Read Banggai YEREMIA 23 Bible Online

YEREMIA 23 - Banggai bible

YEREMIA 23

¹Israel na TEMENENO Mian Bisa bantil, “Silakamokai komuyu he saibino kokatua manase tukon mopoalasemo Daku umat! Komuyu siokai popialayo Daku umat, bai komuyu aki nalakukanggene; komuyu sodikene sasabul tukon obulen. Diabudodoo Yaku naikon ukume komuyu sabab mukulokisan.

³Bai Daku umat labi-labino naikon kupotongikene luwedoi tano-tano doi yanila lipu Kusakukanano. Yanila naikon Kubabayo abali doi yanila nabuta sinuungan tukon yanila nakaturunan naikon tosungi badaang.

⁴Yaku naikon oduke kokatua tuuk mopiala yanila. Kuumat akimo nomatakut kai mbombokon; akio komeeng komian luwedoi yanila naikon lapus. Yaku, TEMENENO, lapamo basilingan.”

⁵ TEMENENO bantil, “Naikon lubat kotempo. Yaku mongoduk meeng kotomundo moadil luwedoi katurunan Daud. Tomundo doo naikon moparentah tukon napandoiyan, tukon lakukene oila komoadil tukon mokana doi posapoon kotano.

⁶Kalukai yana maparentah, Yehuda miano naikon salamat, tukon Israel miano naikon tubo tukon aman. Tomundo doo naikon Temeneno sumbuikene Kasalamatan Kita.

⁷Naikon lubat kotempono komian akimokai na batotpi tongo Yaku, Mian Bisa motubo, mobabayo Kuumat Israel sumbut luwedoi Mesir,

⁸baikon tolongo Yaku, Mian Bisa motubo, momababa umat Israel sumbut doi meeng kotano doi lembet, tukon luwedoi saibino kotano bailon doiyandoo yanila lapamo Kupoalasene. Yanila naikon dungol doi natano susungo.”

⁹Naiyamokai daku teteba tentang nabii-nabii: Konoanggu susah tukon yaku mbombokokon. TEMENENO tukon Nabantilan momoliyous kubaiyo yaku buno momalangu motodudul monginuman badaang ko anggur.

¹⁰Ndatano nia moono tukon mian moaki nasatia doi TEMENENO. Yanila tubo lokis tukon salah gunakanggene yanila nakakuasaan. Sabab TEMENENO natotopi, bulung doi padang teali motubo tukon posaapon kotano susah.

¹¹TEMENENO bantil, “Nabii tukon imam aki naiyase taat doi Yaku. Tutuu Ku Bonua Yaku lapamo laate yanila mokubai lokis.

¹²Tobikon doiya, yanila naloloon naikon molondol tukon kalipookan, tobikon yanila takait tukon tuwong. Yaku naikon lubatene kosilakaan doi yanila, kalukai lapamo lubat kotempono tuuk moukume yanila. Yaku, TEMENENO lapamo basilingan.

¹³Lalim nabi-nabi Samaria Yaku kitayomo. Yanila basilingan atas Baal sambuno tukon kubaiyo sasaat Israel Kuumat.

¹⁴ Bai doi Yerusalem Yaku kitayo konabi-nabi lakukene komo lobian lokis koidan. Yanila bakala-kala tukon balolowa, tukon bantuwo komian momokubai lokis, tobikon akiyo komeeng komiankai moyase babolii. Tuuk Yaku yanila saibino lokis buno modungoliyo ko Sodom tukon Gomora.”

¹⁵TEMENENO Mobabasal Konakuasa bantil, “Naikon Kubeekene saibino doi Yerusalem doo mosinakukon mosopot tuuk kinaan tukon lasum tuuk moininum sabab yanila lapamo kubabayo kosabab mian-mian mosinumboli doi tano doo aki naodotiiyo Yaku.”

¹⁶Modungoliyo ko Yerusalem, TEMENENO Mobabasal Konakuasa bantil, “Inai momondongoli bantilan saibino konabi-nabi mosidutu tolongo beena moimian mo kosong. Yanila tolongo pelenggene yanila napokita susunggo tukon bolikon Kuteteba.

¹⁷Doi mian-mian moaki nayase mondongolii Kubantilan, yanila sidutu bantil, ‘Komuyu naikon salamat.’ Tukon doi samba komian momatikas konoano, yanila bantil, ‘Koo naikon aki malaat silakaan.’ ”

¹⁸Yaku bantil, “Akiyo komian meeng moluwedoi doi nabii-nabiidoo mongotoi oila modaanon doi TEMENENO napikilan lalomo. Akiyono moluwe doi yanila mobiasamo molongol tukon mangalati Kona rencana-rencana; akiyono koidan mopalatikanggene kai ndongoliyo Kona bantilan-bantilan.

¹⁹TEMENENO Nanggimalan bunokai mombuul makasaang momangamuk tukon mian-mian molokis linupa.

²⁰Kona nggimalan akiyo kona tadean akiyoon saibino Kona rencanakoon tokubai. Oloyo doibundu TEMENENO Naumat naikon mangalatikene langge doo tukon tontong.”

²¹TEMENENO bantil, “Nabii-nabii doo giat tuuno banggokai yanila aki Kusumboliiyo. Atas Kosambunggu yanila pelenggene kobilita, banggokai akiyo koteteba Kubineekon doi yanila.

²²Kalukai yanila toiyo komo daano doi Kupikilan lalomo, tantumokai yanila lapamo pelenggene doi Kuumat saibino molapamo Kubantile. Maka Kuumat naikon babolii luwedoi lalim-lalim tukon natingkah laku molokis.

²³Yaku Mian Bisa modaanon doi yaa-yaa bolikon doi meeng kotampat tolong.

²⁴Akiyo komian meeng kai molaate sekeme kobutongo luwedoi Kupokita, sabab Yaku daanon doi yaa-yaa; doi surgaa tukon doi dunia.

²⁵Saibino konabii-nabii nabantil, doo Yaku lapamo toiyo. Atas Kosambunggu yanila bakakala baikon Kuteteba lapamo yanila talimayo doi olumon.

²⁶Sampe oila kotempono nabi-nabi doo nasesatkanggene Kuumat tukon bilita yanila susuungo makalange?

²⁷Yanila pikikene baikon tukon olumon-olumon yanilamo salitayo doo, Kuumat laate toliminggene doi Yaku buno nambumbu toliminggene Yaku tukon sosubayo ko Baal.

²⁸Nabii moolumon siokai nabantile, ‘Naiya, tolongo olumon.’ Bai nabi momalaat teteba luwedoi Yaku siokai napelenggene teteba doo tukon nabisaan. Gandum aki namoola pinokakanakon tukon laing.

²⁹Kubantilan buno aung, tukon buno palu mo manase kobatu!

³⁰Yaku naikon lawane konabi-nabi mopelenggene koteteba moluwedoi tulano napokanaan, maka bantile baikon do teteba doo luwe doi Yaku.

³¹Yaku koidan lawane konabi-nabii mopelenggene nabantilan-bantilan susuungo maka bantile baikon luwedoi Yaku.

³²Yaku, TEMENENO, naikon lawane daku nabi-nabii doo mopelenggene naolu-olumon mo monoh kala-kalaan tukon yanila babanggal. Yaku aki mosumbolii nabi-nabiidoo. Yanila akiyono kotakoso tuuk Kuumat. Yaku, TEMENENO, lapamo basilingan.”

³³TEMENENO bantil, “Yeremia, kalu meeng komian luwedoi Kuumat, kai meeng konabi kai imam masadai doi ikoo, ‘Oila ko TEMENENO nateteba?’ Ikoo sio mutimbilio, ‘Ikoo mokai TEMENENO nabeban; sabab doiya ikoo naikon sinakukono.’

³⁴Kalu salah komeeng komian luwedoi Kuumat kai nabi kai imam modaano basilingan tentang ‘TEMENENO nabeban,’ maka yana tukon nakaluargaa naikon Kuukume.

³⁵Kobaliko, samba komian siokai namasadaikene doi tulano tukon doi nakaluargaa, ‘Oilamo potimbili moluwe doi TEMENENO?’ kai ‘Oilanokai ko TEMENENO nabinantil?’

³⁶Yanila akimo namoola koidan gunakanggene koistilah ‘TEMENENO nabeban.’ Kalu daano komo gunakanggene istilah doo, maka Yaku naikon tealikene Kuteteba tutuu beban tuuk yana. Komian bantile ‘TEMENENO nabeban’ tolongokai moputa-putale Kubantilan, yanila na Mian Bisa motubo, TEMENENO Mobabasal Konakuasa.

³⁷Yanila tolongo moola bantile konabi-nabii, ‘Oilanokai ko TEMENENO nabinantil? Oilanokai ko TEMENENO napotimbili doi komuyu?’

³⁸Kalu daano moaki nataat doi Kuparentah doo, tukon daano momapake istilah ‘TEMENENO nabeban,’

³⁹maka Yaku naikon mangala yanila, tukon lambitene yanila dodoon, mau yanila maupun kota molapamo Kubeekene doi yanila tukon yanila nambumbu.

⁴⁰Yaku naikon kubaiyo yanila mamaa tukon tinotulai tuuk posidutu-posidutukon tukon yanila natuboan doo aki naikon komian tomilinggene.”