Read Banggai YEREMIA 18 Bible Online

YEREMIA 18 - Banggai bible

YEREMIA 18

¹TEMENENO bantil doi yaku,

²“Tauso doi mokubayo kotobunang nabonua; indaa naikon Kupelenggene doi koo Kuteteba.”

³Maka Yaku tauso doi mokubayo kotobunang nabonua tukon Kukitayo yana daanon mobalimang tukon mongobulenggon.

⁴Kalu kai tobunang mo daanon moilimang doo aki talakana, yana nalimangano abali teali tobunang bailon pokonoi tukon namongiasan.

⁵Maka TEMENENO sumboliyo yaku mobantile doi umat Israel.

⁶“He Kuumat bulaando Yaku aki laate mokubai doi koo buno tukango nailakukon tukon buta makalambulut? Buno buta makalambulut doi tukang tobunang limano lalomo, bunomo kai koidan komuyu doi limanggu lalomo.

⁷Kalu doi meeng kotempo yaku putusiyo tuuk pakisayo, molubange tukon momanase meeng kobangsa kai batomundoan,

⁸maka bangsa doo babolii luwedoi nalalim, maka Yaku naikon akienggene Kuniat doo.

⁹Kobaliko, kalu kai Yaku moputusiyo tuuk mokokondong kai mokenggele meeng kobangsa kai nabotomundoan,

¹⁰bai lapa doiya bangsa doo aki nataat doi Yaku maka lakukene molokis, maka Kuniat doo naikon Kuakiyenggene.”

¹¹TEMENENO bantil doi yaku, “Diabudodoo, bantilemokai doi Yehuda mian-miano tukon modungoliyo Yerusalem baikon Yaku daanon mokubai rencana tuuk lawane yanila, tukon sadiayo koukuman tuuk yanila. Sumboliyomo yanila tadekene cara yanila tuboan mobaladosa doo tukon mokindedeke yanila nakalakuan tukon nakakabai.

¹²Bai yanila naikon timbiliyo, ‘Oila kotakoso? Kami naikon tataap loloiyo komai mongiasan susuungo! Kami suwe-suwele naikon lakukene konoanggami molokis nainias!’ ”

¹³TEMENENO bantil, “Masadaikene doi samba kobangsa oilakai biasa teali langge buno naia. Umat Israel lapamo lakukene kolobo mominatakuton!

¹⁴Aki nabiasa kokobung akiyo luwedoi bunggul batu doi Libanon. Aki nabiasa kopaisu memel momololong doi bunggukon teali motuul.

¹⁵Bai Kuumat toliminggene Yaku, tukon mosua kamangian tuuk pilogot. Yanila takait doi loloon looluk mo sio yanila loloiyo, maka lias doi loloon moakiyoon nainalata.

¹⁶Tano nia lapamo yanila tealikene tampat mominatakuton tukon sidutu teali langge mosinosibolii. Saibino mo alokon naikon pasekene kooluno sabab rasayo matakut.

¹⁷Buno ambata mombuul talise puul, bunomo kai doiya Kuumat naikon Kusalakanggene doi musuh salaano. Kalu kai lubat kosilaka, Yaku naikon totonggulunge yanila tukon aki motulungi yanila!”

¹⁸Komian bantile, “Maimo kita mokubai kompolotan molawane Yeremia. Bolikon tolongo yana mobisa basilingan tuuk Mian Bisa. Sidutu naikon daano koimam momola mebee otunggul, daanon komian mopandoi momoola mongotinau; tukon daano konabii momoola pelenggene doi kita teteba-teteba luwedoi Mian Bisa. Maimo kita ajukanggene yana doi pangadilan tukon akimo koidan mondongolii nabantilan-bantilan.”

¹⁹Maka yaku sambeang, “TEMENENO ndongoliyomokai daku sambeang; palatikanggene kai oila mobinantil kumusuh tantange Yaku!

²⁰Moolakai komonondokan binalas tukon kulokisan? Bai yanila lapamo makali buang sulano yaku tuwong doi lalomo. Nenekemo baikon yaku lapamo belayo yanila doi Salaan-Mu, sulano Ikoo inai monggimal doi yanila.

²¹Bai diabudodoo, TEMENENO, sodiiyomo yanila napau-pau mate malaal kai mate doi polobosian lalomo. Sodiiyomo yanila naboi-boine nalapus, kalukai tukon napau; sodiiyomo komala-malane mate sabab panakit tukon mian mongula mate doi polobosian lalomo.

²²Sumboliyomo kopalampok lubat tukon sosinggot doi yanila nabonua, tobikon yanila kilison matakut. Yanila lapamo makali buang sulano yaku tuwong doi lalomo, tukon yanila lapamo pasange kotalong tuuk lakoyo yaku.

²³Bai Ikoo, TEMENENO, toyo saibino yanila morencanakene akabuse kobutonggu. Tobikon doiya, inai moompunio yanila inai mohapuse yanila nakasalahan. Bobokiyo yanila polong otuwong. Tindokiyo doi yanila doi Munggimalan lalomo.”