Read Banggai YEREMIA 19 Bible Online

YEREMIA 19 - Banggai bible

YEREMIA 19

¹TEMENENO sumboliyo yaku taus mongoli gumbang, tukon ajake kobubula komokatuaiyo kobangsa tukon bubula ko imam molaka-lakaimo,

² tuuk taus polaing-laing yanila doi Pepelakon Hinom lolo doi Beling Tataapono Babasal. Indaa yaku sio popitoikene oila Kona tinetebaikon doi yaku.

³Yaku sio bantil bunonia, “He tomundo-tomundo Yehuda tukon modungoliyo Yerusalem! Ndongoliyomo oila komo Yaku, TEMENENO Mobabasal Konakuasa, Mian Bisa Israel kabi kubantile doikoo. Yaku naikon molubaton silakaan mobabasal doi tampat nia tobikon mian mondongolii sosibong.

⁴Langge doo Kulakukene sabab bangsa nia lapamo tinggale Yaku. Yanila kodikitio tampat nia tukon mososubakon-sosubakon doi ilah-ilah molulubaton tuuk yanila, tuuk yanila nambumbu tukon tuuk tomundo-tomundo Yehuda. Yanila koidan lapamo isiyo tampat nia tukon sauh mian-mian moakiyo kona salah.

⁵ Yanila mokokondong balabaang tuuk Baal tuuk yanila mososubakene kona pau-pau salaku sosubakon mosinua, banggokai Yaku aki mosumboli yanila molakukene langge doo, tukon aki naperna sumbut doi Kupikiran lalomo.

⁶Tobikon doiya, naikon lubat kotempono tampat nia akimokai nasinumbuikon Tofet kai Pepelakon Hinom, baikai Pepelakon Batembelan.

⁷Doi tampat nia Yaku naikon batalkanggene saibino ko Yehuda miano narencana tukon modungoliyo ko Yerusalem. Yanila naikon Kusodiikene komusuh-musuh nakalayo yanila tukon nainakate doi polobosian lalomo. Yanila bajano naikon Kusoodikene tomisi kaane tukon iyayon mobarani.

⁸Yaku naikon lubotikene kosilakaan mobabasal doi kota doo tobikon samba komian moalo idoo naikon sosibong tukon matakut.

⁹Musuh naikon lobosio kota nia, tukon balausaha akateo kopodungolino. Polobosi doo hebat tuuno, tobikon mian-mian doi kota doo lalomo kaane kotulano tukon yanila kaane kona pau-pau susuungo.”

¹⁰Lapa doya TEMENENO sumboliyo yaku mopasayo gumbang doo doi mian-mian molainge yaku salaano.

¹¹Yaku sio bontiikene doi yanila baikon TEMENENO Mobabasal Konakuasa bantile buno nia, “Bangsa buno tobunan momapasah doo moaki namoola kinindok koidan. Komian naikon mokubule yanila nabajan-bajan doi Tofet, sabab akiyono koidan kotampat bakubulan bailolonggon.

¹²Kota nia tukon modungoliyo naikon Kutealikene buno Tofet.

¹³Saibino kobonua doi Yerusalem tukon saibino kotomundo-tomundo Yehuda nabonua naikon teali madikit buno Tofet; sabab doi ato bunggono bonua-bonua doo komian lapamo mosua kamangian — tuuk ilah-ilah timbu, tukon mososubakon anggur tuuk ilah-ilah bailon.”

¹⁴Maka yaku tinggale ko Tofet, tampat yaku sinumboli mopelenggene TEMENENO na teteba. Yaku taus doi TEMENENO Na Bonua kintalo tukon kokondong idoo, maka bontiikene doi saibino komian,

¹⁵baikon TEMENENO Mobabasal Konakuasa, Mian Bisa Israel bantil buno nia, “Sabab komuyu motikas konoano tukon aki nayase mondungoliyo, maka Yaku naikon lubatene doi kota bunggono nia doi saibino kokampung doi potinkunggon saibino kosusaan molapamo Kurencanakene.”