Read Banggai YEREMIA 29 Bible Online

YEREMIA 29 - Banggai bible

YEREMIA 29

¹ Yaku batulis sulat doi imam-imam, nabi-nabi, katua-katua, bangsa modaano motubo, tukon doi saibino komian bailon molapamo Nebukadnezar akateo luwedoi Yerusalem doi Babel.

²Sulat doo daku tulisano lapamo Tomundo Yayakhin, tinano, pagawai-pagawai kamali, sambu-sambu pamarentaan Yehuda tukon Yerusalem, saibino komolole, tukon saibino komohalimang komopandoi inakut doi masakukonan.

³Yaku kilime sulat doi Elasa Safan napau, tukon Gemarya Hilkia napau Zedekia tomundo Yehuda bitekene doi Nebukadnezar tomundo Babel. Sulatoo nabantilan,

⁴“Bunonia TEMENENO Mobabasal Konakuasa bantil, Mian Bisa Israel doi saibino komian molapamo sinakukon luwedoi Yerusalem doi Babel:

⁵‘Manataapo idoo. Bangunemo komu bonua. Bukayomo komuasi tukon talimayo kona hasil.

⁶Osoamo sulano komuyu malaat pau, tukon sobiyomo mupau-pau koidan osoan sulano yanila doo malaat pau. Mukadaang sio tosuungi tukon aki namoola kurang.

⁷Balimango tuuk kota-kota namomondokan tampat Kusakokanano komuyu. Posambeang doi Yaku tuuk kota-kota doo nakapantingan, sabab kalu kota-kota doo monondok, komuyu kai naikon monondok.

⁸Yaku TEMENENO, Mobabasal Konakuasa, Mian Bisa Israel, moingotikene komuyu sulano inai mosodiikene kobutomu nabi-nabi modungol doi komuyu tipuwe kabai indemokai koidan mobantil baikon yanila laate lamare kotempo nasinalakon. Inai palaatikanggene yanila na olumon-olumon.

⁹Yanila pakeo Kosambunggu tuuk mosalitayo doi komuyu langge-langge moaki nabisa. Yaku aki mosumboli yanila. Yaku, TEMENENO lapamo basalita.’

¹⁰ TEMENENO bantil, ‘Kalukai ganapo tempo pitu kolono kotaun tuuk Babel, Yaku naikon palaatikanggene komuyu koidan abali doi tampat nia.

¹¹Bolikon kai Yaku susuungo toiyo Daku rencana-rencana tuuk komuyu? Rencana-rencana doo bolikon tuuk mosilakaiyo komuyu, bai tuuk mumonondokan tukon tuuk beena doi komuyu tempo posinasalaan mominoinikon.

¹²Maka komuyu naikon mangkabi tulung doi Yaku. Komuyu naikon lubat basambeang doi Yaku tukon Yaku naikon timbiliyo musambeang.

¹³ Komuyu naikon unggolio Yaku tukon posuungene Yaku, sabab komuyu mounggolio tukon saibino konoamiu.

¹⁴Bisa, komuyu naikon posuunggene Yaku. Komuyu naikon Kupototongikene luwedoi samba kobangsa-bangsa tanga-tangano tukon luwedoi samba kolipu tampat komuyu pinoalason tukon sinakukon. Komuyu naikon Kubabayo abali doi mulipu luwean nia tukon kindedeke komu kaadaan. Yaku, TEMENENO, lapamo basilingan.’

¹⁵Menurut komuyu, TEMENENO lapamo beekene doi komuyu nabi-nabi doi Babel.

¹⁶NDongolio oila ko TEMENENO nabantilan tomundo kaliangano momaparentah diabudodoo nia, doiyamo tomundo katulunan Daud, tukon modungoliyo nakota nia kaliangano, doiyamo mumontolutusan moaki nainakut doi nasakukonan polaing komuyu.

¹⁷TEMENENO Mobabasal Konakuasa bantil, ‘Yaku naikon lubatene polobosian, malaalan tukon panakit mobiol-biol doi yanila. Yanila naikon Kupalaluwo buno ala saono moboano tuuno tobikon akimo namoola kinaan.

¹⁸Yanila naikon Kulelenggene tukon polobosian, malaalan, tukon panakit mobiol-biol tobikon saibino kobangsa doi saibino kodunia naikon lasayo matakut kitayo yanila nakaadaan. Doiyaando tulung Yaku matakut poalasene yanila, mian naikon lasayo matakut tukon matakut kitayo oila molapamo teali tukon yanila. Yanila naikon sinosibolii, tukon yanila sambuno pinake salaku totopi.

¹⁹Saibino doiya teali doi yanila, sabab yanila aki natulutiyo Daku teteba mosidutu lunggon Kupelenggene doi yanila mololoi saibino konabi Daku ata-ata. Yanila aki nayase palaatikanggene Daku teteba doo.

²⁰Tukon komuyu saibino molapamo Kusakukene doi Babel, ndongolio oila komo Yaku, TEMENENO bantile.’

²¹TEMENENO Mobabasal Konakuasa, Mian Bisa Israel, lapamo basilingan kalianggano Ahab Kolaya namalane, tukon kaliangano Zedekia Maaseya namalane mopakeo ko TEMENENO sambuno tuuk pelenggene doi komuyu lange-lange moaki nakana. TEMENENO bantil baikon yana naikon salakanggene yanila doi Nebukadnezar nakakuasaan tomundo Babel, naikon moakateo yanila doi matamu salaano.

²²Maka kalukai mian daango molapamo inakut luwedoi Yerusalem ko Babel tadukai meeng komian motinotopi, yanila naikon bantil, “Biilisii TEMENENO molakukene ikoo buno Zedekia tukon Ahab, molapamo tomundo Babel suayo tubo-tubo.

²³Bunodoiya yanila nanasib sabab lakukene kolalim-lalim babasal doi Israel: Yanila baloloa, tukon pakeo ko TEMENENO sambuno tuuk mosalitaikene lange-langge moaki nabisa. Doiya aki napokonoi tukon TEMENENO namongiasan. Yana toiyo oila komo lakukon yanila, tukon yana susungo teali sakisii lawane yanila. TEMENENO lapamo basilingan.”

²⁴TEMENENO Mobabasal Konakuasa, Mian Bisa Israel beena teteba doi yaku tuuk Semaya, Nehelam miano, sabab Semaya lapamo ma pakatu sulat atas kosambuno susungo doi saibino modungoliyo ko Yerusalem, doi Imam Zefanya Maaseya, napau tukon doi saibino koimam bailon. Doi sulatoo lalomo semaya tulise bunonia doi Zefanya:

²⁶“TEMENENO lapamo oduke ikoo teali imam posoboli Yehuda tukon diabudodoo ikoomu kosambu motatandak doi TEMENENO Na Bonua. Komulimang doiyamo maparentakene sulano samba komian tindo momangakukene kobutongo nabi, binoboi tukon lante besi doi bulungo.

²⁷Bai bulaando ikoo aki mutindokiyo telhadap Yeremia Anatot mianodoo molapamo babunokon salaku nabi doi antara nda bangsa?

²⁸Mian doo sio natinutup kosuungo, sabab yana mabantil doi mian daango kita doi Babel baikon yanila daanon malumbit dungol indaa. Tukon sabab doiya, nabantilan yanila sio nakekendenge ko bonua tukon mobuka asi tukon lasaiyo ko hasilo.”

²⁹Sulatoo Imam Zefanya basakene doi yaku.

³⁰Sabab doiya TEMENENO sumboliyo yaku

³¹mangakapatu bilita kalinangano doi Semaya saibino ko Israel miano mosinakukon doi Babel. Naiyamo bilitadoo, “Semaya lapamo basilingan doi komuyu bunokai yana nabi; banggokai Yaku, TEMENENO, aki mosu mboli yana. Sabab yana lapamo kabaiyo komuyu mangangga doi bantilan mokala,

³²tukon sabab yana lapamo sumboliyo komuyu lawane Yaku, maka Yaku naikon hukume yana tukon nakaturunan. Akio komeeng komian doo luwedoi antara yanila naikon modungol doi antara komuyu tuuk kitayo langge-langge mondok naikon mo Kulakukene tuuk saibino Dakuumat. Yaku, TEMENENO, molapamo basilingan.”