Read Banggai YEREMIA 2 Bible Online

YEREMIA 2 - Banggai bible

YEREMIA 2

¹TEMENENO sumboliyo yaku

²moumumkanggene bilita nia doi sasaibino ko Yerusalem miano, “He Israel, Kuneneeke bulando komusatian doi tempo ikoo daano mongula; bukamaen mubabianan tunomo salataa kita pollaat. Doi padang bone Yaku ikoo laingaku mololoi daerah moaki nasinakai.

³Israel, ikoo Konggumo pribadi, noanggu natolongan Yaku moseange. Yaku lubatene kosilakaan doi saibino mokabayo ikoo mandarita, Yaku, TEMENENO, lapamo basilingan.”

⁴NDongolio TEMENENO nateteba, he ikomiu Yakub nakaturunan, Israel bense-benseno!

⁵TEMENENO bantil, “Salah oila mumbumbu nailaat doi Yaku, tobikon yanila hianatio Yaku? Yanila molonggon bapilogotan moakiyo koanggano tukon doi bundu yanila komeeng teali tinotulai.

⁶Yaku aki napinalahatikanggon; Yaku, molapamo pimpine yanila doi loloon, tukon babayo yanila sumbut luwedoi Mesir aloi doi padang bone, lipu motandus mobadaang kona peak-peakan, tukon motul koidan silaka — padang moaki nadinungoli tukon aki nailoloi!

⁷Doi lipu molumbah Daku antokanano yanila tuuk molasakanggene kohasil-hasilo tukon saibino komondok imbali. Bai idoo Kubuta yanila kodikitiyo tukon konggu yanila tealikene meeng kolobo mominisikiton.

⁸Saibino koimam akiyo komomasadai doi yaa Yaku, kona TEMENENO. Saibino komo tanio kohukum doo aki natoyo inde Yaku, saibino komobalakuasa malontako doi Yaku. Doi Baal sambuno saibino konabii basilingan, tukon susubayo kobalahala moakiyo kotakoso.”

⁹TEMENENO bantil, “Diabudodoo Daku umat Kupalakayo koidan; tukon nakatulunan Kuadiliyo.

¹⁰Manisikio kopasisil siplus taikon oloyo sopokan, bitekenemo komian doi taikon oloyo nasubutan doi lipu Kedar, palesayomo imbali tukon mono-monondok, oila kai idano nateali langge mopokakana?

¹¹Akiyon naidan meeng kobangsa poisobolikene kona temeneno maukai doya bolikan Mian Bisa motutuu. Bai Daku umat lapamo soboliyo Yaku, yanila nabinanggaakon tukon meeng kolobo moaki namoola makabi oila-oila.

¹²Tobikon doiya, hetimbu, palabiyoko! Tolongging tukon mbombokono!

¹³Daku umat lakukene lua kulupano kolalim: yanila totonggulunge Yaku, paisu noluwean mobena tuboan tuuk bangkapi; yanila makabai tuuk butongo kolam labe moaki nalaate tahane kopaisuno.”

¹⁴“Israel bolikon ata, bolikon koidan katulunan ata. Bai bulaakai yana motealimo nalawan silakaiyo?

¹⁵Kona musuh ngaaton doiyamo buno singa, nabuta teali motuul tukon akiyono, kona kota-kota kabus aung kaane, sinodiikono natotinggal akiyo komo dungoliyo.

¹⁶He Israel, mubuuk doi olumu pinatol; sio Memfis miano tukon Tahpanhes.

¹⁷Ikoo susumu kosabapo saibino moteali doi butomu; sabab salataa Kupolaing ikoo doi ampakonan ikoo totonggulunge Yaku, TEMENENO mu Mian Bisa.

¹⁸Oila konauntung ikoo motaus doi Mesir? Tuuk monginum Nil Paisuno batango? Oila konauntung ikoo taus doi Asyur? Tuuk monginum Efrat Paisuno batango?

¹⁹Mukolokisan susuumu ukume kobutomu, ikoo sakisaa sabab tolayo Yaku, mu Mian Bisa. Diabudodoo tamisekai bulaando mosopot tukon moonas kalu Yaku ikoo totonggulunge tukon aki muodotiyo. Yaku, TEMENENO mu Mian Bisa lapamo basilingan; Yaku TEMENENO mu Mian Bisa Moinakatandak Tuuno tukon Mobabasal Konakuasa.”

²⁰TEMENENO bantil, “Malumbito ikoo aki muyase balimang doi Yaku; aki naiyase motaatio kabai sosuba doi Yaku. Doi samba kobunggul bunggono motatandak, tukon doi bilit samba kokayung momasalimbung, ikoo sosuba doi ilah-ilah molumbaang.

²¹Ikoo Kusakakene buno anggur batango, mo yaku lilike luwedoi kolibuang momonondok. Bai dia budodoo ikoo tobolii, teali mosinakakon mbosolo tukon akiyo kotakoso.

²²Muakai ikoo masau tukon mapake sabuun badang tuuno, bai mukasalahan noda-nodano daanon motokita koidan doi Yaku.

²³Ikoo bisa barani bantil baikon ikoo aki nggimolon tukon baikon Baal aki nabiasa kulainge! Kitayo mukalakuan doi pepelakon, neneeke mukulokisan tukon akuiyo! Ikoo bunokai unta molukono mobaudai, obulen dombalaa dosumai aki nalungguiyo,

²⁴maka usok doi padang bone mokiis. Yana aki namoola tinaan kalu daano baudai. Momemetene aki napalalu unggo-unggoliyo, sabab doi tempo yana balelek sidutu okitakene kobutongo.

²⁵Israel, inaimokai ikoo obulen mololonggon ilah-ilah, tukon inaimo wookon mouange yanila, naikon koaimu pokolong tukon bulungo kayungo motuul sabab molou. ‘Aki, yaku aki nanggoola abali,’ ikoo bantil, ‘sabab yaku kilakene ko ilah-ilah tukon yase lainge yanila.’ ”

²⁶TEMENENO bantil, “Buno pondikuk lasayo mamaa salataa ilako bunomodoiya komuyu saibino naikon lasayo mamaa, he Israel miano, tomundo-tomundo tukon mupajabat-pajabat, imam-imam tukon munabi-nabii!

²⁷Komuyu naikon inakamaa, sabab meeng kokayung patolo uange tama tukon meeng kobatu komuyu aunge tina. Komuyu bolikonkai lubat doi Yaku, baikai otinggale Yaku. Bai kalu kai lubatene kosusaan, Yakumo komuyu nainuang tuuk lubat salamatene komuyu.

²⁸Inandokai mupilogot-pilogot komuyu nakinubai doo? Kalu daano kosusaan, sumboliyo yanila salamatene komuyu, kalu yanila bisa! He Yehuda, muilah-ilah pokana konakadaang mukota-kota!

²⁹Oilano kaliangano komuyu moaki posanaanggene Yaku maka komuyu lawane Yaku?

³⁰Palasuma tolong komuyu Yaku ukume, sabab komuyu aki poiyase matalima panganukon. Buno singa modaano momuluk, bunomokai komuyu akateo saibino komunabii.

³¹He Israel miano, ndongoliyo Kubantilan-bantilan nia. Biasamokai Yaku buno padang lalomo tuuk doi komuyu kabai buno buta mokalipookan? Bai bulaando komuyu bantil baikon komuyu yase bebas, tukon aki nayase koidan abali doiya-Ku?

³²Oilakai daano koboine motoliminggone kona palahiasan, kabai panganten boine motoliminggone kona kalambi panganten? Bai komuyu malumbito tuuno potolimingganano Yaku — tambun doi tempo moaki natangait konakalumbit.

³³Komuyu bisa pandoi mangatul siasat tuuk mokeete konoano komu bibian-bibian. Mau nalokis tuuno konabaloloan doo daanon moola balajal luwedoi komuyu!

³⁴Mupakean kanakon noda mian talalis sauhno tukon mian moakiyo konasalah, bolikon pondikuk sauhno moilako. Mau nabunodoiya,

³⁵komuyu bantil baikon komuyu aki nasalah, baikon Yaku akimo nanggimal koidan doi komuyu. Bai Yaku, TEMENENO, naikon ukume komuyu sabab komuyu daano koposalah.

³⁶Mosobit tuuno komuyu taus doi ilah-ilah bangsa bailon tuuk makabi tulung! Komuyu tantumo naikon ko Mesir moakamaayo, pokakana buno komuyu ko Asyur akamaayo.

³⁷Komuyu naikon tinggale ko Mesir manasal tukon mamaa. Yaku, TEMENENO, tolakemo yanila komuyu mobalanggene; komuyu aki naikon malaat kauntungan oi-oilah luwedoi yanila.”