Read Banggai YEREMIA 30 Bible Online

YEREMIA 30 - Banggai bible

YEREMIA 30

¹TEMENENO, Mian Bisa Israel,

²bantil doi yaku, “Tulisemo doi meeng ko buku lalomo saibino molapamo Kubantile doi komuyu.

³Sabab naikon laate kotempono Yaku alilinggene buno kondondongo tumbeno Daku umat Israel nakaadaan tukon Yehuda. Yaku naikon babayo yanila mabali doi lipu molapamo Kubukene doi yanila nambumbu. Lipudoo naikon yanila alayomo koidan. Yaku, TEMENENO, lapamo basilingan.”

⁴TEMENENO bantil doi umat Israel tukon Yehuda,

⁵“Yaku lapamo dongolio mian mbombokon mokilison, mian matakut mokilison moakiyo kona monondokan.

⁶Soba pikikene tukon selidikio! Kai moola mala-malane mosunge kopau? Kalu bunodoiya, bulando Kukitayo samba komala-malane kupaaso mbules tukon taane kotiano tukon limano buno boine mokabi mosuung?

⁷Oloyo minatakuton lubato, oloyo mokiyo kona pokakanan. Tuuk Kuumat, doiya oloyo mominakuton; bai yanila naikon Kusalamatene.”

⁸TEMENENO Mobabasal Konakuasa bantil koidan doi Naumat, “Kalukai lubat oloyo doo, panga mokinonoikon doi olumu naikon Kuoloyo, tukon pobobuidak naikon Kulapase. Komuyu aki naikon teali ata mian molubat koidan.

⁹Komuyu naikon bata-ata doi Yaku, TEMENENO mu Mian Bisa, tukon meeng komian Daud nakaturunan naikon Yaku mongoduk salaku tomundo.

¹⁰Daku umat Israel, inaimo matakut! Kuata Yakub, inai mbombokon! Komuyu tukon mukatulunan naikon Kusalamatene luwedoi lipu modoon, tampat potinaanan. Komuyu naikon mule tukon dungol doi mulipu tukon aman. Komuyu naikon tubo tukon aman; akiyo komo palalu komuyu matakutene.

¹¹Yaku naikon lubat tukon komuyu naikon Kusalamatene. Bangsa-bangsa, tampat komuyu Kupoalasanano saibino naikon Kusilakayo, bai komuyu aki Kulakukene buno doiya. Bisa komuyu aki naikon nalupat doi ukuman bai Daku ukuman doi komuyu daanon adil pokokonoi. Yaku, TEMENENO, lapamo basilingan.”

¹²TEMENENO bantil doi Naumat: “Mupanakit mallas tuuno, tuuk mupakol akiyo kopakulino.

¹³Akiyo komeeng komian kai momoola bala duanggene mutangalingan, akiyo kopakuli tuuk mubisul-bisul, akiyono kohalapan tuuk komuyu motangalin.

¹⁴Saibino mubibian toliminggenemo komuyu; yanila akimo naiyase koidan mopikikene kobutomu. Bunomo musuh Yaku lapamo lobosio tukon ukume komuyu tukon nggololimalon, sabab badaango komulalim tukon babasalo komu kasalahan.

¹⁵Inaimo koidan mobebekene komu pakol-pakol kaliangano, sabab doi ikoo akiyono komoinian motangalin. Komuyu Kuhukume bunodoiya sabab badaango komulalim tukon babasal komu kasalahan.

¹⁶Bai diabudodoo saibino komo lemese ikoo naikon ilomos, tukon saibino musuh-mumusuh naikon inakut doi masakukonan. Yaku naikon tindokio komo tindoki komuyu. Yaku naikon mondikuk komondiku ke komuyu.

¹⁷Maukai komu musuh nabantil, ‘Sion lapamo sinakukon, tukon akiyo komo palaatikanggene,’ bilisii komuyu naikon Kubaiyo abali kekedek, tukon mupakol-pakol naikon Kupakulio.”

¹⁸TEMENENO bantil koidan: “Komuyu, Daku umat naikon Kumamasikene tukon Kuabalinggene mukaadaan tumbeno doi mubuta sinungan susuumu. Yerusalem naikon kinokondongo koidan, tukon nakamali kinindok.

¹⁹Komodungoliyo naikon nggale Yaku tukon manani, tukon kokuweis-kokuweis tukon sanang. Yaku kabaiyo yanila inodotii tukon akimo koidan natinotulai, tukon yanila nakadaang naikon pololokon tosungi.

²⁰Mubangsa naikon Kutealikene manaang buno loluk, tukon kokondong koidan salaku Kuumat. Saibino motindokiyo naikon Kuukume koidan.

²¹Tomundo muparentayo komuyu kona luwedoi mubangsa. Tukon bebas yana naikon kolanio Yaku kalu kai yana Kuuange manghadap doi Yaku. Sabab indekai komo barani mangadap Yaku atas namongiasan susungo? Komuyu naikon teali Kuumat tukon Yaku teali mu Mian Bisa. Yaku, TEMENENO mobantile doiya.”

²³TEMENENO nanggimalan bunokai libus, bunokai mombul makasang monggimal molupayo mian daango molokis, tukon akimo naikon tade akiyon saibino Konaniat kabaiyo. Oloyo doibundu Konaumat naikon toiyomo langge doo.