Read Banggai YEREMIA 38 Bible Online

YEREMIA 38 - Banggai bible

YEREMIA 38

¹TEMENENO sumboliyo yaku pelenggene koteteba, nia doi rayat, “Kota nia naikon Yaku beekene doi suludadu Babel, tukon yanila naikon lungguiyomo. Inde komiano modungol doi kota lalomo naikon mate doi polobosian lalomo, kabai sabab malalaalan kabai panakit mobiol-biol. Bai inde komiano mosumbut tukon salakanggene kobutonggo doi Babel miano, aki naikon nainakate; konaansang naikon salamat.” Sefaca Matan napau, Gedalya Pasyhur napau Yukhal Selemya napau, tukon Pasyhur Malkia napau ndongolio saibino Daku binantilandoo.

⁴Maka saibino sambuno doo tauso doi tomundo tukon bantil, “Mian nia sio nai nukum mate. Sabab, tukon bantil buno doiya yana kabaiyo lamah saibino kosuludadu nasamangatan tukon mian bailon modaano modungol nai kotania. Yana aki natulugio ko rayat, bai kabaiyo silaka yanila.”

⁵Tomundo Zedekia motimbilii, “Monondok! Kabaiyo mo yana pololoi tukon mungiasan, yaku aki namoolah pantane komuyu.”

⁶Maka yanila alayo yaku tukon tulunggene yaku tukon alos doi bubung lalomo kotumbuno tomundo namalane Malkia, motobinggakon doi kamali kintalo. Akiyo kopaisu doi bubungoo lalomo, tolongo lapetak, tukon yaku usok doi lapetak doo lalomo.

⁷Doi tempodoo daano komeeng komian Sudan molapamo balimang doi tomundo nakamali. Kosambuno Ebed-Melekh. Yana lengele baikon yaku lapamo inusokon doi bubung doo lalomo. Salataa tomundo daano pimpine korapat doi Benyamin Natataapon Babasal.

⁸Ebed-Melekh taus imbali tukon bantil doi tomundo,

⁹“Tomundo Moinodotii, kokubai mian daango doo aki namondok. Yanila usekenemo yanila Nabi Yeremia doi bubung lalomo; yana tatumo naikon mate malaal idoo, sabab kokinaan kabuso doi kota nia.”

¹⁰Maka tomundo parentayo Ebed-Melekh, “Babayomo kotolu komian tukon kalualemo Yeremia doi bubung doo akiyon yana mate.”

¹¹Maka Ebed-Melekh tauso tukon tolu komian doo doi kamali gudango, tukon mangala toik-toik tua luwedoi idoo, maka yana obulusene tukon alos doi yaku bubung doo lalomo.

¹²Ebed-Melekh sumboliyo yaku abese ko toik-toik doo doi kelekonggu taikon doi bilit salaku posok, sulano alosoo aki osokitio yaku. Maka yaku loingiyo Ebed-Melekh naparentah.

¹³Maka yanila kibute yaku sumbut doi bungkuk, luwedoi bubung doo. Sambuno lapa doiya yaku tinaano doi kamali kintalo doo.

¹⁴Doi meeng tempo bailon, Tomundo Zedekia sumboliyo komian babayo yaku mangadap doi yana doi tataapon kotoluna babasal doi TEMENENO Na Bonua. Yana bantil doi yaku, “Yaku yase masadai doi komuyu, tukon ikoo sio mutimbiliyo tukon mobisa. Inai mosekene oila-oila.”

¹⁵Yaku timbilio, “Kalu bantile komo bisa, tantu Tomundo naikon tuwongikene koukuman mate doi yaku; tukon kalu yaku beena otinau, Tomundo naikon aki yase loingiyo otinau doo.”

¹⁶Tomundo Zedekia tukon aki nabio-bio berjanji doi yaku, bantile, “Mian Bisa motubo daku sakisii, Mian Bisa mobeena tuboan kita, yaku ba totopi baikon yaku mangakate ikoo kabai salakanggene ikoo doi mian-mian badaang moyase akatekon.”

¹⁷Maka yaku bontiikene doi Zedekia baikon TEMENENO Mobabasal Konakuasa, Mian Bisa Israel miano mososubaiyo, bantil bunonia, “Kalu ikoo mangaku kalah doi tomundo Babel nasambu-sambu, ikoo aki naikon muinakate, tukon kotania kai aki naikon nasinua. Ikoo tukon mukalualga naikon salamat.

¹⁸Bai kalu ikoo aki muyase mangaku kalah, kota nia naikon tuwong doi Babel miano limano. Yanila naikon suayo sampe kabus, tukon ikoo aki naikon tongosobii.”

¹⁹Tomundo timbiliyo, “Yaku matakut doi ndabangsa miano daango molapamo dampas doi pihak Babel miano. Inai-inai yaku naikon sinalakanggon doi yanila tukon sinakisaa.”

²⁰“Aki,” kutimbiliyo, “Tomundo aki naikon sinalakanggon doi yanila. Yaku kabiyo tuuno sulano Tomundo loingiyo TEMENENO nateteba sio saibino naikon beles, tukon Tomundo aki naikon nainakate.

²¹Bai kalukai Tomundo aki naiyase salakanggene kobutongo, TEMENENO lapamo oiktakene doi yaku oila naikon komoteali.

²²Doi batokitaan doo lalomo yaku kitayo saibino doi sambu-sambu tomundo Babel. Daanon moampakon yanila bantil, ‘Tomundo pinangaluimo luwedoi nasobat-sobat tuuno, tukon yanila kuasaiyomo. Diabudodoo, koaino lapamo topolos doi lapetak lalomo, yanila saibino undul.’ ”

²³Yaku bantil koidan, “Saibino tomundo naboloki napau naikon binaba sumbut doi Babel miano. Tomundo susungo aki kai nalolos doi yanila. Tomundo naikon linako luwedoi tomundo Babel, tukon nakota nia kabus sinua.”

²⁴Maka Zedekia bantil, “Inai bontiikene doi inde nda posilingonia nia kaliangano, sulano konoamu aki nainotokutiiya.

²⁵Kalukai saibino kosambu lengele baikon yaku basilingano tukon ikoo, yanila naikon lubat tukon masadai doi komuyu kokalianganno ndaposalitaiyan. Yanila naikon paladandimo tuuk aki namangakate ikoo, kalu ikoo salitaikene saibino doi yanila.

²⁶Bantilemo tolong baikon ikoo budukio yaku sulano yaku aki kupatuwo ikoo abali doi talunggu tukon mate imbali.”

²⁷Aki namalumbit doi bundu saibino kosambu doo lubat tukon masa-masadai doi yaku. Yaku pelenggene doi yanila tapat buno tomundo mopinalentakon doi yaku. Tukon bunodoiya yanila aki namoola makabai oila oila sabab akiyono komeeng komian doo motoiyo tomundo tukon yaku napinobantikon.

²⁸ Yaku tataap tinaan doi kamali kintalo sampe doi oloyono Yerusalem musuh libute.