Read Banggai YEREMIA 28 Bible Online

YEREMIA 28 - Banggai bible

YEREMIA 28

¹ Taundo koidan doi bituwon kolimano taun kosanggapo Tomundo Zedekia namaparentaan, Hananya Azar napau, meeng konabi doi kota Gibeon, posilingonii yaku doi TEMENENO Na Bonua. Doi imam-imam salaano tukon rayat yana bontiikene doi yaku,

²baikon TEMENENO Mobabasal Konakuasa, Mian Bisa Israel bantil bunonia, “Tomundo Babel nabukuanan lapamo Kulungguiyo.

³Tempo lua kotaun lalomo yaku naikon abalinggene barang-barang luwedoi Kubonua, molapamo Tomundo Nebukadnezar akute doi Babel.

⁴Yaku naikon koidan babayo abali Yoyakhin Yoyakim namalane tomundo Yehuda, polaing saibino korayat Yehuda molapamo inakut doi Babel. Tutuu, Yaku naikon lungguiyo Babel nabukuanan. Yaku, TEMENENO, lapamo basilingan.”

⁵Maka doi imam-imam salaano tukon doi saibino ko rayat mokokondong doi TEMENENO Na Bonua doo, yaku bantil doi Hananya,

⁶“Monondok! Kinatauwan-kinatauwan tolong mulamaran doo teali natokitaa, tukon TEMENENO bisa-bisa babayo abali luwedoi Babel barang-barang doi TEMENENO Na Bonua polaing tukon saibino molapamo sinakukon indaa.

⁷Bai ikoo, Hananya, tukon komuyu saibino, he rayat, ndongolio nia.

⁸Nabi-nabi tempo kita akiyon nalapa lamalkanggene baikon polobosian, kokasusahan, tukon batomundoan mobuku-bukuan.

⁹Bai nabi molamare kadaan modame, tolongo moola nainakui salaku nabi tomundo motutuuno-tutuuno TEMENENO bitekene, kalu nalamaran-lamaran teali tokita.”

¹⁰Maka Hananya salinggut pinanga luwedoi olunggu tukon yana lotoyo.

¹¹Doi sasaibino korayat salaano modaano idoo, yana bantil, “TEMENENO bantil baikon buno nia kona cara yana naikon lotoyo kopanga Tomundo Nebudnezar mopaase doi sasaibino kobangsa oluno; TEMENENO naikon lakukene tempo lua kotaun lalomo nia.” Lapo doiya yaku kai tauso.

¹²Aki namalumbit lapa kadadianoo, TEMENENO sumboliyo yaku

¹³taus doi Hananya tuuk bontiikene bunonia, “TEMENENO yana naikon bantil baikon ikoo tolong moola lotoyo panga kayung, bai Yana naikon soboliyo tukon panga besi.

¹⁴TEMENENO Mobabasal Konakuasa, Mian Bisa Israel, bantil baikon Yana naikon paase kopanga besi doi saibino kobangsa nia oluno, tukon yanila naikon baata-ata doi Nebukadnezar, tomundo Babel. TEMENENO koidan bantil baikon iyayon barani doo naikon Yana salakanggene doi Nebukadnezar nakakuasaan.”

¹⁵Saibino doo kupelenggene doi Hananya, maka yaku bantil koidan, “NDongoliyo, he Hananya! TEMENENO aki nabitekene ikoo; ikoo lapamo kabaiyo bangsa nia maangga doi bantilan mokala.

¹⁶Tobikon doiya TEMENENO susungo bantil baikon ikoo naikon inakiyonggo-No luwedoi dunia bunggono. Taun nia koidan ikoo naikon mate, sabab ikoo lapamo sumboliyo bangsa nia nalawane ko TEMENENO.”

¹⁷Maka taun nia koidan doi bituwon kopituno, Hananya matemo.