Read Banggai YEREMIA 39 Bible Online

YEREMIA 39 - Banggai bible

YEREMIA 39

¹Doi bituwon kosongolono taun kosiono Zedekia tomundo Yehuda naparentaan, Nebukadnezar tomundo Babel tukon saibino nasuludadu polobosi lubat tukon lobosio ko Yerusalem.

²Doi tanggal kosiono bituwong kosanggapo taun kosongulono meeng pamarentaan Tomundo Zedekia, betong kota musuh manase,

³tukon Yerusalem irebuto. Maka saibino kosambu-sambu tomundo, Babel lubat tukon taus osulang doi Tataapon Babasal Tangano. Doi antara yanila ilaat Nergal-Sarezer, Samgar Nebo, Sarsekim mobalakaikene kokamali, Nergal-Sarezer Rabmag tukon suludadu kapalo bailon.

⁴Salataa Tomundo Zedekia tukon sasaibino kona suludadu kitayo saibino motealido, yanila tukon balausahasa dampasene kobutongo pituwo ko Yordan Pepelakono doi popokoo koidan. Yanila mangala loloon liise kokamali kintalo, maka yanila sumbut loloiyo kotataapon babasal mopotamikene lua kobeton doi tampat doo.

⁵Bai suludadu Babel lelenggene yanila tukon lakoyo Zedekia doi Yeriko Pepelakono. Lapa doiya yana binaba doi Tomundo Nebukadnezar doi kota Ribla doi lipu Hamat, maka kinonoi ukuman mate.

⁶Doi kota doo koidan kona pau pau inakate doi matano salaano, tukon saibino kosambu pamarenta Yehuda doo inakate.

⁷Sambuno lapadoiya Zedekia komatano sinuet, maka binoboi, tukon binaba doi Babel.

⁸Sementala doiya ko Babel miano suayo tomundo nakamali tukon rayat nabonua-bonua, tukon manase kobeton-beton Yerusalem.

⁹Doibunduno rayat modaano doi kota, polaing komian-mian modampasoo doi Babel miano, Nebuzaradan tukon, kapala pasukan Babel akute doi Babel.

¹⁰Sembeleng luwedoi rayat komo talais tuuno tukon akiyo kona buat, tininggalo doi Yehuda tukon binee anggur asino tukon asi.

¹¹Tomundo Nebukadnezar sumbolioyomo Nebuzaradan, napau tukon kapalano, sumbutene koparentah bunonia,

¹²“Tauso unggoliyo Yeremia, tukon dagaiyo yana mono-monondok Inai mobula-bilamdeke yana; lakukene oila kona kinabi.”

¹³Maka Nebuzaradan polaing-laing tukon lua kona letnan, Nebusyazban tukon Nergal-Sarezer tukon saibino kona letnan Babel bailon,

¹⁴ndokiyo yaku doi kamali kintalo. Maka sinalakanggon yaku doi Gadalya Ahikam napau tukon Safan natumbu, komo sio antekene yaku mule tukon salamat. Maka yaku dungolo doi antara rayat.

¹⁵Salataa yaku daano motinalunggu doi kamali kintalo, TEMENENO sumbolio yaku mobantile doi Ebed-Melekh.

¹⁶Sudan miano doo baikon TEMENENO Mobabasal Konakuasa, Mian Bisa Israel, bantil bunonia, “Bunomo Kubantilano loluko, Yaku naikon lubatene doi kota bunggono nia kosilakaan, tukon bolikon namonondokan. Ikoo naikon kitayo langge doo moteali.

¹⁷Bai Yaku, TEMENENO, naikon lindungiyo komuyu. Ikoo aki naikon nasinalakanggon doi mian daango ikoo matakutene.

¹⁸Ikoo naikon muinakate, sabab Yaku naikon salamatene ikoo. Komu ansang naikon salamat sabab ikoo sosingganlang doi Yaku. Yaku, TEMENENO, mobasilingan.”