Read Banggai YEREMIA 34 Bible Online

YEREMIA 34 - Banggai bible

YEREMIA 34

¹ Salataa Nebukadnezar teali tomundo Babel maka kona suludadu polobosi mokinonggoli luwedoi pasukan-pasukan saibino kobangsa tukon negala motaaluk doiyana lubat lobosio Yerusalem tukon nakota-kota potikunggon TEMENENO basilingan doi yaku.

²Yana sumboliyo yaku taus doi Zedekia tomundo Yehuda, tukon bantil, “Yaku, TEMENENO Mian Bisa Israel, naikon salakanggene kota nia doi tomundo Babel tukon yana naikon suayomo.

³Ikoo naikon aki tohoosodii, bai ikoo ilako tukon sinalakanggon doi yana. Ikoo naikon pososuung tukon posilingoni tukon yana, maka naikon ikoo taus doi Babel.

⁴Bai ndongolio dakubantilan nia ikoo Zedekia kokaliangano

⁵Ikoo aki naikon mumate doi polobosian lalomo, bai mate tukon sanaang. Tukon bunokai rayat mosua komangian tuuk ikoo. Yanila naikon boboiyo koolumo toik mopook tukon bantil, ‘Aduk! Komai tomundo akiyono!’ Yaku, TEMENENO, lapamo basilingan.”

⁶Maka TEMENENO nateteba doo kupelenggene doi Tomundo Zedekia doi Yerusalem,

⁷salataa tomundo Babel nasuludadu daanon molobosiyo kotadoo. Yanila koidan lobosio kota Lakhis tukon Aseka, lua kota muano kona benteng anoaan batanggon doi Yehuda.

⁸Tomundo Zedekia tukon modungoliyo ko Yerusalem makabai perjanjian tuuk moosodio

⁹yanila Ibrani naata-ata, mau mala-malane maukai molu-moluko sulano naakiyono komeeng komian moluwedoi bangsa Israel mokubaiyo mian doi nabangsa doo.

¹⁰Sasaibino korayat tukon saibino kosambuh pamarentah molapamo makabai perjanjian tuuk moosobiyo yanila naata-ata tukon naikon akimo nakabaiyo ata koidan tutuumo moosobiyo yanila naata-ata doo.

¹¹Bai diabudodoo yanila boliimo kona pikilan, maka alayo naata-ata doo koidan tukon pakiisayo teali ata koidan.

¹²Maka TEMENENO, Mian Bisa Israel, sumboliyo yaku bantil bunonia doi mian daango doo, “Salataa Yaku babayo komumbumbu sumbut luwedoi Mesir tukon osobiyo yanila luwedoi nainataian, yaku lapamo kabaiyo koperjanjian tukon yanila.

¹⁴ Yaku bantil baikon saibino ko Ibrani miano naata molapamo melleani noom kotaun kona kalumbit, sio nainosobiimo doi taun kopituno bunduno. Bai komumbumbu aki naiyase palaatikanggene kabai mondongolii oila Daku bantil doo.

¹⁵Bubula kooloyo molapa komuyu boliyo kopokalakuan tukon lakukene komo kabaiyo sanaang Konoanggu. Komuyu saibino sotujuiyo moosobiyo ata-ata mosodo mubangsa, tukon kabaiyo koperjanjian tukon Yaku doi Ku Bonua lalomo.

¹⁶Sambu-sambu pamarentah Yehuda tukon Yerusalem polaing saibino kopagawe kamali, imam-imam tukon saibino padagai mubuta lalomo sahkanggene perjanjian doo tukon mokolot saapi, mopatele teali lua, tukon ampakon doi antara lua kopatolo doo. Bai, lapado komuyu boliimo komu pikiran tukon totulaiyo Yaku. Ata-ata molapamo komuyu sodiiyo poloi yanila, namongiasan komuyu alayo koidan tukon pakisayo tuuk teali ata koidan. Tobikon doiya, Yaku, TEMENENO, bantil baikon komuyu lapamo liise Daku parentah, tukon aki taatio kona sarat-sarat, sabab komuyu aki posodiiyo kotulamiu bangsa Israel. Nah, diabudodoo monondok Yaku beekene doi komuyu posodiiyo: Tongosodiian tuuk mate doi polobosian lalomo kabai panakit mobiol-biol kabai malaalan. Yaku naikon kabaiyo komuyu buno komuyu lakukene komu metembelan saapi doo. Yaku naikon kabaiyo saibino kobangsa doi dunia nanginggingan mokitayo oila Daku lakukon doi komuyu.

²⁰Yaku naikon salakanggene doi komuyu doi musuh moiyase akateo komuyu. Komubajan naikon tomisi kaane tukon iyayon mobarani.

²¹Zedekia tomundo Yehuda tukon saibino kosambu napamarentah naikon Kusalakanggene doi mian daango moiyase akateo yanila. Yaku naikon salakanggene yanila doi suludadu Babel, modiabudodoo lapamo tinggale komuyu.

²²Yaku naikon beena tanda-tanda sulano yanila abali doi kota nia, maka molobosi, ataiyo tukon yana suayo. Kota-kota Yehuda naikon Kutealikene buno padang lalomo moakiyo komian modungoliyo. Yaku, TEMENENO, lapamo basilingan.”