Read Banggai YEREMIA 35 Bible Online

YEREMIA 35 - Banggai bible

YEREMIA 35

¹ Salataa Yoyakim Yosia napau teali tomundo Yehuda, TEMENENO bantil doi yaku,

²“Tauso posilingoni tukon mian daango Rekhab nakaluargaa. Babayo yanila doi meeng kokombiang doi Ku Bonua lalomo, tukon inumiyo anggur doi yanila.”

³Maka yaku tauso lolobotio saibino Rekhab nakaluargaa, doiyamo Yaazanya (Yeremia napau Habazinya napau) polaing saibino koutuso tukon napau-pau mala-malane.

⁴Yaku babayo yanila doi TEMENENO Na Bonua doi ndongan pololaing-pololaing Nabi Hanan Yigdalya napau malane nandongan lalomo. Ndonganno tangabos doi bungkuk luangan Imam Maaseya Salum napau, lolani kosambu-sambu bailon naluangan. Maaseya daanon pagawe motatandak modagaiyo TEMENENO Na Bonua tataapono.

⁵Lapadoo yaku abese doi Rekhab namian daango salaano gelas-gelas doo moono anggur, tukon galas-galas. Maka yaku bantil timbiliyo doi yanila, “Mai monginum.”

⁶Bai yanila timbiliyo, “Kami aki namonginum anggur. Komai mbumbu Yonadab Rekhab napau pantane kami tukon komai katulunan tuuk monginum anggur. Popantang doo berlaku tuuk sidutu-posidutukon.

⁷Kami aki namoola usaakanggene kobuta mosinakai, tukon koidan aki namoola mobuka kabai motoli anggur asino. Pamatekon, kami koidan aki namoola mokokondong bonua. Kami sio nadungol doi sandung lalomo, sulano namoola tataap doi buta nia salaku mian lubat.

⁸Saibino Yonadab napinarentakon doi kami lapamo kami taatio. Pomatekon kami tukon komai boloki pau aki namonginum anggur.

⁹Kami aki namakabai bonua tuuk komai tampat dungolan, bai kami dungol doi sandungo lalomo. Kami koidan akiyo komai anggur asino, asi kabai doo kolibuang gandum tuuk mosinakakon. Kona palusan, saibino komopinalentakon komai mbumbu Yonadab doo, kami taatio tuuno.

¹¹Bai salataa Tomundo Nebukadnezar lobosio natano nia, kami putusiyo tuuk modampas luwedoi suludadu Babel tukon suludadu Siria, tukon biol doi Yerusalem. Doiyamo kosabapo kami diabudodoo dungol dimbaa.”

¹²Maka TEMENENO Mobabasal Konakuasa, Mian Bisa Israel, sumbolio yaku taus doi Yehuda miano tukon Yerusalem, tukon pelenggene TEMENENO nia nateteba doi yanila, “Yaku, TEMENENO masadai bulando komuyu aki poiyase ndongolio Yaku tukon aki poiyase loingio Daku parenta-parenta.

¹⁴Yonadab pantane konakatulunan monginum anggur, tukon yanila taat doi mopinantanggon. Polong oloyo nia akio meeng komian doo luwedoi yanila monginum anggur. Bai Yaku banggadudul basilingan doi komuyu, tukon komuyu aki poyase mondongolii.

¹⁵Banggadudul Yaku bitekene doi komuyu saibino Daku ata saibino konabii, tukon yanila lapamo otinawo komuyu tuuk kindedeke komu kalakuan tukon tade makabai lokis. Yanila ingotikene komuyu tuuk aki nasosubaiyo koilah-ilah bailon tukon aki moloingi doi yanila, sulano komuyu moola dungol banggadudul doi tano nia molapamo Kubekene doi komuyu tukon doi mumbumbu. Bai komuyu aki poyase palaatikanggene tukon aki poyase ndongoliyo Yaku.

¹⁶Yonadab nakatulunan taat doi natama mbumbu naparentah, bai aki napoyase taat doi Yaku.

¹⁷Sabab doiya, Yaku, TEMENENO Mobabasal Konakuasa Mian Bisa Israel naikon lubatene doi komuyu — Yehuda miano tukon Yerusalem — saibino kopalasobaan molapamo Yaku tantukene tuuk komuyu, bunomokai molapamo Kubantile. Langge doo Kubaiyo sabab komuyu aki poyase mondongolii kalukai Yaku basilingan doi komuyu, tukon komuyu aki poyase timbiliyo salataa Yaku wange komuyu.”

¹⁸Maka yaku bantil doi mian daango Rekhab nakaluargaa baikon TEMENENO Mobabasal Konakuasa, Mian Bisa Israel, bantil bunonaia, “Komuyu loingiyomo kopombumbu Yonadab; saibino konaparentah lapamo komuyu tulutiyo tukon ampakonkene.

¹⁹Sabab doiya, Yaku, TEMENENO Mobabasal Konakuasa, Mian Bisa Israel, berjanji baikon luwedoi Yonadab nakatulunan Rekhab napau sidutu naikon daano komala-malane moleleaniyo Yaku.”