Read Banggai YEREMIA 15 Bible Online

YEREMIA 15 - Banggai bible

YEREMIA 15

¹ TEMENENO bantil doi yaku, “Yaku akimo naikon Kuseange bangsa nia, maukai Musa tukon Samuel kokondong dimbaa sulano nakabiyo Daku maasi tuuk yanila. Sumboliyomo bangsa nia nataus, Yaku akimo kuyase kitayo yanila!

² Kalu yanila masadai doi komuyu doi yaandoo yanila natausan, timbiliyo buni nia, “TEMENENO bantile, motinantukon sulano namate sabab masakit sodiyomo yana mate sabab panakiton. Motinantukon sulano namate doi polobosian lalomo sodiyomo yana mate polobosian lalomo. Motinantukon sulano mate sabab malaal sodiyomo yana mate malaalan! Motinantukon sulano yana natinaan, sodiyomo yana biningkat buno taanan!”

³Yaku, TEMENENO, lapamo tantukene sangkap baikon koukuman mominatakuton naikon teali doi yanila: yanila naikon silaka doi polobosian lalomo, yanila bajano asu kaane, tomisi kaane, tukon iyayon mobarani akabusemo.

⁴ Yaku naikon mokubaikene saibino kobangsa doi dunia yanila kitayo matakutene. Saibino doya Kukabaiyo sabab Hizkia namalane Manasye nakokubai doi Yerusalem salataa yana teali tomundo doi Yehuda.”

⁵TEMENENO bantile, “He modungoliyo ko Yerusalem, indekai naikon komo seseange komuyu? Indekai komo yase tukon komiyu masusah konoano? Indekai moyase sambu tuuk masadaikene komu kadaan?

⁶Komuyu tolakemo tukon tinggalemo Yaku, tobikon doya Kubingkate kolimanggu tuuk moakabuse komuyu, sabab Yaku pakadako motaane Daku nggimalan.

⁷Doi samba kota doi tano nia komuyu naikon Kusakukene buno limbut. Maukai komuyu daanon Kuumat maukai Yaku naikon moakiyenggene komuyu tukon mupau-pau sabab komuyu aki poyase boliyo kopo tubuan.

⁸Komutano naikon moono tukon bauntal, lobian kona kadaang bone doi pante. Komian-mian Kuakateo naikon doi tempo napamudaan sulano yanila tinano namandarita. Doi oloyo dodoano Yaku lubatene doi yanila meeng komian mangakate sulano yanila namatakut tukon moiyos.

⁹Tina pitu kona malane molapus padut sabab kona ansang modipot. Kona oloyo tuboan tealimo moloyu, yana lasayo tinotulai tukon inakamaa. Komu musuh-musuh Yaku sumboliyo mangakate modaano tubo doi antara komuyu. Yaku TEMENENO, lapamo basilingan.”

¹⁰Bisa soe yaku nia! Tuuk oila tinanggu suunge yaku? Tukon samba komian naitano nia yaku sio pogagai tukon pobanta. Maukai yaku aki mongisabukene kai masabol, doi saibno komian batotopikene yaku.

¹¹TEMENENO kalu yaku bisa aki kulakukene daku limang tukon monondok, tukon aki nabelayo komusuh-musuh doi Salaano doi tempo yanila malaat silaka tukon susah, sodiiyomo doo mian-miano natotopi bisa-bisa teali. (

¹²Akiyo komeeng komian kai momoola lotoyo kobesi, utamanyo besi moluwe doi lembet molapamo pinosombulikon tukon tambaga.)

¹³TEMENENO bantil doi yaku, “Yaku naikon makapatu musuh moakateo kokaasaan tukon Kuumat nabuat salaku ukuman doi lalim-lalim molapamo yanila lakukene posaapon kotano.

¹⁴Doitano moddon yanila moaki tingoniyo, Yaku naikon tealikene yanila ata doi yanila namusuh-musuh, sabab Daku nggimalan tuuno meluapo buno aung mokait tukon aki naposo.”

¹⁵Maka yaku bantil, “TEMENENO, Ikoo mangalati. Neneeke tukon tombonio yaku. Balese yanila mololonggon tukon mopipike yaku. Inaikai motodudul sabar doi yanila tobikon sio daano kohasilo moakateo yaku. Neneekai baikon sabab Ikoomokai maka yaku tinotulai.

¹⁶Ikoo basilingan doiyaku, tukon yaku mondungoliyo samba Komubantilan. Yaku Komumumo, oh TEMENENO Mian Bisa Mobabasal Konakuasa, tobikon doiya Komubantilan-bantilan mokonoiyo tukon mokindedekene yaku.

¹⁷Yaku aki kutulutiyo basa-basanaang tukon mian-mian mopototongi tuuk popiada. Sabab taat doi Koo, maka yaku basusunganggon tukon noa nggimal.

¹⁸Bulaando yaku banggadudul tolong mosakisaa? Bulaando daku pakoloo babasal tukon aki natanga-tangalin? Oilahkai Ikoo mumakisud kubayo yaku kecewa buno paisu batango moteali motuul doi musim pital?”

¹⁹TEMENENO timbilio, “Kalu ikoo abali, Yaku naikon talimayo ikoo. Ikoo naikon teali koidan Kuata. Kalu ikoo bobilitakene kolangge-langge modaano kona tuuk tukon bolikon mokala-kala, maka ikoo moola teali koidan Kunabii. Komian-mian naikon lubat koidan doi komuyu tukon akimo napalalu ikoo taus doi yanila.

²⁰Ikoo naikon Kutealikene buno benteng tambaga telhadap yanila. Yanila naikon lobosio ikoo, bai aki naikon nakalayo ikoo. Yaku naikon lolainggon tuuk lindungiyo tukon salamatene ikoo.

²¹Yaku naikon sodiiyo ikoo luwedoi mian-mian molokis nakakuasaan mokejam, Yaku, TEMENENO, lapamo basilingan.”