bangsa. Yanila bantil, baikon yaku aki naikon mongkita yanila nasib.”

⁵TEMENENO bantil, “Yeremia, kalu ikoo pakadak mopotanding tukon banggapi yando moteali ikoo potanding tukon adalan? Kalu doi buta moaman ikoo matakut oilano komo naikon ikoo lakukene kalukai ikoo daanon doi mosolot doi Yordan bibilo?

⁶Ikoo lapamo kulokisene tukon mumotolutusan susuumu; yanila malaing molobosi ikoo. Inaimo moanggayo doi yanila, maukai yanila nabantil-bantil maamis.”

⁷TEMENENO bantil, “Daku tampat dunggolan akimo koidan Kupopusinggon, lipu moteali konggu lapamo Yaku tinggale, tukon Daku umat Yaku moseange lapamo salakanggene doi namusuh-musuh limano.

⁸Umat Kuililik lawane Yaku; buno singa doi bonggulung bunomokai yanila nggaton doi Yaku. Doiyamo kona sabab Yaku misikitene yanila.

⁹Yanila buno tomisi alai molobosiyo luwedoi saibino kopihak. Uangemo saibino koiyayon mosolot tuuk malaing moakabuse yanila.

¹⁰Badaang kopenguasa molubat lapamo manase Daku anggur asino tukon tudo-tudongiyo Daku asi-asi. Daku lipu momondok yanila boliyo teali padang lalomo mo kiis.

¹¹Ode, Yaku kitayo yanila tealikene Daku lipu tampat mokiis mo mosedih. Posaapon totinggalo, akiyono komo palatinkanggene.

¹²Luwedoi padang bone sembeleng doi bunggulo, mian daango lubat tuuk pondikuk. Yaku lubatene kopolobosian tuuk manase saibino kolipu tobikon akiyono komeeng komiankai momoola tubo mondok.

¹³Daku umat motipas gandum, bai sunit komopinupui. Yanila susah tuuno bai kona usaha akiyo ko hasilo. Yaku nggimal tuuno tobikon yanila nabapupuian aki teali.”

¹⁴TEMENENO bantil, “Naiamo Daku teteba kaliangano nagara-nagara mololani ko Israel molapamo manase kulipu Yaku beeke doi Kuumat Israel. Bunomo sinakakon mokinubut luwedoi buta, bunomo kai mian badaang molokis doo naikon Kukaluale luwedoi yanila nalipu-lipu, tukon Yehuda Kusobiyo luwedoi yanila limano.

¹⁵Bai sambuno lapa kaluale yanila, kabai yanila koidan seseanggemo; samba kobangsa naikon Kubabayo abali doi nalipu susuungo.

¹⁶Kalu yanila tukon noa saibino yase talimayo koagama Daku umat tukon yase batotopi tukon bantilan, ‘Tolongo TEMENENO komo tubo,’ — bunololuko yanila otunggule Daku umat batotopi tolongo Baal maka yanila kai naikon tousokon Kuumat tukon teali monondok.

¹⁷Bai bangsa moaki naiyase mololoi Yaku naikon Kukibute mosinakakon tukon Kuabuse. Yaku, TEMENENO, lapamo basilingan.”