Read Banggai YEREMIA 37 Bible Online

YEREMIA 37 - Banggai bible

YEREMIA 37

¹ Doi tempo Nebukadnezar tomundo Babel belentio Yoyakhin Yoyakim napau, yana oduuke Zedekia Yosia napau teali tomundo Yehuda.

²Bai mau Zedekia maukai saibino kona sambu tukon narayat aki naloingio ko TEMENENO Nateteba mobekene mololoi yaku.

³Tomundo Zedekia bitekene Yukhal Selemya napau, tukon Imam Zefanya Maaseya napau tuuk kabiyo sulano yaku sambeang doi TEMENENO Mian Bisa tuuk kapantingan bangsa.

⁴Doi tempodoo akiyoon kuinusokon doi talunggu lapamo tukon daanon mobebas doi antara rayat.

⁵Suludadu Babel daanon boilingio ko Yerusalem, bai salataa yanila lengele baikon kosuludadu Mesir barangkato luwedoi Mesir tuuk polobosian, yanila mundul.

⁶TEMENENO, Mian Bisa Israel, sumboliyo yaku

⁷bantil buno naia doi Tomundo Zedekia nabobitokon: “Bontiikenemo doi Zedekia, ‘Suludadu Mesir modaano dosumaikon tuuk motombonio ikoo, naikon abali mule.

⁸Maka Babel miano naikon abali tukon lobosio kota nia tukon lungguiyo tukon suayo.

⁹Yaku, TEMENENO, ingotikene komuyu, sulano ianai mokokoliyo kobutomu tukon pikikene baikon Babel miano tauso tukon akimo naikon naabali. Sabab yanila tantu naikon moabali.

¹⁰Kalu kai komuyu lungguiyo saibino ko suludadu Babel maka komo totinggal tolongokai mian daango mopakolong doi yanila nasandung-sandung lalomo, mau yanila naikon bangun tukon suayo kabus nakota nia.’ ”

¹¹Suludadu Babel mundul luwedoi Yerusalem sabab suludadu Mesir bagalak konatujuiyo doi kota.

¹²Maka yaku tinggalemo ko Yerusalem tukon taus doi Benyamin nalipu tuuk matalima obos kupusaka luwedoi kaluargaa nabuta.

¹³Bai salataa yaku polong doi Benyamin Natataapon Babasal, suludadu kapalano mobalimang idoo taane yaku tukon bantil, “Ikoo yase obulen doi Babel miano taikon!” (Suludadu kapalano doo kosambuno Yeria; yana Selemya napau tukon Hananya natumbu.)

¹⁴Yaku balase, “Aki nabisa! Yaku akiyo komakisuut obulen taikon doi musuh.” Bai Yeria aki naiyase mondongolii. Yana lakoyo tukon babayo yaku mangadap doi saibino kosambu pamarentah.

¹⁵Yanila nggimal tuuno doi yaku, tukon mampaletakene sulano yaku binobokii tukon kinulung doi Yonatan nabonua, sekeletaris negara. Bonua doo tealimo talunggu.

¹⁶Yaku inusokon doi meeng kobubung lalomo doi buta adeno, tukon malumbit dakutinaan idoo.

¹⁷Lapadoo Tomundo Zedekia mosumbolio mian babayo yaku manghadap yana doi kamali. Idoo secara lahasia yana masadai doiyaku oila danno koteteba luwedoi TEMENENO. “Daano,” kotimbiliyo. Maka kusungiyo, “Tomundo naikon salakanggene doi tomundo Babel.”

¹⁸Sambuno lapadoiya yaku masadai, “Oila daku lokisan doi Tomundo kabai doi samba saibino ko Tomundo nasambu kabai rayat, tobikon Tomundo usekene yaku doi tolunggu lalomo?

¹⁹Doiyaa saibino konabii Tomundo doo mobantile baikon tomundo Babel, aki naikon molobosiyo ko Tomundo tukon natano nia?

²⁰Diabudodoo, Tomundo moinodoti, yase mondongoliyo daku kakabai nia; Inaimo tomundo mokapatuwo yaku abali doi talunggu doi Yonatan nabonua doo, sio kumate imbali.”

²¹Maka Tomundo Zedekia maparentakene sulano yaku tinalunggu doi kamali kintalo. Jadi yaku dungolo idoo, tukon samba kooloyo binee roti luwedoi tamapat makabaian roti sampe roti mosinadai doi kota doo kabuso saibino.