Read Banggai YEREMIA 17 Bible Online

YEREMIA 17 - Banggai bible

YEREMIA 17

¹TEMENENO bantile, “He bangsa Yehuda, komu lalim lapamo binotik doi noamu, tukon doi sasaibino komu balabang-balabang pasuno tukon pena besi komatano pena luwedoi intan.

²Komu mian-mian mobakaleda doi balabang-balabang tukon pilogot nasudong-sudong molapamo kinokondong tuuk Dewi Asyera molukono doi samba kokayung momolumbang, doi bunggul popuuto,

³tukon doi bunggulkon-bunggulkon doi kota tonggulungo. Sabab saibino kotampat basosubaan doi pilogot komuyu lapamo kekendenge doi sasaibino kotano tukon sabab saibino molapamo komuyu lakukene, maka Yaku naikon kubayo komu musuh-musuh akute saibino kobuat tukon mukasaan.

⁴Komuyu naikon telpaksa beekene kobuta molapamo Kubeekene doi komuyu, tukon Yaku kubaiyo komuyu loloiyomo doi pomusuh doi tano pokakana tuuno mobolu doi koo. Yaku lakukene saibino doo sabab todudulo Daku nggimalan buno aung mokait tukon akimo nateali pinosoi.”

⁵TEMENENO bantile, “Kalu kai komian tinggalemo Yaku, na TEMENENO, tukon moini doi banggapi tukon balanggene doi nabukuanan, maka yaku naikon ukume yana.

⁶Yana buno lobo sinakukon motubo doi padang, dai buta motuul, kiis tuuno tukon daano kotimusono, akinabiasa yana taupe konamonondokan.

⁷Bai mian momoini doi Yaku naikon sidutu Kubalakaatio.

⁸ Yana bunokai kayung doi paisubatango bibilo mo mololoong; koanggolo landa polong doi paisu. Yana aki namatakut doi tempo pital lalomo, koloon-loono sidutu manampal. Maukailakon kotano mo motuulo, yana aki naiyos sabab yana sidutu daano kosaohno.

⁹Kobanggapi noano aki ndatoiyo, pandoi tuuno luwedoi sasaibino tukon todudulo paya konapanakit.

¹⁰ Yaku, TEMENENO, solidikio konoa kobanggapi noano Kuujio. Samba komian naikon Kubalase mololoi nakakabai, tukon Kulakukene pokokonoi tukon nakakabai.”

¹¹Bunokai tomisi salopio konanggalau mobolikon koona, bunomokai komian moaki najujur malaat buat. Doi umur namotuan yana naikon konabuat lapus sasaibino. Doi bundu konatuboan tinoimo yana mian mobodo tuuno.

¹²Nda TEMENENO Na Bonua buno kulusi batomundoan momonondok, doi bunggukon motatandak daanon doi lolukoo.

¹³TEMENENO, Ikoomo kai Muumat Israel namoinian; sasaibino mo tinggalemeokai Ikoo naikon teali mamaa. Yanila naikon lapus luwedoi dunia nia tukon taus doi mian mate nalipu. Sabab, Ikoo paisu tuboan naluwean, naluwean yanila tinggalemo, oh TEMENENO.

¹⁴TEMENENO alinekai yaku, maka yaku naikon teali, tangalin. Salamatene yaku, maka yaku naikon salamat. Ikoo tolongomo kukabasalon!

¹⁵Komian bantil doiyaku, “Inandomo saibino ko TEMENENO napanganukon doo? Sodiiyomokai diabudodoo nakinubaimo!”

¹⁶Bai, oh TEMENENO, aki nabiasa yaku desaake sulano Ikoo lubatene kosilakaan doi yanila. Yaku koidan aki memetene sulano yanila kanakon kasusahan. Ikoo toiyo doiya, TEMENENO. Ikoo toiyo oila daku binantil.

¹⁷Inai kai Ikoo teali meeng kolobo konoanggu momatakutene. Ikoo tampat kudampasan kalu lubat kokasukalan.

¹⁸Boliisi molelenggene tukon mopipike yaku. Ikoo akamaayo tukon Ikoo konoiyo tukon matakut. Bai inaikai momokubai bunodoiya doi yaku, oh TEMENENO. Lubatenemo komalapetaka doi yanila sampe yanila binasa.

¹⁹TEMENENO bantil doi yaku, “Yeremia, tauso doi Rakyat Natataapon Babasal tomundo-tomundo Yehuda mololoiyo kalu kai yanila sumbut usok kota. Tauso kai koidan doi sasaibino kotataapon babasal bailonggon doi Yerusalem.

²⁰Pelenggene kai Daku teteba doi tomundo-tomundo tukon sasaibino ko Yehuda miano tukon saibino modungoliyo ko Yerusalem moalo doi tataapon-tataapon doo.

²¹ Bantilekai bunonia: ‘Kalu komuyu aki yase mate, inaimo mobingkat barang doi oloyo Tadean; kai babayo usok lolo doi Yerusalem tataapono-tataapono babasal.

²² Inai balimang kai mababa barang oilano sumbut luwedoi mubonua doi oloyo Tadean. Alasemokai oloyo doo tuuk Yaku buno molapamo Kupinarentakon doi pombumbu.

²³Bai pombumbu aki yase mondongoli kai mopalatikanggene oila Kubinnantil. Yanila motikas konoano, tukon aki yase taat kai liniokon.

²⁴Taatiokai saibino Kuparentah. Inai mobinggate, barang oilano kai mololo doi kota nia tapono babasal doi Oloyo Tadean. Alasemokai, oloyo Tadean tuuk Yaku, tukon inaimokai molimange oilano doi oloyo doo.

²⁵Kalu komuyu tuu-tuu moampakonkene Kuparentah-parentah doo, maka tomundo-tomundo tukon sambu-sambu momaparentah buno Daud naikon mongusoki tataapon-tataapon kota Yerusalem. Yanila polaing Yehuda miano tukon modungoliyo Yerusalem naikon molokiti kereta adalan, tobikon kota Yerusalem teali lame tuuno.

²⁶Komian-mian naikon lubat luwedoi kota-kota Yehuda, tukon luwedoi kampung-kampung potikunggon ko Yerusalem; yanila naikon lubat taikon doi Benyamin, luwedoi taikon bunggul uuno, luwedoi taikon bunggukon, tukon luwedoi Yehuda taikon lalom. Yanila naikon mababa doi Ku Bonua iyayon-iyayon sosubakon, mau motuuk sinua mau moaki, koidan sosubakon gandum tukon kamangian tukon sosubakon syukur.

²⁷Saibino doiya naikon teali kalu kai komuyu taat doi Yaku tukon alaase oloyo Tadean tuuk Yaku. Inai moakute barang oilano lolo doi tataapon-tataapon babasal doi Yerusalem doi oloyo doo. Kalu komuyu langgalemo Kuparentah-parentah doo, Yerusalem tataapon-tataapono babasal tukon nakamali-kamali naikon Kusuayo kabus tukon aung doo aki naikon laate pinosoi.’ ”