Read Banggai YEREMIA 14 Bible Online

YEREMIA 14 - Banggai bible

YEREMIA 14

¹TEMENENO bantil buno nia doiyaku kalianggano tempo pital mohebat.

²“Yehuda susah konoano kona kota-kota kabi nalapus. Kona mian daango banggogolonggon doi buta tukon bebek. Yerusalem wookon mangkabi tulung.

³Kopeleani mian mokaasa binitotokon mounggoli paisu doi yaa-yaa; doi bubung-bubung yanila natausan bai sasaibino kopaisu kabuso. Kogumbang kosoongo yanila mamaa tukon tutupio ko duduso.

⁴Udan akimo naudan tukon buta motuul tuuno; patani songgupio koduduso sabab todudulo manasal.

⁵Burung akiyono kai, tobikon doya kodonga tinano tauso. Kona pau mosodo sinung tinggalemo doi padang lalomo.

⁶Doi bunggul-bunggulo kokaladai mombosalo kokondong tolong, komatano pipiit sabab akiyo kolumput nakinaan; yana buno asu mosolot.

⁷Daku mian masadai, ‘TEMENENO, maukailakon komai dosa tuduwe kami bai tulungiyo kami pokonoi tukon muperjanjian. Kaminia badaango lunggon tinggale Ikoo; tutuu, kami baladosamo doi Ikoo.

⁸Ikoo komeeng-meengo Israel naminoinikon; mosalamatene kami luwedoi silakaan. Bai bulaando Ikoo buno mian lulubaton domai tano, buno lausala motolongo sampu meeng kopopook maka nataus?

⁹Bulaando Ikoo buno miang mobinggung; buno talenga moaki nateali tulungiyo? Bai, tantu Ikoo daanon doi kami tanga-tangano, TEMENENO! Kami Mumian, inaikai Ikoo tinggale kami!’ ”

¹⁰Tentang doya bangsa doo TEMENENO bantile, “Yaku aki nasanang doi mian-miano moyase dampase nakobutongo doiya-Ku, tukon aki nakuasaiyo kobutongo. Yaku naikon aki kutoliminggene yanila nakasalahan, Yaku naikon hukume yanila sabab yanila nalalim.”

¹¹TEMENENO bantil doi yaku, “Inai mokabiyo Yaku tulungiyo mian-miandoo.

¹²Maukai yanila bapuasa, Yaku akikuyase palaatikanggene yanila nakakabi mangkabi tolong; tukon maukai yanila mososubakon doi Yaku sosubakon mosinua tukon mososubakon gandum yaku aki nasanaang doi yanila. Kobaliko, Yaku naikon akabusemo yanila tukon polobosi, malaalan tukon panakit.”

¹³Maka yaku bantil, “Ode TEMENENO Moinakatandak Tuuno, Ikoo toiyo konabi-nabi lapamo bantile doi rayat baikon akiyono naikon kopolobosian kai komalaalan, sabab Ikoo baikon lapamo berjanji doi tano nia sidutu daano koperdamean.”

¹⁴Bai TEMENENO timbiliyo, “Nabi-nabidoo mababa bilita mokala luwedoi Sambunggu. Yaku aki kubetekene yanila, tukon aki koidan mobee parentah kai basilinggan doi yanila. Batokitaan-batokitaan yanila mosalitayo bolikon luwedoi Yaku; yanila lamale langge-langge moakiyo kotakoso yanila mokalange susuungo.

¹⁵Yanila bantile luwedoi Sambunggu baikon tanonia akimokai nailobosi kai malalan, banggokai Yaku aki sumboliyo yanila mobantile doiya. Yaku, TEMENENO, bontiikene doi komiu, Yeremia, oila naikon Daku kinubai tukon nabi-nabi moaki Kuutuse. Yaku naikon akateo yanila tukon lobosio tukon malalan.

¹⁶Mian-mian molapamo matalima yanila naramalan-ramalan naikon inokate tukon pokakana konacara. Yanila bajanno naikon sinakukon doi Yerusalem loloon-lolonno akiyo kokibule. Bunomo doiya yanila nanasib napau tukon naboloki. Yaku kubayo yanila narasakanggene konakulokisan.”

¹⁷TEMENENO sumboliyo yaku mobotikene daku pinolongon doi Naumat. Yaku sio bantil bunoniia; “Sodiiiyomo yaku kokiil akiyo konadean, oloyo popook tulo-tulo komatano paisuno. Sabab daku bangsa babasal kona dedeng tukon mandarita tuuno.

¹⁸Kalukai yaku dombalaa doi padang kukitayo kobajan-bajan mokulban polobosian. Doi kota lalomo yaku kitayo kosakisaan, komian-mian kabino mate malaal. Nabi tukon imam lakukanggene ko nalimang aki namangalatikene oila yanila nailimang.”

¹⁹Lapamokai TEMENENO tolake tuuno Yehuda, tukon modungoliyo ko Sion Ikoo misikitene? Bulaando buno doiya momolosi Ikoo bobokiyon kami tobikon kami koidan akimo natangalin? Palasuma tolong kami mounggoliyo koperdamean, akio kona mototuk kami moinikene kotangalinan, sabab komo daano tolongo motikasan.

²⁰TEMENENO telhadap Ikoo tolong kami baladosamo. Kami mangkukenemo komai lalim susungo tukon lalim komai mbumbu.

²¹Neneekekai naikon Komu perjanjian, inai Ikoo totulaiyo kami; Muperjanjian doi kami; inaikai Ikoo putuse. Yerusalem tampat Mukadukan mo monondok inaimokai Mutotulayo.

²²Ilah-ilah bangsa-bangsa aki namoola molobosonggon udan doi dunia. Timbu kai aki namoola koidan nalebesenggene koudan tukon nakuasa susungo. Tolongokai Ikoo komai minoinikon. Ikoo kubayo saibinodoo teali.