Read Banggai YEREMIA 4 Bible Online

YEREMIA 4 - Banggai bible

YEREMIA 4

¹TEMENENO bantil, “Israel miano, kalu komuyu yase abali, abalimo doi Yaku. Sakukene lolukon kopilogot-pilogot Kuminisikiton doo, tukon satiamo doi Yaku.

²Kalukai komuyu batotopi tolongo Kosambunggu tukon komuyu tubo jujul adil tukon bisa, maka saibino kobangsa naikon makabi doi Yaku sulano Kubalakatio yanila, tukon yanila naikon nggaale Yaku.”

³ TEMENENO bantil doi modungoliyo ko Yehuda tukon Yerusalem, “Limange komu buta moakiyon nailimang inai momotipas kalibuang doi tampat motubo kosonit.

⁴Taaniomo komu perjanjian tukon Yaku, mu TEMENENO, tukon tolongo butomu tuuk Yaku, he modungoliyo ko Yehuda tukon Yerusalem. Kalu aki, maka Daku nggimalan naikon toduap tukon suayo buno aung moaki namoola pinosoi mau indeemo koidan. Saibino doiya naikon teali doi butomu sabab mukakabai-kakabai molokis.”

⁵Puukemo kotrompet posaapon kolipu! Wokon tukon tontong tukon bulungan. Sumboliyo modungoliyo doo ko Yehuda tukon Yerusalem dampas doi kota-kota modaano kona benteng.

⁶Tudoikenemo loloon doi Sion, TEMENENO Nabunggul, mosobitkai pobiol, inai podungol tanaang. TEMENENO daano molubatene kosilakaan tukon babasal konamanasan luwedoi lembet.

⁷Buno singa sumbut luwedoi nabasokonan buno koidan luwemo moakabuse kobangsa-bangsa molubat iase silakaiyo ko Yehuda. Kota-kota Yehuda naikon teali manas tampat moakiyo komian modungoliyo.

⁸Tobikon doiya, kokiil tukon poloonggene pakeomo toiko kalung paloosan baladuka. Sabab TEMENENO liito tuuno akiyon koidan natade luwedoi Yehuda.

⁹TEMENENO bantil, “Doi oloyodoo tomundo-tomundo tukon pagawe-pagawe naikon moloto konoano; imam-imam bombokon tukon nabi-nabi sosibong.”

¹⁰Maka yaku bantil, “TEMENENO Moinakatandak Tuuno, Ikoo kokoliiyomo Yehuda miano tukon modungoliyo ko Yerusalem! Ikoo bantil baikon naikon daano koperdamean, banggokai dia budodoo kobutonggami inotokutikon kosabel.”

¹¹Kotempono naikon lubat ko Yehuda miano tukon modungoliyo ko Yerusalem malaat bilita baikon mombuul monas luwedoi padang bone daanon mopuul taikon doi yanila. Mombuul doo bolikon mombuul biasa motolongo bengakene koaung makaan doilalom,

¹²bainokai mombuul makasang molubat doi TEMENENO Naparentah susungo tuuk molubatene koukuman doi Namian.

¹³Kitayo, musuh lubat buno bunom. Kereta-kereta napolobosi buno mombuul makasang, kona adalan-adalan mosobit tuuno doi tomisi kueang wah, silakamo kita! Kita silakamo!

¹⁴Yerusalem, sakukenemo kulokisan luwedoi noamiu sulano ikoo sinalamaton. Sampe bulaa kopikiran-pikiran lokis doo tadukai ikoo abese doi noamu lalomo?

¹⁵Luwedoi kota Dan, tukon luwedoi Efraim bunggulo lubato kobobitokon-bobitokon mo mababa bilita molokis.

¹⁶Yanila ingotiikene ko bangsa-bangsa tukon popitoikene doi modungoliyo ko Yerusalem baikon musuh daanon molubat luwedoi lipu moddoon. Yanila naikon wokonggene wokonan polobosian doi kota-kota Yehuda

¹⁷tukon molobosi Yerusalem buno mian mobadagai asi. Saibino doo teali sabab bangsa Yehuda lapamo malontak doi TEMENENO. TEMENENO lapamo basilingan.

¹⁸Yehuda, ikoo susuumumo molubatene kosilakaan doo doi butomu. Cara mutuboan tukon mukakabai-kakabai mokubaiyo sabab saibino kosakisawan doo tiike konoamu.

¹⁹Bulaando sakisaa konoanggu, yaku akimo taan koidan nasakisaa. Yaku aki sanggup tananggene kobutong kopupulosonggu mbombokon doi eoponggu lalomo, sabab yaku lengele trompet mo bulungan, tukon kilisanan polobosi bulungano.

²⁰Kasusahan lubat posusun-susuni momanase posaapon kolipu. Sosi-sosinggot kusandung minanas, kona toik-toik bineding-bending.

²¹Sampe bulaa sio kusakisiiyo mian polobosi mate-matean? Sampe bulaa sio kumondongolii trompet bulungan motapakiik?

²²TEMENENO bantil, “Longas tuuno Daku mian doo, yanila aki natingonio Yaku. Yanila buno pau-pau molongas tuuno aki koidan namangalati mau soisik; pandoi doi kulokisan lalomo, aki nateali doi namonondokan lalomo.”

²³Taikon doi dunia komatanggu nakinita, tokita kosong tukon motuul, taikon timbu yaku lelengea, wah, aki daano kolaango.

²⁴Daku kinita bunggukon tukon bunggul-bunggul motatandak hebat tuuno nanggonggibokan-nggonggibokan.

²⁵Yaku kitayo kobanggapi mau tomisi bengamo saibino.

²⁶Buta molumbang teali padang bone motuul kota-kota nabakas-bakas manas, sabab TEMENENO nggimolio tuuno Kona mian. (

²⁷TEMENENO bontiikene baikon posaapon kodunia naikon teali padang bone, bai Yana aki naikon namanase tuuno.)

²⁸Dunia naikon baladuka, timbu kalipookan tuuno. TEMENENO lapamo basilingan tukon aki naikon naboliyo Kona rencana. Yana lapamo mangala kaputusan tukon aki naikon namundul koidan meeng kolaakonan.

²⁹Lindongolii suludadu alalo mololo adalan tukon mobapana, kubaiyo samba komian dambasene kobutongo. Komosolot-mosolot yanila usokio, bunggul batu yanila libaiyo. Saibino kokota teali kiis, akiyo komo yase dungol idoo koidan.

³⁰He Yerusalem, ikoo lapamo tininggal tukon akimo namoola makabai oila-oila! Tuuk oila mapake kalambi memela tukon butongo bubungaiyo tukon mosoni suasa, tukon solite komata tukon pupul mopook? Palasuma ikoo mohiasio kobutomu, sabab saibino komubibian akimo nayase koidan doi komiu, bai yanila yase liate komu ansang.

³¹Yaku molongol manggadidi buno boine moiyase mosuung buno boine mongula mosuunge konapau tumbeno, bunomokai Yerusalem mokokiil madipot kona ansang. Kolimano keapene tukon yana bebek, “Yaku silakamo — tadukai musuh akateaku!”