Read Banggai YEREMIA 25 Bible Online

YEREMIA 25 - Banggai bible

YEREMIA 25

¹ Doi taun kosanggapo lapa doiya ko Yoyakim Yosua namalane teali tomundo Yehuda yaku malaat teteba luwedoi TEMENENO manganai saibino kobangsa Yehuda. Tempodoo taun komeengo Nebukadnezar tealimo tomundo Babel.

²Yaku bantil doi posapoon doi kobangsa Yehuda, tukon modungoliyo ko Yerusalem,

³“Lua kolono tolu kotaun kona kalumbit, mulai taun kosungulano tolu pamarentahan Yosia Amon namalani doi Yehuda polong oloyo nia TEMENENO lapamo basilingan doi yaku tukon aki naikon kotoliminggene pelenggene doi komuyu oila molapamo Nabantile. Bai komuyu aki popaduliyo.

⁴TEMENENO koidan banggadudulkene mbitokon doi komuyu saibino konabii Naata-ata, bai komuyu aki nayase mondongoli tukon palaatikanggene yanila.

⁵Yanila sumbolii yanila tinggale mutuboan molokis nacara, cara tukon mukakabai-kakabai mo baladosa, sulano komuyu moola tataap dungol doi tano nia, molapamo TEMENENO bekeene doi komuyu tukon doi mumbumbu salaku pusaka.

⁶Nabii-nabii doo pantane komuyu mososubaiyo tukon bakaleda doi ilah-ilah bailon. Yanila pantane komuyu mososuba doi pilogot-pilogot mukinubai susuumu sabab langge doo kubayo ko TEMENENO nggimal. Kalu komuyu loingiyo TEMENENO Naparentah-parentah doo, Yana aki naukume komuyu.

⁷Bai TEMENENO susungo bantile baikon komuyu aki pondongoliyo Yana. Komuyu tolongo manganikeene Nanggimal sabab mupilogot-pilogot doo. Komuyu susumuyu kai mo lubatene Kona ukuman doi butomuyu.

⁸Sabab komuyu aki poyase mondongolii Nabantilan-bantilan, maka TEMENENO Mobabasal Konakuasa bantil,

⁹‘Yaku naikon monguang saibino kobangsa luwedoi lembet, tukon koidan Kuata, Nebukadnezar tomundo Babel. Yanila naikon Kubetekeene polobosi molapamo lawane ko Yehuda tukon modungoliyo tukon saibino kobangsa mopokolani. Bangsa Yehuda polaing kobangsa-bangsa napokolanian naikon Kuakateo tukon Kusodiikene namanas tuuk posidutukon. Koimian-mian mokitayo naikon ngginggim tukon yanila matakut. Yaku, TEMENENO, lapamo basilingan.

¹⁰ Yanila naalalo-alalo motedes-tedes tukon lamean kolamean osoanan naikon Kuatadeo. Yanila akiyono kona minyak tana tuuk naposi, tukon yanila nagandum naikon kabuso.

¹¹ Posaapon natano nia naikon Kusodiikene namanas tuuk teali kiis. Bangsa-bangsa kopokolanian naikon mangangga doi tomundo Babel kona kalumbit pitu kolono kotaun.

¹²Lapa doiya Yaku naikon ukume kobangsa Babel tukon natomundo sabab yanila nadosa. Tano Babel naikon Kulubange tukon Kusodiikene namanas tuuk posidutukon.

¹³Babel naikon Kuukume tukon saibino kosilakaan molapamo Kurencanakene tuuk doi bangsa-bangsa tukon molapamo Kupopitoikene mololo doi Yeremia — doiyamo saibino kosilakaan mosinasat doi kitab nia.

¹⁴Palabuatan-palabuatan Babel miano naikon Kubalase; yanila naikon tomundo-tomundo babasal tukon badaang bangsa kubaiyo ata.’ ”

¹⁵TEMENENO, Mian Bisa Israel, bantil doi yaku, “Alayomokai galas anggur nia molapamo Kuisiyo tukon anggur Kunggimalan. Babayomo doi saibino kobangsa Yandomo doi bitokanano ikoo tukon sumboliyokai yanila inume naanggur nia.

¹⁶Kalukai yanila monginum, yanila mala-malanggu tukon akiyono konapikilan sabab polobosian Kulubatene doi yanila.”

¹⁷Maka yaku matalima galas anggur doo luwedoi TEMENENO limano, tukon taus doi posaapon kobangsa diyandoo TEMENENO nabitokanano yaku; maka yaku kubaiyo yanila inume anggur doo.

¹⁸Yerusalem tukon saibino kota doi Yehuda, tukon tomundo-tomundo tukon sambu-sambu kubeena monginum anggur doo, tobikon yanila teali buno padang momotuul tukon minatakuton. Polong doi oloyo nia yanila sambuno pinake salaku kutukan.

¹⁹Naiyamo komian-mian bailon sambuno natinulisan mo sio namonginum luwedoi TEMENENO nagalas anggur doo: tomundo Mesir tukon sasaibino kopagawe tukon nasambu-sambu; saibino ko Mesir miano tukon mian molulubaton doi Mesir; saibino kotomundo doi tano Us; saibino kotomundo kota-kota Filistin doi Askelon, Gaza, Eklon; saibino komian modaano tubo doi Asdod; saibino ko Edom miano, Moab tukon Amon; saibino kotomundo Tirus tukon Sidon; saibino kotomundo doi lipu Tobun Tangano bibilo; kota-kota Dedan, Tenna, tukon Bus; saibino komian moguntige pependek kona buuk; saibino kotomundo Arab; saibino kotomundo bense-benseno moposombuli modunggol doi padang lalomo; saibino kotomundo doi Zimri, Elam, tukon Madai; saibino kotomundo doi lembet, modoon tukon lolani, meeng komian doi meeng komian. Saibino kobangsa doi posaapon, kodunia bunggono sio namonginum anggur doo. Tukon mian modoibundukon mosio namonginum anggur do(...)

²⁷Maka TEMENENO bantil doi yaku, “Bantilemokai doi mian-miano baikon Yaku, TEMENENO Mobabasal Konakuasa, Israel na Mian Bisa, sumboliyo yanila monginum sampe malangu tukon tolu-toluwe. Yanila otuwong sabab nakubai tukon akimo namoola bangun koidan sabab polobosian Yaku lubatenne doi yanila.

²⁸Tukon kalu yanila aki nayase matalima nagalas doo luwedoi limamu tuuk monginum naanggur, bantilemokai baikon TEMENENO Mobabasal Konakuasa lapamo maparentakene langgedoo.

²⁹Yaku naikon atambunemo komanasano doo doi Kukota susungu. Inai sampe yanila anggene baikon yanila aki naikon nainukum. Yanila pasti naikon inukum sabab Yaku naikon molubaton polobosian doi sasaibino kobangsa doi posaapon kodunia bunggono. Yaku, TEMENENO Mobabasal Konakuasa, lapamo basilingan.

³⁰Saibinodoo Kubanikanggon komuyu, he Yeremia, sio mupelenggene. Bantilemokai doi yanila, ‘TEMENENO nalalo bulungan luwedoi surgaa; luwedoi Nadungulan momoliyous Yana momuukan lawane Kona umat. Sumboliyo modungoliyo kodunia, ndongoliyo Yana nakilison buno mobalimang mo pisse koanggur doi tampat baumbasonan.

³¹Polong doi dunia bunduno Konalalo bulungan; TEMENENO makabay, palakara terhadap bangsa-bangsa. Saibino komian naikon inadili tukon molokis naikon inukum mate.’ ”

³²TEMENENO Mobabasal Konakuasa bantil, “Luwedoi dunia bundu-bunduno mumukkano komombul makasang, silakaan lupayo kobangsa-bangsa meeng tukon meeng.”

³³Doi oloyo doo TEMENENO akateo komian daango naikon kobajanno tasabukon posaapon kodunia bungguno. Yanila naikon aki nakinokiili, aki koidan nabiningkat tuuk mokinibul, baimokai sinoodiikon tolong doi buta limbut nainatambuna.

³⁴He katua-katua, he saibino kopototolii ko TEMENENO Naumat! Kokiilo kokobukuan! Banggo-banggolinggono doi ambata lalomo, sabab lapamo lubat doi napinoalasonan. Komuyu naikon buno pipa moanokoanggano motuwong tukon mapasah.

³⁵Komuyu tantu aki naikon nalolos.

³⁶Komuyu susah tukon kokiil tukon susah sabab TEMENENO doi Nanggimalan lalomo lapamo akabuse komubangsa tukon manasemo komulipu moamanoo.

³⁸Buno singa sumbut luwedoi nabuang, bunomolakon TEMENENO sumbut tuuk hukume Konaumat. Polobosian moakiyo koseang tukon TEMENENO Nanggimalan boliyomo nalipu nia tealimo padang lalomo.