Read Banggai YEREMIA 33 Bible Online

YEREMIA 33 - Banggai bible

YEREMIA 33

¹Salataa yaku daano motinaan doi kintaloo, yaku malaat teteba bailon luwedoi TEMENENO

²mopasitakayo kodunia tukon mokabaiyo maka yana binggakene doi natampat. Yana bantil,

³“Masadaimo doi Yaku, maka Yaku naikon timbiliyo; naikon kubotikene doi komuyu langge-langge momondok tukon mobinelanggon moakiyoon ikoo toiyo.

⁴Tomundo Yehuda nakamali tukon bonua-bonua doi kota Yerusalem binongkalo tuuk mokuatene kopalataanan telhadap musuh naboilingiyo tukon molobosi. Bai Yaku, TEMENENO, Mian Bisa Israel, bantil baikon,

⁵palasuma kai molawane ko Babel miano, sabab langge doo tolongo naikon konoiiyomo kota nia tukon mian daango bajano Yaku moakateo yanila doi Kusanggimalan tukon Kunggimalan lalomo. Yaku aki kuyase koidan kitayo nakota nia, sabab mian daango lapamo lakukene komo lokis.

⁶Bai kalu Yaku naikon abalinggene kota nia ndondongo tukon modungoliyo; yanila naikon bukuan koidan. Yaku naikon bekene doi yanila kokasalamatan tukon kaamanan molobian.

⁷Yehuda tukon Israel naikon Kutealikene naikon tealimo koidan salaku Kuumat.

⁸Yaku naikon bilisiyo yanila luwedoi lalim-lalim molapamo yanila lakukene doi Yaku; lalim-lalim tukon aki naloingio kokuasaan mosah yanila naikon Kuompunio.

⁹Yerusalem naikon teali sanaang tukon Daku binanggakon. Saibino kobangsa doi dunia naikon teali matakut tukon mbombokon tukon odotio Yaku, oila kai mondongolio kaliangano saibino komondokon Kulakukene tuuk modungoliyo ko Yerusalem, tukon namonondokan kaliangano Kubekeene doi kota doo.”

¹⁰TEMENENO bantil, “Mian mobantile baikon nalipunia bunokai padang lalomo, akiyono komian kabai iyayon modungol idoo. Yanila nabantilan bisamo tuuno, sabab kota-kota Yehuda tukon loloon-loloon doi Yerusalem kosongo saibino; akiyono kobangkapi kabai iyayon modungol idoo.

¹¹ Bai doi tampat-tampatoo naikon longol koidan kolalo mondok tukon sanaang tukon lalo lamean basoanan. Naikon longol koidan komian daango manani komo mababa doi kubonua sosubakon sukur. Yanila naikon bantil, ‘Basukurlo doi TEMENENO Mobabasal Konakuasa, sabab Yana monondok tukon Naseang akiyo kona pupusan.’ Tano nia naikon kutealikene monondok buno tumbeno. Yaku, TEMENENO, lapamo basilingan.”

¹²TEMENENO Mobabasal Konakuasa bantil, “Tano tukon nakota-kota mobuno padang lalomo nia akiyo kobangkapi modungoliyo kabai iyayon. Mau nabonua doiya, oloyo doi bundu naikon daano koidan kopadang-padang lumput tampat mian nabadagaiyan domba-domba.

¹³Doi kota-kota doi lipu bunggulo, bunggul akato, lipu Yehuda salatan, tukon doi Benyamin nalipu maka doi kampung-kampung potikunggon ko Yerusalem, tukon doi kota-kota Yehuda, saibino kopadagai domba-domba yanila naikon aite koidan. Yaku, TEMENENO, lapamo basilingan.”

¹⁴ TEMENENO bantil, “Naikon lubat kotempono Yaku tapatio perjanjian molapamo Kukubaiyo tukon Israel tukon Yehuda.

¹⁵Doi tempodoo meeng komian moadil luwedoi Daud nakaturunan naikon kulilike teali tomundo. Tomundo doo naikon lakukene oila komo adil tukon mobisa doi posaapon kotano.

¹⁶Yehuda miano tukon modungoliyo ko Yerusalem naikon sinalamaton tukon tubo monondok. Kota Yerusalem naikon sinumbuikon ‘TEMENENO Salamatene Kita’.

¹⁷ Yaku, TEMENENO, paladandi baikon sidutu naikon daano komeeng komian luwedoi Daud nakaturunan moteali tomundo Israel;

¹⁸ sidutu naikon daano koimam-imam luwedoi Lewi bensemo moleleaniyo Yaku tukon mososubakon sosubakon iyayon, gandum tukon mososubakon mosinua.”

¹⁹TEMENENO bantil doi yaku,

²⁰“Yaku lapamo beena perjanjian oloyo tukon popook, sulano oloyo tukon popook sidutu lubat natempo perjanjian doo aki namoola akiakiyenggene.

²¹Bunomo koidan Yaku lapamo beena perjanjian tukon Kuata Daud, baikon luwedoi nakaturunan sidutu daano naikon meeng komian moteali tomundo; tukon Yaku lapamo beena perjanjian tukon imam-imam Lewi nakaturunan baikon yanila sidutu naikon meleani Yaku. Perjanjian-perjanjian doo aki namoola ianapus.

²²Yaku naikon sungiyo Kuata Daud nakatulunan tukon imam-imam doi Lewi bensemo, tobikon koaito teali pokakana kobone doi tobin bibilo kona kadaang tukon bituwon pauno doi timbu moaki nalaate inait.”

²³TEMENENO bantil doi yaku,

²⁴“Lapamokai ikoo palaatikanggene oila komian nabantilan terhadap Israel tukon Yehuda? Yanila bantil baikon Yaku lapamo sakukene lua kobangsa molapamo Kulilike doo. Doiya kosabapo yanila kitayo Daku umat rendah tukon akimo koidan yanila anggene salaku meeng kobangsa.

²⁵Bai bulandokai Yaku, TEMENENO lapamo makabai meeng komonggukon perjanjian tukon oloyo tukon popook, tukon makabai hukum moatule kotimbu tukon dunia,

²⁶bunomo koidan Yaku naikon tataap tanio Daku perjanjian tukon Yakub nakatulunan tukon Kuata Daud. Meeng komian luwedoi Daud nakaturunan naikon Kulilike tuuk maparentah nakaturunan Abraham, Ishak tukon Yakub. Yaku naikon mamasikene doi Kuumat, tukon tealikene yanila monondok koidan.”