Read Banggai YEREMIA 31 Bible Online

YEREMIA 31 - Banggai bible

YEREMIA 31

¹TEMENENO bantil, “Naikon laate kotempono Yaku teali saibino kobenseno Israel Mian Bisa, tukon yanila teali Kuumat.

²Doi padang bone Yaku tudoikene Daku seangano yanila moluputo luwedoi matean. Salaata umat Israel unggolio kona tanaangan,

³luwedoi namodoonan Yaku oikitakenemo kobutonggu doi yanila. He umat Israel doi loluko Yaku sidutu seseange komuyu tukon tuuk banggadudul Yaku naikon tataap tudoikene baikon Yaku sidutu seange komuyu.

⁴Mubangsa naikon Kutealikene manaang buno lolukoo. Israel idan komuyu koidan naikon mangala lebana, tukon osuleng tukon sanang.

⁵Komuyu naikon mubuka anggur asino doi Samaria Bunggulo, tukon momasakakon naikon pupuiyo kosaono koidan.

⁶Bisa, naikon lubat kotempono saibino padagai kota wookon doi Efraim Bunggulo, ‘Maimo ndaliba doi Sion, doi nda TEMENENO Mian Bisa.’ ”

⁷TEMENENO bantil, “Pomananimo tuuk sanaang Israel, Kuumat — bangsa moutama luwedoi saibino kobangsa. Mananikenemo kolagu panggal, tukon popitoikene: ‘TEMENENO lapamo salamate moluwe doi Naumat labino.’

⁸Luwedoi lembet Kubabayo yanila abali; Kupototongikene yanila luwedoi dunia bundu-bunduno. Mian mopiit tukon mian molemat naikon lainge tukon yanila, koidan boine mosodo mosuung tukon motinano malumbit. Yanila saibino naikon abali lubat badaangila tuuno doi lipu nia lalomo.

⁹Yanila ampakon tukon seselet komatano paisuno, Kuhibule tukon Kupimpine yanila. Kubabayo yanila loloiyo kotampat-tampat momadaang kopaisuno, mololoi loloon molata doi yanila natampat aki naikon tolosunggul. Tuuk Israel, Yaku bunokai tama; Efraim daano Kumalane langgongo.”

¹⁰TEMENENO bantil, “Ndongolio he bangsa-bangsa! Pelenggenemo Daku teteba doi tobun sembeleng; Daku umat molapamo Kupoalasene naikon Kupotongikene tukon Kupialayo, buno pototoli modagaiyo konadomba,

¹¹Umat Israel lapamo Kusalamatene, tukon Kusodiikene luwedoi bangsa mobukuan.

¹²Doi Sion Bunggulo yanila naikon lubat tukon duduso mosanang-sanang, maka manani tukon sanang sabab saibino Yaku komo beekene doi yanila, doiyamo gandum, lisoson, anggur, saapi tukon domba. Yanila buno naikon asi mosukup kopaisuno, tukon aki nakakulangan oila-oila.

¹³Doi tempodoo boi-boine naikon osuleng tukon mondok konoano. Mian motua tukon mian motabokon namonondokan pokakana, sabab Yaku naikon hibule yanila. Yanila nadukaan Yaku boliyo teali nasanangaan, kopolonan Kubaiyo teali namonondokon.

¹⁴Saibino koimam naikon Kubiaikene tukon kinaan molobian, tukon saibino Kuumat palaluwo naikon Kubekene. Yaku, TEMENENO, mobantile.”

¹⁵ TEMENENO bantil, “Doi Roma longol kolalo mandaung, tukon bebekan motutupio kosusaan. Rahel mandaungene kona pau-pau, yana aki nayase mohinibul sabab yanila akiyono.

¹⁶Tademo komukokiilan tukon kotulio komatamu paisuno! Akikai nasia-sia komu pakadakan tuuk mupau-pau. Doi komuyu naikon daano kotambono, mupau-pau luwedoi namusuh nalipu.

¹⁷Doi tempo mosinasalaan doi komuyu daano mominoinikon; mupau-pau naikon abali doi nakampung.

¹⁸Kulengele ko umat Israel bantil tukon palasaan mosusah, ‘Ode TEMENENO, kami buno iyayon moakiyon nakinamalu bai Ikoo latio kami tuuk patuh, tukon diabudodoo kami siap tuuk abali doi komuyu. Jadi babayomo kami abali, ode TEMENENO, komai Mian Bisa.

¹⁹Ikoo kami lapamo totonggulunge, bai kakabai doo kami manasal. Sambuno lapa Ikoo ukume kami, kamo oluno totuku sabab susah. Kami mamaa tukon teali totulai sabab anomo kona lalim doi tempo tabokon.’

²⁰Israel, ikoo Kupau sineang, pau kinilakon, noanggu saono. Samba lunggon Yaku otokutikon Yaku sidutu neneeke doi komuyu tukon poloong. Ikoo naikon Kusumbolikon tukon pomasikonan.

²¹Palosanggene kololoon-loloon, paasemo unggoliyomo kololoon ikoo mololiyo loluk. He, Israel, mulemo! Abalimo doi mokota-kota tumbeno.

²²Polong tempo oila ikoo banggadudul moli-molili, he bangsa moaki nasatia doi Yaku? Yaku lapamo pasitakayo meeng kolobo moboolu doi dunia, meeng kolobo moinelanggon — pokana moinelanggon boine molindungiyo komalane.”

²³TEMENENO Mobabasal Konakuasa, Mian Bisa Israel bantil, “Kalukai Kuumat lapamo Kutealikene manaang buno loluk, maka doi lipu Yehuda tukon doi nakampung-kampung naikon ilongol koidan mian mobantil, ‘Biliisi TEMENENO nabalakaatio bunggul moliyous doi Yerusalem. Tuuk tampat Yana nadungolan motangalaas.’

²⁴Mian naikon dungol doi Yehuda tukon doi kampung-kampung. Indaa naikon daano kopatani tukon bapiala yayon tukon saapi tukon domba.

²⁵Yanila naikon molapamo Kukindedeke, tukon komo miuk sabab malaal naikon Kukobosule.

²⁶Doi tempo naikon mian bantil, ‘Sambuno lapa moolo tombosokon, yaku lasayo sehat.’

²⁷Yaku, TEMENENO, bantil baikon naikon lubat kotempono lipu Israel tukon Yehuda Kukonoiyo tukon banggapi tukon iyayon.

²⁸Bunomokai loluk Yaku lapamo dagaiyo yanila sulano doibundu Yaku sabute, lubange tukon manase yanila, bunomo koidan Yaku naikon dagaiyo yanila sulano Yaku kenggele tukon bangune yanila koidan.

²⁹ Doi tempo komian akimo naikon nabantil koidan, ‘Mian motua kaane kosaoh momeele, kongolingo moomio mangilu,’

³⁰bailonggon saoh momeele inde komo kaane, yanamo susungo naikon komo mangilu kongolingo. Samba komian naikon nalalim susungo.”

³¹ TEMENENO bantil, “Naikon lubat kotempono Yaku makabai perjanjian moboolu tukon umat Israel tukon Yehuda.

³²Bai perjanjian doo bolikon buno perjanjian yaku mokubaiyo tukon yanila nambumbu salataa yanila Kupimpine sumbot doi Mesir. Maukai Yaku buno meeng komian nalakai tuuk yanila, mau yanila akienggenemo Kuperjanjian tukon yanila.

³³ Naiyamo perjanjian moboolu naikon Yaku mokubaiyo tukon umat Israel: Daku ukum-ukum naikon Kuabese doi yanila noano lalomo, tukon teali kutulise doi yanila noano. Yaku naikon teali yanila na Mian Bisa, tukon yanila naikon teali Kuumat.

³⁴ Aki napalalu koidan meeng komian moluwedoi yanila otunggule kotulano tuuk tingonio ko TEMENENO. Sabab yanila saibino, babasal popoisik, naikon tingonio Yaku. Yanila nalalim-lalim naikon Kutoliminggene, yanila nakasalahan-kasalahan Kuampunio. Yaku, TEMENENO, lapamo basilingan.”

³⁵Kooloyo matano TEMENENO sadiayo tuuk kodiolongio kooloyo; bituwon tukon manda-mandala tuuk kodiolongio kopopook. Tobun kinabuk tobikon kobokol babokolan, TEMENENO Mobabasal Konakuasa, doiyamo kosambuno.

³⁶TEMENENO berjanji, “Nakalumbit koukum moano doi dunia tukon doi timbu aki nabolii Israel doo naikon tataap daano salaku bangsa.

³⁷Biliisi meeng kotempo timbu moola nainukul, tukon dunia pangalaso moola nasinelidiki, doi tempo doiya Israel naikon Kutolake sabab saibino yanila nakakabai molokis. Yaku, TEMENENO, lapamo basilingan.”

³⁸TEMENENO, bantil, “Naikon lubat kotempono posaapon ko Yerusalem binangun kokoidan salaku Kukota, luwedoi Menara Hananeel sampe doi Tataapo Babasal Pasuno.

³⁹Luwe idoo balis kalatano bosikene ko Gareb Bunggulo, maka lias doi Goa.

⁴⁰Saibino kopeakoo, mopinake salaku kubulan tukon tampat masakukonan limbut, tukon saibino koasi doi Kidron Paisuno batango pibilosampe doi Tataapon Babasal Andalan aikon timbul, naikon inalaas tuuk Yaku. Kota Yerusalem aki naikon nailubang koidan kabai naminanas.”