Read Banggai YEREMIA 32 Bible Online

YEREMIA 32 - Banggai bible

YEREMIA 32

¹ Doi taun kosongulo Zedekia tomundo Yehuda namaparentaan, doiyamo taun kosongulonoalu Nebukadnezar tomundo Babel namaparentaan, TEMENENO basilingan doi yaku.

²Doi tempodoo suludadu tomundo Babel daanon molobosiyo ko Yerusalem. Yaku tinaan doi tomundo nakamali kintalo,

³Tomundo Zedekia sabab ilait lapamo umumkanggene baikon TEMENENO bantil bunonia, “Tomundo Babel naikon Kusodiikene lakukene tukon dungoliyo kota nia,

⁴tukon Tomundo Zedekia naikon aki naluput. Yana naikon sinalakanggon doi tomundo Babel, tukon manghadap tomundo doo maka basilingan susungo tukon yana.

⁵Doibundu Zedekia naikon inakut doi Babel tukon dungol imbali sampe Yaku ukume yana. Maukai yana lobosio ko Babel miano, yana aki naikon nabalahasil. Yaku, TEMENENO, lapamo basilingan.”

⁶TEMENENO bantil doi yaku

⁷baikon Hanameel, kupinatama Salum napau mala-malane, naikon lubat tuuk kabaiyo sulano yaku mongoli nabuta doi Anatot doi Benyamin nawilayah. Sabab, yakumo namotolutusan mololani moano ko nahak mooliyo buta doo.

⁸Maka bunomo TEMENENO nabantilano, lubato Hanameel doiyaku doi kamali kintalo, tukon kabiyo sulano yaku mongoli nabuta. Tobikon doiya yaku anggayo TEMENENO bisa-bisa lapamo basilingan doi yaku.

⁹Maka yaku oliyo Hanameel nabuta koanggano songulo pitu kodoy suasa. Yaku uange kosakisii-sakisii doi yanila salaano yaku tandatanganio kosulat pongolino, maka yaku obosiyo segel tukon kona doy yaku timbange.

¹¹Doibundu yaku alayo sulat pongolino doo molapamo binee segel tukon koantoko sarat-sarat tukon motinantukon-tinantukono. Yaku alayo koidan sulatoo sakino moakiyo kosegelo,

¹²tukon lua dosulatoo yaku beekene doi Barukh Neria napau Mahseya natumbu. Yaku salakanggene doi Hanameel salaano osulang tukon sakisii-sakisii molapamo tandatanganio surat-suratoo, tukon doi mian-mian daango salaano modaanon osulang doi kintalo.

¹³Doi yanila saibino salaano yaku bantil doi Barukh,

¹⁴“TEMENENO Mobabasal Konakuasa Mian Bisa Israel, maparentah sulano ikoo alayo sulatoo molua nia, mau motuuno maukai salinano, tukon usokene doi meeng kotobunang mokinubai doi betong sulano natahan malumbit.

¹⁵TEMENENO Mobabasal Konakuasa, Mian Bisa Israel, bantil baikon bonua, buta, tukon anggur asino naikon binalukon koidan doi lipunia.”

¹⁶Sambuno lapa sulat-sulat pongolino doo yaku bekenemo doi Barukh, yaku sambeng,

¹⁷“TEMENENO Moinakatandak Tuuno; Ikoomo komopasitakayo kotimbu tukon dunia tolongo kuasa tukon namongiasan-Mu. Akio kolobo meeng kai mususah doi komuyu.

¹⁸Ikoo tudoikene komu maasi moposidutukon doi lolongo-longo komian, bai ikoo koidan ukume komian sabab naolangtua nalalim. Ikoo Mian Bisa moinakabasal tukon mobarani; sambu-Mu TEMENENO Mobabasal Konakuasa.

¹⁹Mupalasiapan-palasiapan doo moolamo tukon Mukakabai-kakabai inelanggon; Ikoo kitayo saibino bangkapi molakukene, tukon balese yanila pokonii tukon yanila nakakabai.

²⁰Doi lolukoo Ikoo lakukene komo inelanggon tukon langge-langge moinelanggon doi Mesir, tukon sampe diabudodoo kai koo daanon molakukene, mau kai doi antara Israel miano mau doi antara saibino kobangsa bailon.

²¹Tolongo nakuasa tukon Mubukuanan mobabasal ikoo babayo koumat Israel sumbut luwedoi Mesir. Ikoo lakukene ko TEMENENO nakuasa tukon moinelaanggon-inelaanggon tukon kadadian-kadadian monggabute komusuh.

²²Lipu monondok tukon momolumbang nia ikoo bekeene doi yanila bunomo yaku modondiikenemo doi yanila nambumbu.

²³Bai salataa yanila lubat doi lipunia nia tukon yana libute, yanila aki nataat doi Muparentah-parentah tukon aki natubo mololoi mootunggul-otunggul. Ikoo maparentakene saibino doi yanila akiyo komeeng doo yanila molakukene. Sabab doiya Ikoo lubatene saibino kosobaan nia doi yanila.

²⁴Babel miano daango kabaiyomo kobeton-beton polobosian potikunggon kota tuuk nainala, tukon diabudodoo yanila molobosiyo. Polobosian, malaalan, tukon panakit mobiol-biol naikon kabaiyo nakota nia otuwong doi yanila limano. Ikoo kitayo baikon saibino Ikoo mobantile tealimo natokitaan.

²⁵Mau nabunodoiya, ode TEMENENO Moinakatandak Tuuno, Ikoomo mosumboliyo yaku mooliyo buta nia doi sakisii-sakisii salaano, maukai naapa koidan kota naikon Babel direbut Babel miano.”

²⁶Doibundu TEMENENO bantil doi yaku,

²⁷“Yakumo TEMENENO, saibino komian na Mian Bisa. Akio komo susah doi Yaku.

²⁸ Kota nia Yaku naikon sodiikenemo Nebukadnezar tomundo Babel tukon nasuludadu nakuasaiyo. Yanila lebute naikon kota nia,

²⁹tukon suayo sanpe kabus polaing-polaing tukon bonua-bonua doiyaando komian mosumbutene daku nggimalan sabab doi bonua-bonua doo loungo bunggono yanila mosua kamangian doi Baal tukon kundongio anggur tuuk sosubakon doi ilah-ilah.

³⁰Mulai doi natambunan yanila salitano, Israel miano tukon Yehuda miano lapamo kabaiyo yaku aki sanaang. Yanila lubatene daku nggimalan tukon yanila nakakabai-kakabai molokis.

³¹Mulai kota nia nabinangunan, modungoliyo lapamo kabaiyo Yaku nggimal tuuno. Yaku putusemo tuuk momanase,

³²sabab saibino kokulokisan Yehuda miano molakukene tukon Yerusalem polaing saibino kotomundo, sambu pamarentah, imam tukon yanila nabi-nabii.

³³Yanila tinggalemo Yaku tukon yanila kai Yaku banggadudul otunggule yanila, yanila aki naiyase modongolio tukon aki nayase babolii.

³⁴ Bainokai bonua mokinokondong tuuk tampat kaledaan doi Yaku lapamo yanila kodikitio tukon binggakene yanila napilogot-pilogot motoluwekene doi tampatdoo.

³⁵ Yanila mokokondong balabang-balabang tuuk Baal doi Hinon Pepelakono, tukon susubakene yanila napau-pau doi Dewa Molokh. Banggokai, Yaku akiyon mosumboli yanila molakukene langgedoo, tukon aki nasumbut idan doi Yaku pikilan lalomo baikon yanila naikon lakukene kakabaidoo momadikit tukon kabaiyo Yehuda miano makabai lalim.”

³⁶TEMENENO, Mian Bisa Israel, bantil doi yaku, “Yeremia, bangsa Israel bantil baikon polobosian, malaalan tukon panakit mobiol-biol naikon kabaiyo kota nia otuwong doi tomundo Babel miano. Diabudodoo, ndongoliyo koidan oila naikon Dakubantilan.

³⁷Yaku naikon pototongikene bangsa nia luwedoi sasaibino kolipu yanila natampat Kupoalasene sabab Daku nggimalan tukon Daku nginimokon tuuno doi yanila. Yanila naikon Kuabalinggene doi tampat nia tukon Kumolakukene dungol dimbaa tukon aman.

³⁸Yanila naikon teali Kuumat, tukon Yaku teali yanila na Mian Bisa.

³⁹Yaku naikon beena yanila tolongo meeng kotuboan mosinasalaan: doiyamo, odotio Yaku sidutu-posidutukon; langge doo naikon babayo komonondokan tuuk yanila susuungo, tukon yanila nakatulunan.

⁴⁰Yaku naikon makabai perjanjian moposidutukon tukon yanila. Yaku naikon aki tade makabai monondok tukon yanila. Yaku naikon kabaiyo naikon yanila matakut tukon odotio doi Yaku tukon saibino konoano sulano yanila aki nabadanlunggon doi Yaku.

⁴¹Yaku naikon sanaang makabai monondok doi yanila, tukon kabaiyo yanila tataap doi lipunia tuuk sidutu-posidutukon.

⁴²Bunomokai Yaku molubatene kosilakaan doi bangsa nia bunomo koidan Yaku naikon bekeena saibino molapamo Yaku domdikene doi yanila.

⁴³Komian bantile baikon lipu nia tealimo buno padang bone moakiyo kobangkapi tukon iyayon modungol, tukon baikon lipu nia tuongo doi Babel miano limano. Bai Yaku bantile baikon kalu koasi-asi naikon pinobolukikon koidan doi lipu nia;

⁴⁴napongoli sulato naikon tinanda tangani, sinegel, tukon sakisii-sakisii komo kobukuanggene. Doiya naikon teali doi Benyamin nawilayah, doi kampung-kampung pokolani ko Yerusalem, doi kota-kota Yehuda, doi kota-kota doi daerah bunggukon, doi daerah bunggukono bibilo, tukon doi Yehuda taikon salatan. Bangsa nia naikon Kupoputakene doi lipunia nandodong. Yaku, TEMENENO, lapamo basilingan.”