Read Banggai YEREMIA 3 Bible Online

YEREMIA 3 - Banggai bible

YEREMIA 3

¹TEMENENO bantil, “Kalukai meeng koboloki nalakai tinggale, maka boine doo teali mian bailon naboloki, maka bekas nalangkai akimo namoola abali alayo salaku naboloki, sabab langge doo naikon lipunia manas. Ikoo Israel, lapamo mototoli badaang tuuno konabibian, bulaandokon diabudodoo ikoo yase abali doi Yaku!

²Soba kitayo doibungkuk, doi bunggul bunggo-bunggono! Tampat doiya mo akiyon nabiasa kulubotiiyo tuuk baloloan? Buno Arab miano doi padang bone, bunomo ikoo osulang doi loloon bibilo mototiili mian moyase mainggene kona sineang. Ikoo kodikitio nalipu nia tukon baloloan tukon mukolokisan.

³Doiyamo kosababpo paisu luwedoi timbu tataan, tukon tempo udan doi musim momemel aki natade lubat. Ikoo buno baloloa, tukon aki natoyo komaa.

⁴Doi tempo mukasulitan doo ikoo bantil doi Yaku baikon Yaku tamamu, baikon Yaku seseange ikoo tambun ikoo daano popoisik.

⁵Ikoo bantile koidan baikon Yaku aki naikon banggadudul nggimal doi komuyu. Doiyamo komubinantil, he Israel, bai daanon doiya ikoo lakukene koidan sasaibino kokulokisan momoola ikoo lakukene.”

⁶ Doi tempo Tomundo Yosia namaparentaan, TEMENENO bantil bunonaia doi Yaku. “Lapamokai ikoo kitayo oila ko Israel nailakukon, boine moaki nasatia doo? Yana tinggale Yaku tukon lakukene kobaloloan doi samba ko bunggul motatandak bunggono tukon doi bilit samba kokayung momasalimbung.

⁷Daku pikilan sulano yana lakukene saibino doo, yana naikon abali doi Yaku. Bai yana akimo naabali, tolongo taus baloloa. Doiyamo kosababpo Yaku tinggale tukon sikayo yana. Yehuda, Israel utuso, moaki nasetia kitayo saibino doo, bai yana aki nateali matakut. Yana tolongo tulut teali balaloa,

⁹tukon pokakana tuuno aki nalasayo mamaa. Yana pototongi sabab sosubayo kobatu tukon kayung, tobikon lipunia teali madikit.

¹⁰Sambuno lapa lakukene saibino doo, Yehuda moaki nasatia doo abali doi Yaku bai tukon bakala-kala, sabab konoano aki namonondok. Yaku, TEMENENO, lapamo basilingan.”

¹¹Doibundu TEMENENO popitoikene doi yaku maukai baikon Israel lapamo totonggulunge Yana, bai Israel tokita lobian monondok luwedoi Yehuda moaki nasatia doo.

¹²TEMENENO sumboliyo yaku taus tuuk mopopitoikene langge nia doi Israel: “He Israel moaki nasatia abalimo doi Yaku! Yaku moono koposeangan tukon aki naikon nasidutu nggimolon doi komuyu.

¹³Akuiyomo tolong baikon ikoo salamo tukon lapamo malontak doi TEMENENO, mu Mian Bisa. Akuiyomo baikon doi bilit samba kokayung momasalimbung ikoo lapamo okitakene komu kilakanano doi bangsa bailon nailah-ilah, tukon aki nataatio Daku parentah-parentah. Yaku, TEMENENO lapamo basilingan.”

¹⁴TEMENENO bantil, “He mian moaki nasetia, abalimo doi Yaku! Komuyu daanon Konggu. Yaku naikon alayo komuyu, meeng komian luwedoi meeng kokota, tukon lua komian luwedoi samba kobenseno tukon babayo komuyu abali doi Sion Bunggulo.

¹⁵Yaku naikon bekeene doi komuyu katua-katua motaat doi Yaku. Yanila naikon katuaiyo komuyu tukon pandoian tukon mangalatikene tuuno.

¹⁶Maka kalu kai komuyu tosungimo badaang doi lipunia, mian akimo naikon basilingan koidan kaliangano Ku Peti Perjanjian. Yanila aki naikon napikikene kabai moingotikene koidan, yanila tolongo aki naikon namapalaluu kabai makabai Peti Paladandian bailon.

¹⁷Doi tempo doo kota Yerusalem naikon sinumbuikon ‘TEMENENO Naodudukan,’ tukon saibino kobangsa naikon pototongi doi kota doo tuuk sosubayo Yaku. Yanila akimo koidan moloingi yanila noano namongiasan molongas tukon lokis doo.

¹⁸Israel naikon pototongi tukon Yehuda, tukon polaing-laing lubat luwedoi lipu masakukonan taikon doi lembet. Yanila naikon abali doi lipu molapamo Kubekeene salaku buta budel doi tumbumu.”

¹⁹TEMENENO bantil, “Israel, Yaku yase talimayo ikoo salaku kupau, tukon bekeene doi komuyu lipu mosinananggon, lipu momonondok tuuno posaapon kodunia. Yaku yase ikoo sumbuikene Yaku tama, tukon aki dampas koidan luwedoi Yaku.

²⁰Bai buno boloki moaki nasatia, ikoo kai aki nasatia doi Yaku. Yaku, TEMENENO lapamo basilingan.”

²¹Doibunggul bungkuk-bungkukono tollongol kolalo bulungan; doiya Israel miano nalalo mokokiil tukon makabi-kabi, sabab yanila lapamo makabai lalim, tukon toliminggenemo yanila na TEMENENO Mian Bisa.

²²Hei komuyu saibino molapamo tinggale ko TEMENENO, abalimo! Yana naikon aline komuyu, tukon tealikene komuyu tobos. Komuyu bantil, “Ode, diabudodoo kami lubat doi TEMENENO, sabab Yana komai Mian Bisa.

²³Akio kotakoso kami balame-lame sosuba doi pilogot doi bunggul bungkuk-bungkukono! Potulungi tuuk Israel tolongo lubat luwedoi TEMENENO komai Mian Bisa.

²⁴Sosubaan doi Baal, pilogot mominamaakon doo lapamo kabaiyo kami lapus komai pau-pau tukon iyayon piniala saapi tukon domba doiyamo saibino molapamo komai mbumbu usakanggene tambun doi lolukkoo.

²⁵Jadi sodiikenemo kami tanggunge komaano, tukon sodiikene kami teali tinotulai. Sabab, kami tukon komai mbumbu lapamo makabai lalim doi kami na TEMENENO Mian Bisa, tukon aki nabiasa nataat doi Naparentah-parentah.”