Read Banggai YEREMIA 13 Bible Online

YEREMIA 13 - Banggai bible

YEREMIA 13

¹TEMENENO sumboliyo yaku taus mongoli toik mopalus luwedoi, kain lenan tukon napakeo, bai yaku akinamoola tonio doi paisu lalomo.

²Maka yaku taus mongoli sarung mopalus doo, maka napakeo.

³Lapadoiya TEMENENO basilingan doi yaku, nabantile,

⁴“Tauso doi Efrat Paisunobatango, tukon seekene toik mopalus doo doi batu anga-angato.”

⁵Maka pololoi TEMENENO Naparentah Yaku tauso tukon seekene sarung mopalus doo lolani ko Efrat Paisunobatango.

⁶Bubula kotempo doibundu TEMENENO sumboli yaku taus koidan doi Efrat Paisunobatango tuuk mangala toik mopalus doo.

⁷Maka yaku tauso sumbetene sarung palus doo luwedoi tampat yaku moseeke. Tokita sarung doo manasoh, tukon saibino akiyono kotakoso koidan.

⁸Maka TEMENENO basilingan doi yaku bantile,

⁹“Bunomo doiya kona cara Yaku naikon motindokio ko Yehuda miano tukon modungoliyo ko Yerusalem. Yaku naikon rusayo yanila nababanggalan motodudulo.

¹⁰Bangsa molokis nia motikas konoano tuuno tukon aki nayase taat doiya-Ku. Yanila sosubah tukon sosubaiyo doi temeneno-temeneno bailon. Doiyamo kosababo yanila naikon teali buno sarung palus moakiyo kotakoso doo.

¹¹Bunomokai toik mopalus toboikon doi mian mopakeo oako, bunomokai Yaku maksudtio sulano umat Israel tukon Yehuda tokooton rapat doi Yaku. Tukon bunodoiya yanila teali Kuumat mokubaiyo Kosambunggu tanggaal tukon hinolomati. Bai yanila aki naiyase tulutiyo doi Yaku.”

¹²TEMENENO Mian Bisa bantile doi yaku, “Yeremia, pelenggene Daku teteba doi Israel miano baikon samba kogusi anggur nainabosan sio nabinotuni boono tukon anggur. Yanila naikon timbilio, ‘Banggokai komuyu aki natoiyo baikon samba kogusi sio kinonoi tukon anggur?’

¹³Maka bantilemo doi yanila baikon mian daango doi lipu nia, tomundo-tomundo Daud nakatulunan, saibino koimam, nabi, tukon saibino modungoliyo ko Yerusalem naikon Kuontokio moonoh tukon anggur sampe malangu.

¹⁴Maka yanila naikon Kupolosikene meeng maka bailon. Motua tukon tabokon naikon Kukabaiyo bunodoiya akiyo koampun. Yanila naikon Kulopuwomo akimo naseange kabai maasikene. Yaku, TEMENENO lapamo basilingan.”

¹⁵Umat Israel, TEMENENO lapamo basilingan! Inai babanggal, longolio Yana!

¹⁶TEMENENO mu Mian Bisa sio ikoo kabasale akiyoon Yana lubatene kokalipookan, tukon koaimu takait doi buunggukon, akiyoon namadialang ikoo momoinikene Yana boliyo teali kalipookan.

¹⁷Kalu ikoo aki mu mondongoli, yaku naikon kokiil tukon aki nalongol. Tukon rasa sedih kukokiiliyo mubabanggalan doo. Matanggu paisuno naikon meselemo sabab TEMENENO Naumat inakut pokakana komian tinalunggu.

¹⁸TEMENENO bantil doi yaku, “Sumboliyo tomundo tukon naboloki loboson luwedoi naosulangan, sabab kona songgo momondok tuwongo luwedoi oluno.

¹⁹Kota-kota Yehuda taikon doi salatan daanon mokinopung, tukon akiyon nalungguiyo polobosian doo. Saibino Yehuda miano lapamo inakut doi masakukokan.”

²⁰TEMENENO bantil doi modungoliyo ko Yerusalem, “Palaatikanggene! Musuh-musuh polubotimu tukon luwedoi lembet! Nandomokai mian dango mosio komuyu lindungiyo tukon komuyu mobanggakene doo tuuno.

²¹Oilamo naikon pobintil kalu mian daango komuyu kabayo salaku tula-tulamuyu mokalayo tukon kuasaiyo komuyu? Tantu komuyu naikon masakit buno boine modaano mosuung.

²²Banggokai komuyu masadaikene bulaando saibino doo mapisayo kobutomu, bulaando mupakean binending tukon komuyu iloloai. Toiyomo kai baikon motealidoo sabab mulalim todudul babasal.

²³Molakai mian mopook boliyo kokulito nawarna, kabai harimau apuse nakambangan? Tantu aki! Buno mo koidan komuyu mobisa makabi lokis aki nanggola makabai monondok.

²⁴Yaku naikon poalasene komuyu buno meeng mombuul mopuule luwedoi padang bone.

²⁵Doiyamo komu nasib molapamo Yaku tantukene sabab komuyu toliminggenemo Yaku, tukon manggamo doi Ilah-ilah mokala.

²⁶Yaku susuungu naikon bendinge pakean luwedoi butomu sulano komuyu teali ballau tukon mamaa.

²⁷Yaku kitayomo komuyu lakukene langge-langge Kuminisikiton. Yaku kitayomo komuyu molonggon temeneno-temeneno bailon doi bunggul tukon doi asi, buno meeng komala-malane tindo-tindomo terhadap mian bailon naboloki kabai buno adalan laanggilo kona nafsu doi adalan molukono. Modungoliyo ko Yerusalem, silakamo komuyu! Tempo oila komuyu naikon bebaso luwedoi saibino kokulokisan?”